༄༅།།ཀོང་ཏུང་ཀྲའོ་ཆིང་གྲོང་ཁྱེར་དུ་མྱུལ་ཞིབ་བྱས་ནས་དུག་རྫས་བཟོ་བ་དང་ལྐོག་འཚོང་བྱེད་པའི་
གྱོད་དོན་རྩད་ཆོད་བྱུང་བ།

     མི་དམངས་དྲ་བའི་འཕྲིན། ཟླ་12ཚེས་21ཉིན་ཀོང་ཏུང་ཞིང་ཆེན་ཀྲའོ་ཆིང་གྲོང་ཁྱེར་ཉེན་རྟོག་ཕྱོགས་ཀྱིས་གསར་འགྱུར་ཡོངས་བསྒྲགས་ཚོགས་འདུའི་སྟེང་དུ་བསྟན་དོན། ཀྲའོ་ཆིང་གྲོང་ཁྱེར་གྱི་ལོ་རྒྱུས་སྟེང་དུག་རྫས་བཟོ་བ་དང་ལྐོག་འཚོང་བྱེད་པའི་གྱོད་དོན་ཆེ་ཤོས་ཤིག་རྩད་ཆོད་པ་དང་། ཉེན་རྟོག་ཕྱོགས་ཀྱིས་བསྡོམས་པས་འཁྱགས་དུག་གྲུབ་རྫས་ཧ་ལམ་སྟོང་ཁེ་731དང་།  སྲ་བཤེར་བསྲེས་མའི་འཁྱགས་དུག་ཕྱེད་བཟོས་ཐོན་རྫས་ཧ་ལམ་ཏུན་1.21། དུག་བཟོའི་རྒྱུ་ཆ་(མཚེ་ལྡུམ་རྒྱུ་)ཧ་ལམ་སྟོང་ཁེ་226བཅས་རྩིས་ལེན་བྱས་པ་རེད།
     ཀྲང་ག་གེ་མོ་ལ་སོགས་པའི་གྱོད་དོན་དེའི་དུག་འབྲེལ་མི་སྣ་བརྒྱད་འཛིན་བཟུང་བྱས་པ་མ་ཟད། ད་དུང་གྱོད་འབྲེལ་རླངས་འཁོར་5ཞིབ་བཤེར་བཀག་ཉར་བྱས་པ་རེད། པར་རིས་དེ་ནི་ཉེན་རྟོག་ཕྱོགས་ཀྱིས་རྩིས་ལེན་བྱས་པའི་འཁྱགས་དུག་རེད།