༄༅།།རྒྱལ་ཡོངས་ཀྱི་སྔོན་དུ་དམངས་ཡོངས་ཀྱི"ལྷན་སྐྱེས་དབང་སྐྱོན"དང"བུད་མེད་ཀྱི་
མངལ་སྐེའི་འབྲས་སྐྲན"གནད་སྨིན་སྔོན་འགོག་དང་ཚོད་འཛིན་ཐུབ་པ།

     མི་དམངས་དྲ་བའི་འཕྲིན། ཟླ་6ཚེས་11ཉིན། གསར་འགོད་པས་ཆིང་ཏའོ་ཤིས་ཧའེ་ཨན་ཁུལ་གསར་ནས་ཤེས་རྟོགས་བྱས་པར་གཞིགས་ན། ཁུལ་དེས་ཧྭ་ཏ་གཞི་རྒྱུའི་རྒྱལ་སྤྱིའི་ཚན་རྩལ་གསར་ཤོས་དང་ལག་རྩལ་གྱི་སྟོབས་ཤུགས་ཆེན་པོར་བརྟེན་ནས་རང་རྒྱལ་དུ་ཁུལ་ཡོངས་ཀྱི་ཐེམ་ཐོ་དང་རྒྱུན་སྡོད་མི་འབོར་ལ་ཁྱབ་པའི་ཕྲུ་གུ་མ་སྐྱེས་གོང་གི་གཞི་རྒྱུ་ཞིབ་དཔྱད་ཚད་ལེན་དང་། སྐྱེ་མ་ཐག་པའི་ཕྲུ་གུའི་ལྷན་སྐྱེས་ནད་ཞིབ་དཔྱད་ཚད་ལེན། བུད་མེད་ཀྱི་སྐྲན་ནད་གཉིས་སྔོན་འགོག་དང་ཚོད་འཛིན་བཅས་ཀྱི“གཞི་རྒྱུ་ཞིབ་དཔྱད་ཚད་ལེན་གྱི་དམངས་འཚོའི་རྣམ་གྲངས”སྨན་རིན་མི་དགོས་པའི་སྒོ་ནས་སྔོན་ལ་ལག་ལེན་བསྟར་ཡོད། སྔོན་དཔག་བྱས་ན་ལོ་5སོང་རྗེས། ཁུལ་གསར་དེའི་སྐྱེ་མ་ཐག་པའི་ཕྲུ་གུར་ལྷན་སྐྱེས་དབང་སྐྱོན་ཐོན་ཚད་རྒྱལ་སྤྱིའི་ཐོག་ཉུང་ཤོས་ཡིན་པ་དང་བུད་མེད་ཀྱི་ནུ་མའི་འབྲས་སྐྲན་དང་མངལ་སྐེའི་འབྲས་སྐྲན་ཐོན་ཚད་ཀྱང་ཉུང་དུ་གཏོང་རྒྱུ་ཚད་བརྒལ་བྱུང་ནས་གཞི་རྒྱུའི་ཚན་རྩལ་ལ་བརྟེན་ནས་དམངས་འཚོར་དངོས་སུ་ཕན་འདོགས་ཐུབ་རྒྱུ་རེད།
     ངོ་སྤྲོད་བྱས་པར་གཞིགས་ན། ཁུལ་གསར་གྱི་ཀྲུང་ཏེ་སྣོད་བཅུད་གླིང་དུ་གནས་པའི་ཧྭ་ཏ་གཞི་རྒྱུའི་བྱང་ཕྱོགས་རྟེན་གཞིའི་རྣམ་གྲངས་ལ་ཁྱོན་མ་དངུལ་སྒོར་དུང་ཕྱུར་30བཏང་ནས་ས་ཁྱོན་མུའུ་60བཟུང་ཡོད་པ་དེའི་ཁྲོད་དུས་ཐེངས་དང་པོར་མ་དངུལ་སྒོར་དུང་ཕྱུར་7བཏང་ནས་འཛུགས་སྐྲུན་རྒྱ་ཁྱོན་སྨི་ངོས་གྲུ་ཁྲི་2ཟིན་པ་དེར་ཞིབ་སྤེལ་ཐོག་ཁང་དང་། མ་དཔེའི་མཛོད། གྲངས་གཞིའི་མཛོད་བཅས་ཐོག་ཁང་གསུམ་བསྐྲུན་རྒྱུ་དང་ལས་གྲྭ་གཙོ་བོ་སྤྱིའི་ཆ་ནས་ལེགས་གྲུབ་ཟིན་ཡོད། མིག་སྔར་སྨི་ངོས་གྲུ་1000ལྷག་ཙམ་ཟིན་པའི་ཚོད་ལྟ་ཁང་ལས་མཇུག་འགྲིལ་ནས་སྤྱོད་འགོ་ཚུགས་པ་དང་། ཧྭ་ཏ་གཞི་རྒྱུའི་རང་བརྟེན་ཤེས་བྱའི་བདག་དབང་ཡོངས་སུ་ཚང་བའི་རང་རྒྱལ་གྱིས་བཟོས་པའི་གཞི་རྒྱུའི་ཚད་འཇལ་ཡོ་ཆས་BGISEQ-500དགུ་ཚོད་ལྟ་ཁང་དུ་དབོར་ཟིན་པ་དང་། ཧྲན་ཏུང་ཞིང་ཆེན་གྱི་གཞི་རྒྱུ་ཞིབ་འཇུག་ཚོགས་ཆུང་གི་ཞིབ་འཇུག་ལྟེ་གནས་ཆེ་ཤོས་སྐྲུན་ཟིན་ནས་ཁུལ་གསར་གྱི་མང་ཚོགས་ལ་རྒྱལ་སྤྱིའི་ཚད་གཞི་མཐོ་ཤོས་ཀྱི་ཞིབ་དཔྱད་ཚད་ལེན་ཞབས་འདེགས་ཞུ་རྒྱུ་རེད།