༄༅།།སི་ཁྲོན་ཞིང་ཆེན་དཀར་མཛེས་བོད་ཁུལ་དུ་ཕྱོགས་བསྡུས་སློབ་གྲྭ་འཛུགས་གཉེར་བྱེད་པ།

     མི་དམངས་དྲ་བའི་འཕྲིན། ཉེ་ཆར་སི་ཁྲོན་གསར་འགྱུར་དྲ་བའི་གསར་འགོད་པ་དཀར་མཛེས་བོད་ཁུལ་དུ་ཟབ་འཇུག་བྱས་ཏེ་ས་གནས་མང་པོར་འདྲི་རྩད་བྱས་པ་བརྒྱུད་ས་གནས་དེ་གའི་ཕྱོགས་བསྡུས་སློབ་གྲྭ་འཛུགས་གཉེར་ལམ་ལུགས་དེས་བོད་ཁུལ་གྱི་སློབ་གསོར་ཕན་ནུས་འཐོན་བཞིན་ཡོད་དེ། སློབ་གསོའི་གླིང་ཁུལ་མང་པོ་ཞིག་འཛུགས་སྐྲུན་བྱེད་བཞིན་ཡོད་པ་དང་། བསྐྲུན་ཟིན་པའི་ཕྱོགས་བསྡུས་འཛུགས་གཉེར་སློབ་གྲྭས་བོད་ཁུལ་གྱི་སློབ་གསོ་དེ་དངོས་གཞིའི་སྲོལ་ལམ་དུ་སྐྱོད་དུ་བཅུག་པས། ས་གནས་དེ་གའི་སློབ་གསོའི་འདུ་ཤེས་ལ་འགྱུར་བ་གཏིང་ཟབ་པོ་འབྱུང་བཞིན་ཡོད། དགེ་རྒན་གྱི་དཔུང་སྡེ་ལེགས་སྒྲིག་བྱས་པ་དང་། དེང་རབས་ཅན་གྱི་སློབ་གསོའི་སྲ་ཆས་སློབ་ཁྲིད་བྱེད་སྐབས་བཀོལ་སྤྱོད་བྱེད་བཞིན་ཡོད་ལ། བོད་རྒྱ་དབྱིན་གསུམ་གྱི་སློབ་ཁྲིད་ཀྱང་དཀར་མཛེས་བོད་ཁུལ་ན་ཁྱབ་གདལ་དུ་གཏོང་བཞིན་ཡོད་པ་རེད།