༄༅།།བོད་ལྗོངས་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་ཚན་སློབ་རླུང་འཕྲིན་
(བོད་སྐད་)གཏོང་འགོ་ཚུགས་པ།

     མི་དམངས་དྲ་བའི་འཕྲིན། 2015ལོ་ཤར་བ་དང་ཆབས་ཅིག་བོད་ལྗོངས་མི་དམངས་ཀུན་ཁྱབ་རླུང་འཕྲིན་ལས་ཁུངས་ཀྱི་ཚན་སློབ་རླུང་འཕྲིན་དངོས་སུ་གཏོང་འགོ་ཚུགས་པ་དང་། བོད་ལྗོངས་ཀྱི་རྒྱ་ཆེའི་གསན་པ་པོར་ཏང་གི་བྱེད་ཕྱོགས་སྲིད་ཇུས་ཤེས་རྟོགས་དང་། ཚན་རིག་རིག་གནས་ཤེས་བྱ་སློབ་སྦྱོང་། ཐོན་འཕར་འབབ་འཕར་གྱི་འཐབ་ལམ་རྒྱ་ཆེར་གཏོང་བ། ཞི་མཐུན་སྤྱི་ཚོགས་གཏོད་པ་བཅས་ཀྱི་ཐད་གར་སྟེགས་གསར་པ་ཞིག་མཁོ་འདོན་བྱ་རྒྱུ་ཡིན་པ་རེད།
     ཤེས་རྟོགས་བྱུང་བ་ལྟར་ན། ཚན་སློབ་རླུང་འཕྲིན་དེ་ལྷ་སའི་སྐད་ཀྱི་ཐོག་ནས་གཏོང་བའི་རླུང་འཕྲིན་ཡིན་པ་དང་བརྗོད་བྱ་གཙོ་བོ་ཚན་སློབ་འབུར་ཐོན་བྱ་རྒྱུ་ཡིནཔ་དང་། ནང་དོན་ཐད་སློབ་གསོ་དང་། ཚན་རྩལ། ཞིང་འབྲོག་ལས། ལོ་ཆུང་བྱིས་པ་སོགས་ཁྱབ་ཁོངས་མང་པོ་དང་འབྲེལ་བ་ཡོད་ཅིང་། དེའི་དམིགས་ཡུལ་ནི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་ཐུགས་ཁུར་དང་། སློབ་གསོའི་སྤུས་ཚད། ཚན་རིག་སྤུས་ཚད། ནང་དོན་ཕུན་སུམ་ཚོགས་པའི་བོད་སྐད་རླུང་འཕྲིན་གཏོད་རྒྱུ་དེ་རེད།