༄༅།།རྒྱལ་ཡོངས་མི་དམངས་འཐུས་ཚོགས་བོད་ཀྱི་སྐུ་ཚབ་ཚོགས་པས་པེར་ཀྲེམ་དུ་འཚམས་འདྲི་གནང་བ།

     མི་དམངས་དྲ་བའི་འཕྲིན། ཟླ་12ཚེས་3ཉིན་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་པད་མ་འཕྲིན་ལས་ཀྱིས་སྣེ་ཁྲིད་གནང་བའི་རྒྱལ་ཡོངས་མི་དམངས་འཐུས་ཚོགས་བོད་ཀྱི་སྐུ་ཚབ་ཚོགས་པས་པེར་ཀྲེམ་གྱི་གྲོས་ཚོགས་དང་སྲིད་གཞུང་གི་དཔོན་རིགས། ཕྱིར་སྡོད་རང་མི་དང་ཕྱི་ཁོངས་ཀྲུང་གོ་བའི་འཐུས་མི། པེར་ཀྲེམ་དུ་བྱེས་སྡོད་བོད་རིགས་སྤུན་ཟླ་ཁག་གཅིག་བཅས་དང་བཞུགས་མོལ་སྤེལ་རེས་གནང་བ་མ་ཟད། ད་དུང་བོད་ཀྱི་མི་རིགས་ས་ཁོངས་རང་སྐྱོང་བཅའ་ཁྲིམས་གྲུབ་འབྲས་ཐོབ་པའི་སྒོ་ནས་ལག་ལེན་བསྟར་ཚུལ་དང་དཔལ་འབྱོར་འཛུགས་སྐྲུན་དང་སྣོད་བཅུད་སྲུང་སྐྱོང་གཉིས་གལ་ཆེ་མཉམ་དུ་འཇོག་པའི་བྱེད་ཕྱོགས་ཐོག་མཐའ་བར་གསུམ་དུ་མཐའ་འཁྱོངས་བྱ་ཚུལ་ངོ་སྤྲོད་ཀྱང་གནང་བ་རེད།
     པེར་ཀྲེམ་གྱི་རྒྱལ་ཕྲན་མཉམ་འབྲེལ་གྲོས་ཁང་གི་གྲོས་དཔོན་ཤིས་ཀེ་ཕུའུ་ལེ་ཏེ·ཕུའུ་ལ་ཁེ་དང་བཞུགས་མོལ་གནང་སྐབས་པད་མ་འཕྲིན་ལས་ཀྱིས་ཨུ་ཡོན་ཀྲང་ཀྲང་ཏེ་ཅང་གིས་གྲོས་དཔོན་ཕུའུ་ལ་ཁེ་ལ་འཚམས་འདྲི་གནང་ཚུལ་བརྒྱུད་ཞུ་བྱས་རྗེས་མི་རིགས་ས་ཁོངས་རང་སྐྱོང་ལམ་ལུགས་བོད་དུ་གྲུབ་འབྲས་ཐོབ་པའི་སྒོ་ནས་ལག་ལེན་བསྟར་བ་དང་ཀྲུང་དབྱང་སྲིད་གཞུང་གིས་བོད་རང་སྐྱོང་ལྗོངས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་དང་དམངས་འཚོ་འགན་ལེན་ལ་རྒྱབ་སྐྱོར་ཆེན་པོ་གནང་བ་སོགས་ཀྱི་གནས་ཚུལ་གཙོ་གནད་དུ་ངོ་སྤྲོད་གནང་བ་རེད།
     སྐུ་ཚབ་ཚོགས་པས་ད་དུང་པེར་ཀྲེམ་རྒྱལ་ཕྲན་མཉམ་འབྲེལ་ཕྱི་འབྲེལ་པུའི་དྲུང་ཆེ་ཏིའར་ཁེ·ཨ་ཧོ་ཐེང་དང་ཐུགས་འཕྲད་གནང་ཞིང་། ཨ་ཧོ་ཐེང་གིས་སྐུ་ཚབ་ཚོགས་པ་འཚམས་འདྲིར་ཕེབས་པར་དགའ་བསུ་ཞུས་རྗེས་སྤེལ་རེས་ལ་ཤུགས་སྣོན་རྒྱག་པ་དེ་པེར་ཀྲུང་དབར་གྱི་འབྲེལ་བ་འཕེལ་རྒྱས་གཏོང་རྒྱུར་ཕན་པ་ཡོད་པ་ཞིག་རེད། བོད་ཀྱི་རྨང་གཞིའི