༄༅།།2022ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་གཉེར་རེ་ཞུ་མཁན་འཐུས་མི་ཚོགས་
པ་དང་རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་གི་ཨུ་ཡོན་དང་གསལ་
འདེབས་སྤེལ་རེས་ཚོགས་འདུ་འཚོགས་པ།

     མི་དམངས་དྲ་བའི་འཕྲིན། ཟླ་6ཚེས་9ཉིན་2022ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་གཉེར་རེ་ཞུ་མཁན་འཐུས་མི་ཚོགས་པས་སུའེ་ཙེར་ལུའོ་སང་དུ་རྒྱལ་སྤྱིའི་ཨོ་ལིམ་ཕིག་ཨུ་ཡོན་ལྷན་ཁང་གི་ཨུ་ཡོན་དང་གསལ་འདེབས་སྤེལ་རེས་ཚོགས་འདུ་འཚོགས་པ་རེད། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ལིའུ་ཡན་ཏུང་ཚོགས་འདུར་ཞུགས་པ་དང་འབྲེལ་ཀྲུང་གོ་སྲིད་གཞུང་གི་ཚབ་ཞུས་ནས་གསལ་འདེབས་གནང་བ་རེད།
     ལིའུ་ཡན་ཏུང་གིས་པེ་ཅིང་དང་ཀྲང་ཅ་ཁོའུ་ཡིས་2022ལོའི་དགུན་དུས་ཨོ་རྩལ་འགྲན་ཚོགས་དང་དགུན་དུས་དབང་སྐྱོན་ཨོ་རྩལ་འགྲན་ཚོགས་གཉེར་རྒྱུར་ཀྲུང་གོ་སྲིད་གཞུང་དང་སྤྱི་ཚོགས་ལས་རིགས་ཁག་གིས་རྒྱབ་སྐྱོར་མཐའ་གཅིག་ཏུ་བྱེད་ཀྱི་ཡོད། ཀྲུང་གོའི་མི་དམངས་ཀྱིས་དགུན་དུས་ཨོ་རྩལ་འགྲན་ཚོགས་ལ་བརྩེ་སེམས་ཟབ་མོ་བཅངས་ཡོད་ལ་གཉེར་འདོད་ཀྱང་ཧ་ཅང་ཆེན་པོ་ཡོད། ཀྲུང་གོ་སྲིད་གཞུང་གིས་ཁས་ལེན་ཐམས་ཅད་དོན་འཁྱོལ་བྱས་ཏེ་2022ལོར་པེ་ཅིང་གིས་དགུན་དུས་ཨོ་རྩལ་འགྲན་ཚོགས་གཉེར་རྒྱུར་ཁྱོན་ཡོངས་ནས་རྒྱབ་སྐྱོར་བྱ་རྒྱུ་ཡིན་ལ་ནོར་སྲིད་དང་། བཅའ་ཁྲིམས། བདེ་སྲུང་། སྒྲིག་འཛུགས་སོགས་ཐད་བདེ་འཇགས་ལྡན་ལ་བློས་འགེལ་ཆོག་པའི་འགན་ལེན་དང་འཐུས་སྒོ་ཚང་ལ་སྟབས་བདེ་བའི་ཞབས་ཞུའང་བྱ་རྒྱུ་ཡིན། ཀྲུང་གོས་སྣོད་བཅུད་ཤེས་དཔལ་འཛུགས་སྐྱོང་དང་། ཁོར་ཡུག་སྲུང་སྐྱོང་། རྒྱུན་མཐུད་ཆོག་པའི་འཕེལ་རྒྱས་གཏོང་བ་བཅས་རྒྱལ་ཁབ་ཀྱི་འཐབ་ཇུས་སུ་བརྩི་གི་ཡོད། དེར་བརྟེན་2022ལོའི་པེ་ཅིང་གི་དགུན་དུས་ཨའོ་རྩལ་འགྲན་ཚོགས་དང་དེ་བཞིན་རྒྱ་ཆེའི་མང་ཚོགས་ཐད་ཀའི་ཕན་པ་ཐོབ་མཁན་དུ་འགྱུར་རྒྱུ་རེད་ཅེས་གསུངས་པ་རེད།
     ལིའུ་ཡན་ཏུང་གིས་ཀྲུང་གོས་དགུན་དུས་ཨོ་རྩལ་འགྲན་ཚོགས་གཉེར་རྒྱུའི་གཉེར་རེ་ཞུ་དོན་ནི་འཛམ་གླིང་གི་ལྔ་ཆ་གཅིག་གི་མི་འབོར་ནང་ཨོ་ལིམ་ཕིག་གི་མཐུན་སྒྲིལ་དང་། མཛའ་གྲོགས། ཞི་བདེ་བཅས་ཀྱི་དམིགས་ཡུལ་དང་འདུ་ཤེས་དེ་བས་ལེགས་པའི་སྒོ་ནས་བརྒྱུད་བསྒྲགས་བྱ་རྒྱུ་དང་། ཀྲུང་གོ་བ་དུང་ཕྱུར་3གངས་འཁྱགས་ལུས་རྩལ་བྱེད་སྒོའི་ནང་ཞུགས་རྒྱུར་སྐུལ་ཁྲིད་བྱ་རྒྱུ། སྐྱོན་བྲལ་གྱི་ཀྲུང་གོ་དང་རྒྱལ་སྤྱིའི་ཨོ་ལིམ་ཕིག་ལུས་རྩལ་ཆེད་ལེགས་སྐྱེས་གསར་པ་འབུལ་རྒྱུ་བཅས་ཀྱི་ཆེད་དུ་ཡིན་ཞེས་གསུངས་པ་རེད།
     ཀྲུང་གོའི་ཨོ་ལིམ་ཕིག་ཨུ་ལྷན་གྱི་ཀྲུའུ་ཞི་རྒྱལ་ཁབ་ལུས་རྩལ་སྤྱི་ཁྱབ་ཅུས་ཀྱི་ཅུས་ཀྲང་ལིའུ་ཕོང་དང་པེ་ཅིང་དགུན་དུས་ཨོ་རྩལ་འགྲན་ཚོགས་གཉེར་རེ་ཞུ་བའི་ཨུ་ལྷན་གྱི་ཀྲུའུ་ཞི་པེ་ཅིང་གྲོང་ཁྱེར་གྱི་ཧྲི་ཀྲང་ཝང་ཨན་ཧྲུན་སོགས་འཐུས་མི་ཚོགས་པའི་ཁོངས་མི་7པོས་གསལ་འདེབས་གནང་བ་རེད།