༄༅།།རྒྱལ་ཁབ་ཀྱིས་རོགས་སྐྱོར་བྱེད་ཤུགས་ཆེ་རུ་བཏང་ནས་བོད་ཀྱི་དམངས་སྤྱོད་མཁའ་
འགྲུལ་འཕེལ་རྒྱས་ལ་རྒྱབ་སྐྱོར་བྱ་རྒྱུ་ཡིན་པ།

     མི་དམངས་དྲ་བའི་འཕྲིན། ཟླ་9ཚེས་12ཉིན་ལྷ་སར་འཚོགས་པའི་བོད་ཀྱི་དམངས་སྤྱོད་མཁའ་འགྲུལ་འཕེལ་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བ་དང་དམངས་སྤྱོད་མཁའ་འགྲུལ་བོད་ལ་ཤར་གཏོང་ཐུབ་ནས་ལོ་50འཁོར་བའི་བཞུགས་མོལ་ཚོགས་འདུའི་ཐོག་ཀྲུང་གོ་དམངས་སྤྱོད་མཁའ་འགྲུལ་ཅུས་ཀྱིས་བོད་རང་སྐྱོང་ལྗོངས་སྲིད་གཞུང་དང་《བོད་ཀྱི་དམངས་སྤྱོད་མཁའ་འགྲུལ་འཕེལ་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་རྒྱུའི་གྲོས་མོལ་སྐོར་གྱི་ཟིན་བྲིས་གནད་བསྡུས་》བཞག་པ་དང་། ཕྱོགས་གཉིས་པོས་མཁའ་ལམ་གསར་གཏོད་དང་། མ་དངུལ་རོགས་སྐྱོར། ཤེས་ལྡན་པ་གསོ་སྐྱོང་སོགས་ཐད་ནས་བོད་ཀྱི་དམངས་སྤྱོད་མཁའ་འགྲུལ་མཆོང་སྐྱོད་ལྟ་བུའི་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན་ཞེས་བཤད་པ་རེད།
     གྲོས་མོལ་གྱི་ཟིན་བྲིས་གནད་བསྡུས་ཀྱི་སྙིང་དོན་གཞིར་བཟུང་འབྲེལ་ཡོད་ཕྱོགས་ཀྱིས་སྔར་བས་གཟིགས་སྐྱོང་གི་རོགས་སྐྱོར་སྲིད་ཇུས་ལག་ལེན་བསྟར་ནས་ཁྲེང་ཏུའུ་ནས་ལྷ་སའི་བར་གྱི་མྱུར་བགྲོད་མཁའ་ལམ་ཤར་གཏོང་བྱེད་པ་དང་། བོད་ལྗོངས་ཁུལ་ནང་གི་གནམ་ཐང་ནས་ཞིང་ཆེན་ཁག་གི་ལྟེ་བའི་གྲོང་ཁྱེར་ཁག་དབར་དང་ལྷག་པར་དུ་ཁ་གཏད་བོད་སྐྱོར་བྱེད་མཁན་ཞིང་ཆེན་དང་གྲོང་ཁྱེར་དང་། པེ་ཅིང་། ཐེན་ཅིན། ཧོ་པེ། འབྲི་ཆུའི་ཟུར་གསུམ་ཁུལ། ཀྲུའུ་ཅང་གཙང་པོའི་ཟུར་གསུམ་ཁུལ་བཅས་དབར་གྱི་མཁའ་ལམ་དང་དུས་གཏན་གནམ་གྲུ་ཤར་གཏོང་བྱེད་པར་ལྕག་སྐུལ་བྱེད་པ། མཁའ་འགྲུལ་ཀུང་སིས་ལྷ་ས་ནས་ཨེ་ཤེ་ཡ་ཤར་ལྷོ་དང་ཨེ་ཤེ་ཡ་ལྷོ་མའི་བར་གྱི་རྒྱལ་སྤྱིའི་དུས་གཏན་གནམ་གྲུ་དང་མཁའ་ལམ་གསར་གཏོད་ལ་ལྕག་སྐུལ་བཅས་བྱས་ནས་བོད་ཕྱི་ཕྱོགས་ལ་སྒོ་མོ་དབྱེ་བར་སྔར་བས་སྐུལ་མ་གཏོང་རྒྱུ་ཡིན་པ་རེད།