༄༅།།བོད་ལྗོངས་ཀྱི"ཁེ་ལས་བརྒྱ་ཡིས་གྲོང་ཚོ་བརྒྱར་རོགས་རམ་བྱེད་པའི"བྱ་སྤྱོད་ཀྱིས་མི་
འབོར་དབུལ་པོ་ཁྲི་3ལྷག་ཙམ་ལ་རོགས་སྐྱོར་བྱས་པ།

གསར་འགྱུར་སྤེལ་དུས། 　【2017ལོའི་ཟླ་ 12ཚེས་19ཉིན། 10:59】（རྩོམ་སྒྲིག་འགན་འཁུར་པ། མཁའ་འགྲོ།）

     མི་དམངས་དྲ་བའི་འཕྲིན། ཉེ་ཆར་གསར་འགོད་པས་བོད་རང་སྐྱོང་ལྗོངས་བཟོ་ཚོང་མཉམ་འབྲེལ་ལྷན་ཚོགས་ནས་ཤེས་རྟོགས་བྱས་པར་གཞིགས་ན། ན་ནིང་ནས་བཟུང“ཁེ་ལས་བརྒྱ་ཡིས་གྲོང་ཚོ་བརྒྱར་རོགས་རམ་བྱེད་པའི”གནད་སྨིན་དབུལ་སྐྱོར་བྱ་སྤྱོད་སྤེལ་འགོ་ཚུགས་ཚུན་བོད་ཀྱི་སྤྱི་དབང་མིན་པའི་ཁེ་ལས་560དེའི་ནང་ཞུགས་ནས་ཡིག་ཚགས་དང་གཱ་བཟོས་པའི་གྲོང་ཚོ་དབུལ་པོ་551ལ་ཆ་སྒྲིག་རོགས་སྐྱོར་བྱས་ཡོད། རིམ་རྩིས་ལྟར་ན། དངུལ་སྒོར་དུང་ཕྱུར་4.25བཏང་ནས་མི་འབོར་དབུལ་པོ་ཁྲི་3.1དབུལ་སྒྲོལ་ཕྱུག་འགྱུར་ཡོང་རྒྱུར་སྣེ་ཁྲིད་བྱས་ཡོད་པ་རེད།
     བོད་རང་སྐྱོང་ལྗོངས་བཟོ་ཚོང་མཉམ་འབྲེལ་ལྷན་ཚོགས་ཀྱིས་སྒྲིག་འཛུགས་བྱས་པའི“ཁེ་ལས་བརྒྱ་ཡིས་གྲོང་ཚོ་བརྒྱར་རོགས་རམ་བྱེད་པའི”བྱ་སྤྱོད་ཀྱིས་བོད་ཀྱི་དབུལ་སྐྱོར་གྱི་དོན་དངོས་དང་དེའི་ནང་ཞུགས་པའི་ཁེ་ལས་ཀྱི་དོན་དངོས་གནས་ཚུལ་ལ་གཞིགས་ནས “ཁེ་ལས་གཅིག་གིས་གྲོང་ཚོ་མང་པོར་རོགས་སྐྱོར་བྱེད་པ”དང“ཁེ་ལས་གཅིག་གིས་གྲོང་ཚོ་གཅིག་ལ་རོགས་སྐྱོར་བྱེད་པ”“ཁེ་ལས་མང་པོས་གྲོང་ཚོ་གཅིག་ལ་རོགས་སྐྱོར་བྱེད་པ”“ཁེ་ལས་ཀྱིས་ཤང་འགན་གཙང་ལེན་པ”སོགས་ཀྱི་བྱ་ཐབས་སྣ་ཚོགས་སྤྱད་ནས་ཐོན་ལས་ཀྱི་དབུལ་སྐྱོར་དང་། ཚོང་དོན་གྱི་དབུལ་སྐྱོར། ལས་ཞུགས་ཀྱི་དབུལ་སྐྱོར། ཞལ་འདེབས་ཀྱི་དབུལ་སྐྱོར། རིག་སྟོབས་ཀྱི་དབུལ་སྐྱོར་སོགས་ཀྱི་བྱེད་ཐབས་ལ་བརྟེན་ནས་གྲོང་ཚོ་དབུལ་པོའི་དུད་ཚང་དབུལ་པོ་དབུལ་སྒྲོལ་ཐུབ་རྒྱུར་རོགས་རམ་དང་རོགས་སྐྱོར་ཧུར་ཐག་བྱས་ཡོད་པ་རེད།
     2016ལོར་ལྷོ་ཁ་ཡར་འབྲོག་གཡུ་མཚོ་འཛུགས་སྐྲུན་ལས་གྲྭ་ཚད་ཡོད་ཀུང་སིས་ཆ་སྒྲིག་རོགས་སྐྱོར་གྱི“དམག་བཀའ་ཁུར་ལེན་ཞུ་ཡིག”ལ་མིང་རྟགས་བཀོད་ནས་ལྷོ་ཁ་གྲོང་ཁྱེར་སྣ་དཀར་རྩེ་རྫོང་ལྷུན་པོ་ཞོལ་ཤང་2018ལོར་དབུལ་པོའི་ཞྭ་མོ་འབུད་རྒྱུར་རོགས་རམ་བྱ་རྒྱུའི་ཁས་ལེན་བྱས་ཡོད་པ་རེད། ལོ་གཅིག་ལྷག་ཙམ་རིང་ཡར་འབྲོག་གཡུ་མཚོ་འཛུགས་སྐྲུན་ཚད་ཡོད་ཀུང་སིས་དངུལ་སྒོར་ཁྲི་380ལྷག་ཙམ་བཏང་ནས་ཞིང་འབྲོག་པའི་རྩལ་ནུས་གསོ་སྦྱོང་འཛིན་གྲྭ་གཉེར་བས་མི་འབོར་དབུལ་པོ་མི་ཐེངས་3800ལྷག་ཙམ་ལ་ཕན་པ་ཐོབ་ཡོད་པ་རེད།
     གསར་འགོད་པས་ཤེས་རྟོགས་བྱས་པར་གཞིགས་ན། བོད་རང་སྐྱོང་ལྗོངས་བཟོ་ཚོང་མཉམ་འབྲེལ་ལྷན་ཚོགས་ཀྱིས་འགན་ལེན་ལམ་སྲོལ་སྔར་བས་འཐུས་སྒོ་ཚང་དུ་བཏང་ནས་སྤྱི་དབང་མིན་པའི་ཁེ་ལས་དང་མི་སྣ་དེ་བས་མང་བ“ཁེ་ལས་བརྒྱ་ཡིས་གྲོང་ཚོ་བརྒྱར་རོགས་རམ་བྱེད་པའི”གནད་སྨིན་དབུལ་སྐྱོར་བྱ་སྤྱོད་ནང་ཞུགས་རྒྱུའི་སྐུལ་སློང་བྱས་ཏེ་བོད་ཀྱིས་ཕྱོགས་ཡོངས་ནས་དབུལ་སྒྲོལ་འགག་སྒྲོལ་གྱི་ལས་འགན་ལེགས་སྒྲུབ་ཐུབ་རྒྱུར་རོགས་སྐྱོར་བྱས་ཡོད་པ་རེད།

ཕྱོགས་བསྡུས་གསར་འགྱུར།