༄༅།།དངོས་བྲིས་གློག་བརྙན་<<ཞང་ཞུང་>>ཞེས་པ་པེ་ཅིང་དུ་ཕབ་སྐྲུན་བྱེད་འགོ་བརྩམས་པ།

     མི་དམངས་དྲ་བའི་འཕྲིན། ཟླ་6ཚེས་7ཉིན་ཀྲུང་དབྱང་བརྙན་འཕྲིན་ལས་ཁུངས་ཀྱི་<<ཕ་ཡུལ་>>ཞེས་པའི་ལེ་ཚན་ཚོགས་ཆུང་དང་། ཀྲུང་གོའི་རྒྱལ་སྤྱིའི་རིག་གནས་སྒྱུ་རྩལ་མཉམ་འབྲེལ་ལྷན་ཚོགས། ཀྲུང་གོའི་འཛམ་གླིང་སྐད་ཡིག་དཔེ་སྐྲུན་ཁང་། ལྷ་ས་གྲོང་ཁྱེར་རིག་དངོས་ཅུས་སོགས་སྡེ་ཚན་གྱིས་མཉམ་འབྲེལ་བྱས་ནས་ཕབ་སྐྲུན་བྱེད་པའི་ཀྲུང་གོའི་ཞང་ཞུང་རིག་གནས་ཀྱི་ལོ་རྒྱུས་མཚོན་པའི་སྙན་ངག་གི་དངོས་བྲིས་གློག་བརྙན་ཐོག་མ་<<ཞང་ཞུང་>>ཞེས་པ་ཕབ་སྐྲུན་བྱེད་པའི་གསར་འགྱུར་ཁྱབ་བསྒྲགས་ཚོགས་འདུ་དང་ཕབ་སྐྲུན་བྱེད་འགོ་རྩོམ་པའི་མཛད་སྒོ་པེ་ཅིང་གྲོང་ཁྱེར་དུ་འཚོགས། དངོས་བྲིས་གློག་བརྙན་འདིས་གནའ་རྫས་དཔྱད་ཞིབ་ཀྱི་ཚད་ལྡན་ཡིག་ཆ་ཁུངས་སྣེར་བཟུང་བ་དང་། མཐོང་རྒྱ་གསར་པའི་ཐོག་ནས་གཟིགས་མོ་བ་རྣམས་དར་རྒྱས་འོད་སྟོང་འབར་མྱོང་བའི་གནའ་བོའི་མིའི་རིགས་ཀྱི་ཤེས་དཔལ་ལྡན་པའི་ཕ་སར་འཁྲིད་རྒྱུ་རེད།
     མཚམས་སྦྱོར་བྱས་པ་ལྟར་ན། དངོས་བྲིས་གློག་བརྙན་<<ཞང་ཞུང་>>ཞེས་པ་དེས་ཞིབ་ཅིང་བདེན་པའི་ལོ་རྒྱུས་ཀྱི་ཚད་ལྡན་ཡིག་ཆ་དང་། གནའ་རྫས་དཔྱད་ཞིབ་ཡིག་རིགས། རྒྱལ་ཁབ་ཕྱི་ནང་གི་མཁས་པ་མང་པོའི་ཞིབ་འཇུག་བྱས་འབྲས་གསར་ཤོས་བཅས་གཞིར་འཛིན་པ་དང་། ཡུལ་ལྗོངས་དངོས་དང་ཟུང་འབྲེལ་བྱས་ནས་ཕབ་སྐྲུན་བྱས་ཏེ་གཟིགས་མོ་བ་ལྷན་རྒྱས་ཀྱི་སྤྱན་ལམ་དུ་ཡུན་རིང་ཞིག་ལ་ས་འོག་ཏུ་ཉར་བའི་དངོས་ཡོད་ཀྱི་ལོ་རྒྱུས་ཤིག་བརྗོད་དེ་མི་རྣམས་ལ་གནའ་བོའི་ཤེས་དཔལ་ལྡན་པའི་ལོ་རྒྱུས་དུམ་བུ་འདི་ཉིད་ཤེས་རྟོགས་དངོས་སུ་བྱེད་དུ་འཇུག་རྒྱུ་རེད། དེ་དང་དུས་མཚུངས་སུ་རྒྱ་ཆེའི་གཟིགས་མོ་བ་ལྷན་རྒྱས་ཀྱིས་ཡང་དག་པའི་ལོ་རྒྱུས་ལྟ་ཚུལ་དང་། མི་རིགས་ལྟ་ཚུལ། རིག་གནས་ལྟ་ཚུལ་བཅས་འཛུགས་པར་མཛུབ་སྟོན་བྱས་ཏེ་ཀྲུང་ཧྭའི་རིག་གནས་ཀྱི་ཐུན་མོང་མ་ཡིན་པའི་ཡིད་དབང་འཕྲོག་ཤུགས་དེ་སྟོན་པར་ལེགས་སྐྱེས་འབུལ་བའི་སྣེ་ཁྲིད་བྱེད་རྒྱུ་རེད། པར་རིས་ནི་མཚོ་སྔོན་པོ་དྲ་བ་ལས་དྲངས།