༄༅།།རྒྱལ་ཡོངས་མི་དམངས་འཐུས་ཚོགས་བོད་ཀྱི་སྐུ་ཚབ་ཚོགས་པས་ཡོ་རོབ་ཇུས་འདོན་ཚོགས་
པའི་མཁས་དབང་དང་བཞུགས་མོལ་གནང་བ།

     མི་དམངས་དྲ་བའི་འཕྲིན། ཟླ་12ཚེས་4ཉིན་བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་པད་མ་འཕྲིན་ལས་ཀྱིས་སྣེ་ཁྲིད་གནང་བའི་རྒྱལ་ཡོངས་མི་དམངས་འཐུས་ཚོགས་བོད་ཀྱི་སྐུ་ཚབ་ཚོགས་པས་ཡོ་རོབ་ཇུས་འདོན་ཚོགས་པའི་ཨེ་ཤེ་ཡའི་གནད་དོན་ཞིབ་འཇུག་སུའོ་རུ“བོད་ཀྱི་དཔལ་འབྱོར་འཕེལ་རྒྱས”ཞེས་པ་བརྗོད་དོན་གཙོ་བོར་བཟུང་ནས་ཡོ་རོབ་ཀྱི་མཁས་དབང་བཅུ་གྲངས་དང་བཞུགས་མོལ་སྤེལ་རེས་གནང་བ་རེད།
     པད་མ་འཕྲིན་ལས་ཀྱིས་ཡོ་རོབ་ཀྱི་མཁས་དབང་ཚོར་བོད་རང་སྐྱོང་ལྗོངས་དབུ་བརྙེས་ནས་ལོ་50སོང་བའི་རིང་དང་ལྷག་པར་དུ་སྒྱུར་བཅོས་སྒོ་དབྱེ་བྱས་ཚུན་དཔལ་འབྱོར་འཛུགས་སྐྲུན་དང་། ཆབ་སྲིད་འཛུགས་སྐྱོང་། རིག་གནས་འཛུགས་སྐྱོང་། སྣོད་བཅུད་ཤེས་དཔལ་འཛུགས་སྐྱོང་སོགས་ཁྱབ་ཁོངས་སུ་བོད་ལ་གྲུབ་འབྲས་ཧ་ཅང་ཆེན་པོ་ཐོབ་ཚུལ་ངོ་སྤྲོད་གནང་ཞིང་། ཁོང་གིས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་རྒྱུ་དང་དམངས་འཚོ་ལེགས་སུ་གཏོང་རྒྱུར་ཀྲུང་དབྱང་སྲིད་གཞུང་གིས་རྒྱབ་སྐྱོར་ཆེན་པོ་གནང་བས་བོད་མི་དམངས་ཀྱི་འཚོ་བར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་ཆེན་པོ་བྱུང་ཡོད། “ལོ་ལྔ་ཚན་བཅུ་གསུམ་པ”ཡི་རིང་དབུལ་སྒྲོལ་དམིགས་ཚད་མངོན་འགྱུར་ཐུབ་པ་དང་2020ལོར་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པར་བོད་ལ་གདེང་ཚོད་ཆེན་པོ་ཡོད་ཅེས་གསུངས་པ་རེད།
     གཞན་ཡང་པད་མ་འཕྲིན་ལས་ཀྱིས་འདི་ལོའི་བོད་རང་སྐྱོང་ལྗོངས་ཀྱི་ལས་དོན་གཙོ་བོ་ཁག་ལ་ཕྱིར་དྲན་གནང་སྟེ་བོད་རང་སྐྱོང་ལྗོངས་ཀྱིས་ཀྲུང་དབྱང་གི“ལོ་ལྔ་ཚན་བཅུ་གསུམ་པ”ཡི་འཆར་འགོད་གྲོས་འགོ་གཞིར་བཟུང་ས་གནས་ཀྱི་འཆར་གཞི་བཟོ་འགོད་བྱེད་ཚུལ་ངོ་སྤྲོད་སྟབས་བདེ་ཞིག་གནང་བ་དང་འབྲེལ་དཔེ་མཚོན་དྲངས་ཏེ་མཁས་དབང་ཚོས་ཐུགས་ཁུར་གནང་བའི་སྣོད་བཅུད་ཁོར་ཡུག་སྲུང་སྐྱོང་གནད་དོན་ཐད་ཀྱི་དོགས་གནད་ཀྱང་བསལ་བ་རེད།
     པད་མ་འཕྲིན་ལས་ཀྱིས་བོད་ཀྱི་རང་བྱུང་སྣོད་བཅུད་ཁོར་ཡུག་སྲུང་སྐྱོང་ཡག་པོ་བྱ་རྒྱུ་ནི་དཔལ་འབྱོར་འཕེལ་རྒྱས་གཏོང་བའི་སྔོན་འགྲོའི་ཆ་རྐྱེན་ཡིན། ཀྲུང་དབྱང་སྲིད་གཞུང་དང་བོད་རང་སྐྱོང་ལྗོངས་སྲིད་གཞུང་གིས་ཁོར་ཡུག་དང་སྣོད་བཅུད་སྲུང་སྐྱོང་ལས་དོན་ལ་ད་བར་དུ་མཐོང་ཆེན་པོ་གནང་སྟེ་སྣོད་བཅུད་དམར་ཐིག་ནན་པོ་བཟོས་པ་དང་བོད་ཀྱི་དོན་དངོས་དང་འཚམ་པའི་ཁོར་ཡུག་སྲུང་སྐྱོང་བཅའ་ཁྲིམས་དང་ཁྲིམས་སྲོལ་རབ་དང་རིམ་པ་བཟོས་ནས་བཏོན་ཡོད་ཅེས་ནན་གསུངས་གནང་བ་རེད།
