༄༅།།དགེ་བཤེས་ཤེས་རབ་རྒྱ་མཚོ་འཇམ་དཔལ་དགྱེས་པའི་བློ་གྲོས་མཆོག་རྗེས་སུ་དྲན་པ།

                                           ལྷན་སྐྱེས་རིག་པའི་མེ་འབར་བས།། བཀྲ་ཤིས་འཁྱིལ་བའི་དེད་དཔོན་མཆོག །
                                           གུང་ཐང་ཆེན་པོའི་ལུང་བསྟན་བཞིན།། ལྷ་ལྡན་ཆོས་ཀྱི་ཚལ་ལ་ཕེབས།།
                                           འོག་མིན་གཉིས་པ་འབྲས་སྤུངས་སུ།། རྟག་ཏུ་ངུ་ཡིས་ཆོས་འཕགས་བཞིན།།
                                           མཚན་ལྡན་བླ་མའི་ཞབས་ཀྱི་རྡུལ།། སྤྱི་བོ་མཛེས་བྱེད་རྒྱན་དུ་བླངས།།
                                           གུས་རྟག་བརྩོན་པའི་གཞུ་བདུངས་པས།། མདོ་སྔགས་རིག་གནས་ཀྱིས་མཚོན་པའི།།
                                           ཤེས་བྱའི་རི་དྭགས་ཡར་མའི་ཚོགས།། ཁྱོད་ཐུགས་ནགས་མའི་ཚལ་ལ་བྲོས།།
                                           སྨོན་ལམ་ཆེན་མོའི་གྲྭ་སྐོར་ལ།། ཕྱོགས་གླང་ཆོས་གྲགས་ཕེབས་སྙམ་བཞིན།།
                                           རིགས་པའི་གད་རྒྱངས་ཆེར་བསྒྲགས་ཏེ།། མཁས་རྒུའི་རལ་བ་རྡོག་པས་མནན།།
                                          ཤེས་རབ་གདེངས་ཀ་ལ་འཁྱིལ་བའི།། རིག་པའི་རྒྱ་མཚོ་འཕྱུར་བ་ལས།།
                                          འཆད་རྩོད་རྩོམ་པའི་རྦ་རླབས་རྩེན།། མཁས་བཙུན་བཟང་བའི་མེ་ཏོག་ཐོར།།
                                          ལྷ་ལྡན་ཀུན་གསལ་ལམ་ཡངས་ན།། མཁས་མང་རྒྱུ་སྐར་བཀྲ་ན་ཡང་།།
                                          ཁྱོད་ཐུགས་ཉི་མ་སྟོང་འབར་བས།། ཐམས་ཅད་སྐད་ཅིག་ཟིལ་གྱིས་མནན།།
                                          ལྷག་པར་འགྲན་མེད་སྤངས་རྟོགས་ཀྱི།། ཡོན་ཏན་ཟླ་ཟེར་འཕྲོས་པ་ཡིས།།
                                          འཕགས་མཆོག་གངས་རིའི་མགོན་པོ་ཡི།། ཐུགས་ཀྱི་ཀུ་མུད་འདབ་མ་འཛུམ།།
                                          གང་གི་བཀའ་གསུང་བདུད་རྩི་ཡིས།། ཐུགས་རྒྱུད་བརླན་ནས་གངས་ཅན་གྱི།།
                                          ལག་ལྡན་དབང་བོ་བུ་སྟོན་གྱི།། གསུང་འབུམ་ཚིག་དོན་དག་པར་བྱས།།
                                          གཞན་ཡང་ཟླ་མེད་སྟོན་པ་ཡི།། གསུང་དང་དེ་ཡི་དགོངས་འགྲེལ་གྱི།།
                                          བསྟན་བཅོས་བོད་དུ་འགྱུར་རོ་ཅོག ། བསྲེགས་བཅད་བརྡར་བའི་གསེར་དུ་བསྒྱུར།།
                                          སྔོན་ཚེ་གཟུགས་ཅན་སྙིང་བོ་ཡིས།། སྟོན་པ་མཆོག་གི་ཞབས་ལ་བཞིན།།
                                          དྲེགས་ལྡན་གོ་མིན་ཏང་གི་རྗེས།། རལ་བ་ཁྱོད་ཀྱི་གདན་དུ་བཏིངས།།
                                          ཁྱོད་ཀྱི་ཐམས་མཁས་མཛད་པ་ཡི།། ངོ་མཚར་རྨད་བྱུང་རྣམ་ཐར་ལ།།
                                          ཅིག་ཤོས་དེ་ཡི་གཙོ་འཛིན་ཡང་།། དགྱེས་ནས་བསྔགས་བརྗོད་མེ་ཏོག་ཐོར།།
                                          གཏམ་དག་དཔུང་གི་མཚོན་ཁ་ནས།། ཉམས་ཆུང་དག་གི་སྲོག་བསྐྱབས་ནས།།
                                          སེམས་ཅན་བདེ་ལ་འགོད་པ་ལ།། སེམས་དཔའ་ཁྱོད་ནི་ལྷག་ཏུ་དཔའ།།
                                          མུན་པ་སྟུག་པོར་འཐིབ་པ་ཡི།། དཀར་ནག་ལྡོག་པའི་མུན་བསྐལ་ལའང་།།
                                          འབྱང་བོ་ཁྲོས་པའི་རྡེག་འཚོག་གི ། ལན་དུ་བྱམས་དང་སྙིང་རྗེ་སྦྱིན།།
                                          ཁྱོད་ཀྱི་མཛད་འཕྲིན་རི་རབ་ཀྱི།། ས་ཁྱོན་ཉི་ཟླས་གཞལ་མིན་ན།།
                                          སྲིན་བུ་མགོ་མེད་བདག་ལྟ་བུའི།། གཞལ་བྱའི་གནས་ལྟ་ག་ལ་ཞིག །
                                          དེ་ལྟ་ན་ཡང་ཁོ་བོ་ཡི།། ཀུན་སློང་རྙོག་མེད་པད་མའི་མཚོ།།
                                          ལྟེམ་མེར་འཁྱིལ་ལས་ལྷུང་ལྷུང་རྒྱན།། འབབ་འདི་དྲན་པའི་གདུང་བའོ།།
ཞེས་ཨོ་རྒྱན་གྱིས་2015ལོའི་སྤྱི་ཟླ་2ཚེས་12ཉིན་གྱི་ཞོགས་པར་པེ་ཅིང་ནས་བྲིས། མངྒལཾ། །