༄༅།།མཚོ་སྔོན་ནས་རྫས་འགྱུར་སེ་ཕུན་སུམ་ཚོགས་པའི་ཁུལ་ཞིག་རྙེད་པ།

      མི་དམངས་དྲ་བའི་འཕྲིན། མཚོ་སྔོན་ཞིང་ཆེན་རྒྱལ་ཁབ་ས་ཆ་ཐོན་ཁུངས་ཐིང་ནས་གསར་འགོད་པར་ཤེས་རྟོགས་བྱུང་བར། མཚོ་སྔོན་གྱི་ས་གཤིས་གཏེར་ཁ་རྩད་ཞིབ་ཁང་ལྔ་པས་མཚོ་སྔོན་མོའི་ཤར་རྒྱུད་ནས་རྫས་འགྱུར་སེ་དང་གྷེ་ཕོན་ཆེན་ཡོད་པའི་ཁུལ་ཞིག་རྙེད་ཅིང་། ད་ཆ་མཚོ་སྔོན་མོའི་ཤར་རྒྱུད་ལ་སྒོ་མེ་དབུས་སུ་བྱས་ནས“ལྷོ་ནས་གྷེ་དང་བྱང་ནས་སེ”ཐོན་པའི་རྣམ་པ་ཞིག་རགས་ཙམ་ཆགས་ཡོད་པ་རེད།
     མཚོ་སྔོན་ཞིང་ཆེན་གྱི་ས་གཤིས་གཏེར་ཁ་རྩད་ཞིབ་ཁང་ལྔ་པས་2008ལོར་མཚོ་སྔོན་ཞིང་ཆེན་གྱི་དམིགས་འཛུགས་ས་ཆ་མང་པོར་སའི་གོ་ལའི་རྫས་འགྱུར་བརྟག་དཔྱད་བྱས་པ་ནས་བཟུང་མཚོ་སྔོན་མོའི་ཤར་རྒྱུད་ཀྱི་དམིགས་འཛུགས་ས་ཆ་གཅིག་བསྡུར་ཉེར་ལྔའི་ས་ཁོངས་སུ་སའི་གོ་ལའི་རྫས་འགྱུར་གྱི་རྣམ་གྲངས་3ལ་བརྟག་དཔྱད་བྱས་ནས་བརྟག་དཔྱད་བྱེད་ཁྱོན་ངོས་གྲུ་སྟོང་སྨི་2.14ཟིན་པའི་ནང་རྫས་འགྱུར་སེ་དང་གྷེ་ཐོན་ཡུལ་མང་པོ་ཤེས་རྟོགས་ཐུབ་ཡོད་པ་རེད།
      དབྱེ་ཞིབ་བྱས་པ་ལྟར་ན། ས་རྒྱུའི་ནང་རྫས་འགྱུར་སེ་ཡོད་པ་ནི་དེ་གའི་ས་རིམ་གྲུབ་ཆ་དང་འབྲེལ་བ་ཡོད། དེ་ཡང་ཐན་པ་བསྟན་པ་དང་། ཚྭ་ལྡན་ཆུ་གནས་པ། མཚོ་ནང་སྙིགས་རོ་མང་བའི་དབང་གིས་སའི་ནང་རྫས་འགྱུར་སེ་འདུས་ཆེ་བའི་རྒྱུ་རྐྱེན་གྲས་ཤིག་ཡིན་སྲིད་པ་དང་། རྨ་ཆུའི་རོང་གི་ས་རྒྱུར་རྫས་འགྱུར་གྷེ་མཐོ་པོ་ཡོད་པ་ནི་སྤྱིར་ཁྲི་ཀའི་ས་རྒྱུད་གསུམ་པའི་ཆགས་རིམ་གྱི་ཤུགས་རྐྱེན་ཕོག་ཡོད་པ་རེད།