༄༅།།ཕྱི་འབྲེལ་པུས་ཨུ་རུ་སུ་དང་ཨ་རིའི་གཙོ་བདག་ཧེར་སིན་ཁིར་ཐུག་འཕྲད་བྱས་རྗེས་ཨུ་རུ་སུ་དང་
ཨ་རིའི་འབྲེལ་བ་ལེགས་སུ་ཕྱིན་པ་མཐོང་འདོད་ཡོད་ཅེས་བརྗོད་པ། 

       མི་དམངས་དྲ་བའི་འཕྲིན། ཟླ་7ཚེས་17ཉིན། ཕྱི་འབྲེལ་པུའི་མགྲིན་ཚབ་པ་ཧྭ་ཁྲུན་ཡིང་གིས་ཀྲུང་གོ་ཕྱོགས་ཀྱིས་ཨུ་རུ་སུ་དང་ཨ་རིའི་གཙོ་བདག་ཧེར་སིན་ཁིར་ཐུག་འཕྲད་བྱས་པར་དགའ་བསུ་ཞུ་རྒྱུ་ཡིན། ཐུག་འཕྲད་བྱས་རྗེས་ཨུ་རུ་སུ་དང་ཨ་རིའི་འབྲེལ་བ་ལེགས་སུ་ཕྱིན་པ་མཐོང་འདོད་ཡོད་ལ། ཕྱོགས་གཉིས་པོས་སྤེལ་རེས་དང་གླེང་མོལ་ཟབ་ཏུ་དང་མཉམ་ལས་བྱེད་རྒྱ་ཆེ་རུ་གཏོང་རྒྱུའི་རེ་བ་ཡོད་ཅེས་བཤད།
        དེ་ཉིན་གྱི་གསར་འགོད་པའི་འཆར་ཅན་ཚོགས་འདུའི་ཐོག་ཧྭ་ཁྲུན་ཡིང་གིས་ཨུ་རུ་སུ་དང་ཨ་རི་ནི་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་རྒྱུན་འཁུར་ལས་འཛིན་རྒྱལ་ཁབ་དང་རྒྱལ་སྤྱིར་ཤུགས་རྐྱེན་གལ་ཆེན་ལྡན་པའི་རྒྱལ་ཁབ་ཆེན་པོ་ཡིན་པས། རྒྱལ་སྤྱིའི་ཞི་བདེ་དང་བདེ་འཇགས་ལ་འགན་འཁྲི་གལ་ཆེན་ཡོད། ཀྲུང་གོ་ཕྱོགས་ཀྱིས་ཨུ་རུ་སུ་དང་ཨ་རིའི་འབྲེལ་བ་ལེགས་སུ་ཕྱིན་པ་མཐོང་འདོད་ཡོད། ཕྱོགས་གཉིས་ཀྱིས་སྤེལ་རེས་དང་གླེང་མོལ་ཟབ་ཏུ་དང་མཉམ་ལས་བྱེད་རྒྱ་ཆེ་རུ་གཏོང་རྒྱུའི་རེ་བ་ཡོད། དེས་འཛམ་གླིང་གི་ཞི་བདེ་དང་བྱ་གཞག་འཕེལ་རྒྱས་ལ་ཕན་པ་ཡོད་ལ། རྒྱལ་སྤྱིའི་སྤྱི་ཚོགས་ཀྱིས་ལག་གདང་སྦྲེལ་ནས་ཐུན་མོང་གི་འགྲན་སློང་ལ་ཁ་གཏད་འཇལ་བར་ཡང་ཕན་པ་ཡོད་ཅེས་བཤད།
       “ང་ཚོས་ཀྲུང་ཨུ་རྒྱལ་ཁབ་གཉིས་པོའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་ཡིད་ཆེས་ཆེན་པོ་ཡོད། ཀྲུང་ཨུ་རྒྱལ་ཁབ་གཉིས་ཀྱི་འབྲེལ་བར་ཕྱི་ཕྱོགས་ཀྱི་རྒྱུ་རྐྱེན་གང་རུང་ཞིག་གིས་ཤུགས་རྐྱེན་ཐེབས་མི་སྲིད། ང་ཚོས་ཀྲུང་ཨའི་འབྲེལ་བའི་འཕེལ་རྒྱས་ཀྱི་ལངས་ཕྱོགས་ཐད་ལྟ་སྟངས་དེ་ལྟར་འཛིན་གྱི་ཡོད”ཅེས་ཧྭ་ཁྲུན་ཡིང་གིས་བཤད།
       ཨ་རིའི་ཙུང་ཐུང་ཐེ་རོན་ཕུ་དང་ཨུ་རུ་སུའི་ཙུང་ཐུང་ཕུའུ་ཅིང་གིས་ཚེས་16ཉིན་གྱི་ཕྱི་དྲོར། ཧྥིན་ལན་གྱི་རྒྱལ་ས་ཧེར་སིན་ཁིར་ཐུག་འཕྲད་བྱས་ཤིང་། དེ་ནི་ཐེ་རོན་ཕུས་ཨ་རིའི་ཙུང་ཐུང་གི་འགན་འཁུར་ཚུན་ཨ་རི་དང་ཨུ་རུ་སུ་རྒྱལ་ཁབ་གཉིས་ཀྱི་ཙུང་ཐུང་གི་དངོས་གཞིའི་ཐུག་འཕྲད་ཐེངས་དང་པོ་རེད།