༄༅།།<<བོན་དཔྱད་སྤྱི་རྒྱ་རླབས་གཅོད།--གནའ་བོའི་ཞང་ཞུང་དང་འབྲེལ་བའི་གཡུང་དྲུང་
བོན་གྱི་རིག་གཞུང་སྐོར་གྱི་དཔྱད་རྩོམ་བདམས་བསྒྲིགས་>>ཞེས་
པ་དཔར་སྐྲུན་འགྲེམ་སྤེལ་བྱས།

     མི་དམངས་དྲ་བའི་འཕྲིན། ཉེ་ཆར། ཁྲི་བསོད་བསྟན་གྱིས་གཙོ་སྒྲིག་བྱས་པའི་<<བོན་དཔྱད་སྤྱི་རྒྱ་རླབས་གཅོད--གནའ་བོའི་ཞང་ཞུང་དང་འབྲེལ་བའི་གཡུང་དྲུང་བོན་གྱི་རིག་གཞུང་སྐོར་གྱི་དཔྱད་རྩོམ་བདམས་བསྒྲིགས་>>ཞེས་པ་2015ལོའི་ཟླ་8པར་ཀན་སུའུ་མི་རིགས་དཔེ་སྐྲུན་ཁང་གིས་དཔར་ཏེ་འགྲེམས་སྤེལ་བྱས། དེབ་འདི་ནི་བོན་གྱི་རིག་གནས་འཕེལ་རྒྱས་དང་སྲུང་སྐྱོབ་ཐད་རང་ནུས་ཅི་ལྕོགས་ཀྱིས་སྲི་ཞུ་སྒྲུབ་བཞིན་པའི་གཙོ་སྒྲིག་པ་ཁྲི་བསོད་བསྟན་ལགས་ཀྱིས་ལོ་ངོ་དུ་མའི་རིང་དཀའ་ངལ་གང་མང་ཞིག་ཁྱད་དུ་བསད་དེ་(2008-2014)ལོའི་བར་དཔར་མུས་ཀྱི་མདོ་སྨད་བྱང་བརྒྱུད་དང་འབྲེལ་བའི་གཡུང་དྲུང་བོན་བསྟན་དཔྱད་བརྗོད་དེབ་<<དཔྱོད་ལྡན་མཆོད་པའི་མེ་ཏོག་>>ཅེས་པ་ལས་དཔྱད་རྩོམ་ལེགས་གྲས་དང་རིན་ཐང་ཅན་རྣམས་བདམས་ཏེ་ཕྱོགས་གཅིག་ཏུ་བསྒྲིགས་པ་ཞིག་ཡིན།  
     དེབ་འདིའི་བརྗོད་གཞི་ནི་ཞང་བོད་དཔྱད་གླེང་དང༌། ལོ་རྒྱུས་དཔྱད་གླེང༌། རིག་གཞུང་དཔྱད་གླེང༌། ལྟ་གྲུབ་དཔྱད་གླེང༌། སྨན་རྩིས་དཔྱད་གླེང་ཞེས་ཁག་ལྔ་ཡིས་གྲུབ་པ་དང༌། དེར་བསྡོམས་པས་ཞིབ་འཇུག་གི་མཐོང་སྣེ་དང་ཁ་ཕྱོགས་མི་གཅིག་པའི་དཔྱད་རྩོམ་སུམ་ཅུ་སོ་ལྔ་ཡོད།  
     དེང་སྐབས་སྲིད་གཞུང་དང་མང་ཚོགས་གཉིས་ཀའི་ཐད་ནས་བོད་ཀྱི་རིག་གནས་ལ་སྲུང་སྐྱོབ་དང་མཐོང་ཆེན་བྱེད་པའི་འདུ་ཤེས་ཟབ་མོ་ཞིག་ཆགས་ཏེ་བོན་གྱི་དམངས་ཁྲོད་ཀྱི་དཔེ་ཆ་ལེགས་བསྒྲིགས་དང་པར་སྐྲུན་གྱི་བྱ་བཞག་རླབས་པོ་ཆེ་བསྒྲུབས་དང་སྒྲུབ་བཞིན་མཆིས་པས་ན། བོན་ལ་ཞིབ་འཇུག་བྱེད་པའི་ལམ་ཁོད་སྔར་ལས་ཇེ་ཡངས་སུ་བཏང་སྟེ་རིག་གཞུང་ཞིབ་འཇུག་གི་འབྲས་བུ་མི་དམན་པ་ཐོན་བཞིན་པ་དང༌། སྔར་ཐག་གཅོད་ཐུབ་མེད་པ་དང་གསལ་ཁ་མེད་པའི་གནད་དོན་གྱི་ཞིབ་འཇུག་གི་གཏིང་ཇེ་ཟབ་ཏུ་སོང་ཡོད།  
     དཔྱད་རྩོམ་བདམས་བསྒྲིགས་འདིས་སྔར་མི་རྣམས་ཀྱི་བོན་ཞེས་པ་ནི་ཐུའུ་ཐུམ་དད་མོས་དང་མེས་པོའི་དད་མོས་སོགས་གདོད་མའི་ཆོས་ལུགས་ཤིག་ཡིན་པར་བསམ་སྟེ་དོ་སྣང་ཆེན་པོ་མ་བྱུང་བ་དང༌། དཔྱད་ཡིག་དཀོན་པོ་སོགས་ཀྱིས་རྐྱེན་པས་ཞིབ་འཇུག་གི་ཆུ་ཚད་ཀྱང་ཧ་ཅང་དམའ་བའི་རིག་གནས་ཀྱི་སྣང་ཚུལ་ནས་བར་བརྒལ་བྱས་ཏེ། དེང་སྐབས་སྤྱི་ཚོགས་དང་རིག་གནས་ལ་འགྱུར་ལྡོག་བྱུང་བ་དང་བསྟུན་ནས་བོན་པོའི་དཔེ་ཆ་མང་པོ་དཔར་སྐྲུན་བྱས་པ་དང༌། བོན་བསྟན་རིག་གནས་ཀྱི་ཞིབ་འཇུག་གི་གཏིང་ཇེ་ཟབ་ཏུ་སོང་བ་དང་བསྟུན་ནས།  བོན་ནི་བོད་མི་རིགས་ཀྱི་རིག་གནས་ཀྱི་ཁུངས་དེ་ཡིན་པར་བསམས་ཏེ། བོན་བསྟན་གྱི་རིག་གནས་ལ་ཞིབ་འཇུག་བྱེད་པའི་ཚ་རླབས་ཤིག་འཕྱུར་ཏེ་གྲུབ་མཐའི་ཕྱོགས་ཞེན་ཇེ་ཆུང་དང་བོད་སྤྱིའི་མཐོང་རྒྱ་ཇེ་ཆེར། བོད་ཀྱི་རིག་གནས་ཀྱི་རིན་ཐང་ངོས་འཛིན་གྱི་ཚད་ཇེ་བཟང་དུ་འགྲོ་བཞིན་པར་རྟིང་སྐུལ་དང་ཁ་སྣོན་བྱས་ཡོད་དོ།། ༼ མཚོ་མོས་བྲིས། ༽