༄༅།།ཀྲུང་གོའི་ལོ་རྒྱུས་ཡིག་ཚགས་ཁང་གཉིས་པའི་སྒོ་མོ་སྤྱི་དམངས་ལ་ཐོག་མར་ཕྱེ་བ།

     མི་དམངས་དྲ་བའི་འཕྲིན། ཟླ་6ཚེས་9ཉིན་ཀྲུང་གོའི་ལོ་རྒྱུས་ཡིག་ཚགས་ཁང་གཉིས་པའི་སྒོ་མོ་སྤྱི་དམངས་ལ་ཐོག་མར་ཕྱེ་ནས“ཡིག་ཚགས་ཁང་གི་གཅེས་ནོར”མང་དག་ཅིག་གཅིག་མཇུག་གཉིས་མཐུད་ངང་བསྟན་པ་རེད།
     ཀྲུང་གོའི་ལོ་རྒྱུས་ཡིག་ཚགས་ཁང་གཉིས་པ་ནི་1951ལོར་བཙུགས་པ་ཞིག་རེད། ཡིག་ཚགས་ཀྱི་བདེ་འཇགས་འགན་ལེན་བྱ་ཆེད་ཡིག་ཚགས་ལྟ་ཀློག་བྱེད་པ་ཕུད་ད་བར་སྤྱི་ཚོགས་ཀྱི་སྤྱི་དམངས་ལ་སྒོ་མོ་ཕྱེ་མྱོང་མེད། ཀྲུང་ཧྭ་མི་སེར་རྒྱལ་ཁབ་དུས་ཀྱི་སྐབས་རིམ་བྱུང་གི་ཀྲུང་དབྱང་སྲིད་གཞུང་དང་དེ་བཞིན་ཐད་གཏོགས་སྒྲིག་གཞིའི་ཡིག་ཚགས་གཅིག་སྡུད་ཉར་ཚགས་བྱེད་པའི་ཀྲུང་དབྱང་རིམ་པའི་རྒྱལ་ཁབ་ཡིག་ཚགས་ཁང་དེར་ཁྱོན་ཕྱོགས་བསྡུས་ཡིག་ཚགས་1345དང་། བམ་པོ་ཁྲི་230 ཁ་གྲངས་ཁྲི་4500ཙམ་ཡོད། གཞན་ཡང་ཀྲུང་ཧྭ་མི་སེར་རྒྱལ་ཁབ་དུས་ཀྱི་དཔེ་དེབ་དང་། དུས་དེབ། ཚགས་པར་བཅས་ཁྲི་13ལྷག་ཙམ་ཉར་ཚགས་བྱས་ཡོད།