     ཁོང་གིས“ཨེ་ཤེ་ཡའི་ཆུ་གསོག་མཐོ་ལྕོག”ཅེས་བརྗོད་སྲོལ་ཡོད་པའི་བོད་ལྗོངས་ས་མཐོ་ནི་ཀྲུང་གོ་དང་། ཨེ་ཤ་ཡ་ལྷོ་མ། ཨེ་ཤ་ཡ་ཤར་ལྷོ་བཅས་ཀྱི“ཆུ་བོའི་འབྱུང་ཁུངས”དང“སྣོད་བཅུད་འབྱུང་ཁུངས”རེད། མིག་སྔར་བོད་ཀྱིས་ས་ཁམས་ལེགས་ཆར་བརྟེན་ནས་ཆུ་གློག་རྣམ་གྲངས་འཕེལ་རྒྱས་ཤུགས་ཆེན་གཏོང་བ་དང་དེ་བཞིན་ས་འོག་ཚ་ནུས་དང་ཉི་འོད་ནུས་པ་སོགས་མི་མངོན་པའི་ནུས་རྒྱུ་བེད་སྤྱོད་བྱ་རྒྱུ་ཁྱབ་གདལ་གཏོང་བཞིན་ཡོད། བོད་རང་སྐྱོང་ལྗོངས་སྲིད་གཞུང་གིས་དཔལ་འབྱོར་འཕེལ་རྒྱས་ཤུགས་ཆེན་གཏོང་བ་དང་ཆབས་ཅིག་བོད་ལྗོངས་ས་མཐོའི“རི་བོ་སྔོ་ཞིང་ཆུ་བོ་དྭངས་མོ”ནམ་ཡང་ཡོང་བར་བྱ་རྒྱུ་ཡིན་ཞེས་གསུངས་པ་རེད།
     ཡོ་རོབ་ཀྱི་ཇུས་འདོན་ཚོགས་པ་ཁག་ནས་ཕེབས་པའི་མཁས་དབང་ཚོས་སྐུ་ཚབ་ཚོགས་པས་ཕྱོགས་ཡོངས་དང་དོན་དངོས་དང་མཐུན་པའི་སྒོ་ནས་ངོ་སྤྲོད་གནང་བར་ཁས་ལེན་གནང་བ་དང་ལྷག་དོན་དུ་ཀྲུང་གོ་སྲིད་གཞུང་དང་བོད་རང་སྐྱོང་ལྗོངས་ཀྱིས་སྣོད་བཅུད་སྲུང་སྐྱོང་ཐད་འབད་བརྩོན་ཧུར་ཐག་གནང་བར་བསྔགས་བརྗོད་གནང་བ་རེད།
     སྤེལ་རེས་བྱེད་རིང་སྐུ་ཚབ་ཚོགས་པས་འབྲེལ་ཡོད་མཁས་དབང་དང་སྨྱན་སྦྱོར་གྱིས་བཏོན་པའི་དྲི་བར་ལན་བཏབ་པ་མ་ཟད། ད་དུང་བོད་ཀྱི་ཡུལ་སྐོར་ལས་རིགས་འཕེལ་རྒྱས་མགྱོགས་པོ་གཏོང་རྒྱུ་དང་། མི་རིགས་ཀྱི་སྲོལ་རྒྱུན་རིག་གནས་སྲུང་སྐྱོང་སྔར་བས་ཡག་པོ་བྱ་རྒྱུ། ཇི་ལྟར་བྱས་ནས་ཞིང་འབྲོག་པའི་དཔལ་འབྱོར་གནས་བབ་ལེགས་སུ་གཏོང་རྒྱུ་སོགས་ཀྱི་ཐད་དགོངས་འཆར་བརྗེ་རེས་ཀྱང་གནང་བ་རེད།
     ཚོགས་ཞུགས་ཡོ་རོབ་ཀྱི་མཁས་དབང་ཚོས་སྐུ་ཚབ་ཚོགས་པ་དང་སྤེལ་རེས་གཏིང་ཟབ་བྱས་པ་བརྒྱུད་དེང་དུས་བོད་ཀྱི་སྤྱི་ཚོགས་ཞི་མཐུན་དང་། དུས་བབ་བརྟན་ལྷིང་། ཆོས་ལུགས་འཆམ་མཐུན། མི་རིགས་མཐུན་སྒྲིལ། དམངས་འཚོ་ལེགས་པ། རིག་གནས་དར་རྒྱས། སྣོད་བཅུད་ལེགས་པ་བཅས་ཀྱི་གནས་ཚུལ་ཤེས་རྟོགས་བྱུང་། སླད་ཕྱིན་བྱེད་སྒོ་དེ་རིགས་མང་ཙམ་སྤེལ་ནས་ཕན་ཚུན་དབར་སྤེལ་རེས་བྱེད་ཤུགས་ཆེ་རུ་གཏོང་རྒྱུ་དང་ཤེས་རྟོགས་བྱེད་ཚད་མཐོ་རུ་གཏོང་རྒྱུའི་རེ་བ་ཡོད་ཅེས་གསུངས་པ་རེད།