་སྒྲིག་བཀོད་འཛུགས་སྐྲུན་དང་ཁོར་ཡུག་སྲུང་སྐྱོང་དབར་གྱི་འབྲེལ་བར་ང་ཚོས་སེམས་ཁུར་ཆེན་པོ་བྱེད་ཀྱི་ཡོད་ཅེས་གསུངས་པ་རེད། པད་མ་འཕྲིན་ལས་ཀྱིས་བོད་ནི་ཀྲུང་གོའི་སྣོད་བཅུད་སྲུང་ཡོལ་ཞིག་ཡིན། འཕེལ་རྒྱས་གཏོང་བའི་བརྒྱུད་རིམ་ནང་རང་སྐྱོང་ལྗོངས་ཀྱིས་སྣོད་བཅུད་ཁོར་ཡུག་སྲུང་སྐྱོང་ལ་མཐོང་ཆེན་པོ་བྱེད་པ་མ་ཟད། ད་དུང་འཛུགས་སྐྲུན་དང་སྲུང་སྐྱོང་གཉིས་ཐོག་མཐའ་བར་གསུམ་དུ་གལ་ཆེ་མཉམ་དུ་འཇོག་གི་ཡོད་ཅེས་གསུངས་པ་རེད།
     འཚམས་འདྲི་གནང་རིང་སྐུ་ཚབ་ཚོགས་པས་ཕྱིར་སྡོད་རང་མི་དང་ཕྱི་ཁོངས་ཀྲུང་གོ་བ་དང་དེ་བཞིན་པེར་ཀྲེམ་དུ་བྱེས་སྡོད་བོད་རིགས་སྤུན་ཟླ་ཁག་གཅིག་དང་སྤེལ་རེས་གཏིང་ཟབ་ཀྱང་གནང་བ་རེད། སྐུ་ཚབ་ཚོགས་པས་བོད་རང་སྐྱོང་ལྗོངས་ཀྱིས་ཁོར་ཡུག་དང་། རང་བྱུང་ཐོན་ཁུངས། བོད་ཀྱི་རིག་གནས། དགོན་པ་སོགས་སྲུང་སྐྱོང་ཐད་འབད་བརྩོན་བྱས་ལུགས་དང་དེ་བཞིན་འདི་ལོའི་ཟླ་བ་བཞི་པར་བོད་ལ་ནེ་པ་ལའི་ས་ཡོམ་གྱི་ཤུགས་རྐྱེན་ཐེབས་པའི་གནས་ཚུལ་ངོ་སྤྲོད་གནང་བ་རེད། པད་མ་འཕྲིན་ལས་ཀྱིས་ཀྲུང་དབྱང་སྲིད་གཞུང་གིས་ནེ་པ་ལའི་ས་ཡོམ་གྱི་ཤུགས་རྐྱེན་ཐེབས་ནས་ས་ཡོམ་གྱི་གནོད་འཚེ་ཕོག་པའི་མང་ཚོགས་ཁྲི་30ལྷག་ཙམ་གྱི་ཁྱིམ་གཞིས་བསྐྱར་སྐྲུན་བྱ་རྒྱུར་མི་དམངས་ཤོག་སྒོར་དུང་ཕྱུར་100ལྷག་ཙམ་བཏང་བ་དང་རང་སྐྱོང་ལྗོངས་སྲིད་གཞུང་གིས་འཆར་འགོད་ལག་བསྟར་བྱེད་བཞིན་ཡོད་ཅེས་བསྟན་གནང་བ་རེད། པད་མ་འཕྲིན་ལས་ཀྱིས་ཕྱིར་སྡོད་བོད་རིགས་སྤུན་ཟླར་ཐུགས་ཁུར་གནང་ལུགས་གསུངས་པ་དང་། བོད་རིགས་སྤུན་ཟླ་ཚོས་ཕ་ཡུལ་འཕེལ་རྒྱས་འགྲོ་ཚུལ་དང་འགྱུར་ལྡོག་བྱུང་ཚུལ་ལ་སེམས་ཁུར་ཆེན་པོ་བྱེད་པ་དང་དེ་བཞིན་ཕ་ཡུལ་ལ་ལྟ་བར་བསྐྱོད་རྒྱུའི་འདུན་པ་ཆེན་པོ་བཅངས་ཚུལ་ཞུས་པ་རེད།
     སྐུ་ཚབ་ཚོགས་པས་པུ་རུ་སེར་ཀྲུང་གོའི་རིག་གནས་ལྟེ་གནས་ལ་ཐང་ག་དང་། བོད་སྨན། ཇ་སོགས་བོད་ཀྱི་རིག་གནས་ཁྱད་ཆོས་ལྡན་པའི་འགྲེམས་རྫས་ཕུལ་བ་རེད།