༄༅།།ཀན་ལྷོའི་ཐེ་བོའི་ནགས་ཁུལ་ནས་རྒྱལ་ཁབ་རིམ་པ་དང་པོའི་སྟོངས་ཉེར་ཡོད་པའི་སྲུང་
སྐྱོབ་རྩི་ཤིང་རྙེད་པ། 

     མི་དམངས་དྲ་བའི་འཕྲིན། ཀྲུང་གོའི་གསར་འགྱུར་དྲ་བ་ནས་གནས་ཚུལ་སྤེལ་བར་གཞིགས་ན། ཀན་སུའུ་ཞིང་ཆེན་ནགས་ལས་ཐིང་གིས་ཉིན་ཤས་གོང་ཁྱབ་བསྒྲགས་བྱས་པར། ཀན་སུའུ་ཐེ་བོའི་ནགས་ཁུལ་དེ་རྒྱ་མཚོའི་ངོས་ལ་སྨི་2000ནས་སྨི་2800བར་གྱི་ནགས་ཁྲོད་སྡོང་ཕྲན་ཁྲོད་ནས་རི་སྐྱེས་ཏ་ཧྭ་འདྲེས་མའི་མེ་ཏོག་རྙེད་ཅིང་། འདྲེས་མའི་མེ་ཏོག་དེ་ནི་རྒྱལ་ཁབ་ཀྱི་རིམ་པ་དང་པོའི་སྟོངས་ཉེར་ཡོད་པའི་སྲུང་སྐྱོབ་རྩི་ཤིང་ཡིན་པ་རེད།
     ཏ་ཧྭ་འདྲེས་མའི་མེ་ཏོག་ནི་ཀྲུང་གོའི་རི་སྐྱེས་འདྲེས་མའི་མེ་ཏོག་ནང་ལྟ་རིན་ཆེན་པོ་ལྡན་པའི་རིགས་ཤིག་ཡིན་ཞིང་། དང་ཐོག་ཀྲུང་གོའི་བྱང་ཤར་དང་། ནང་སོག ཧོ་པེ། ཧྲན་ཏུང་། ཐའེ་དབན་སོགས་ནས་ཐོན་གྱི་ཡོད། རྒྱ་མཚོའི་ངོས་ལས་མཐོ་ཚད་སྨི་400ནས་སྨི་2400བར་གྱི་ནགས་ཁྲོད་དང་། སྐྱེད་ཚལ། ན་ཁ་སོགས་རྩི་ཤིང་གི་སྤུས་ཚད་ལེགས་ལ་ཆུ་འབུད་ནུས་པ་ལེགས་པའི་ས་ཁུལ་དུ་སྐྱེ་ཡི་ཡོད། རི་པིན་དང་ཁྲའོ་ཞན་ཕྱེད་གླིང་དང་ཨུ་རུ་སུར་ཡང་ཁྱབ་ཡོད་པ་རེད། མིག་སྔར་བྱང་ངོས་སུ་རང་བྱུང་ངང་ཁྱབ་པའི་ཏ་ཧྭ་འདྲེས་མའི་མེ་ཏོག་སྟོངས་ཉེར་ཡོད་པ་རེད།
     ཏ་ཧྭ་འདྲེས་མའི་མེ་ཏོག་ནི་ད་ཆ་རྒྱལ་ཁབ་ཀྱི་གཙོ་གནད་སྲུང་སྐྱོབ་རྩི་ཤིང་དང་རིམ་པ་དང་པོའི་རི་སྐྱེས་སྲུང་སྐྱོབ་རྩི་ཤིང་ཡང་ཡིན་པ་རེད།
     རྒྱལ་ཁབ་ཀྱིས་རང་བྱུང་ནགས་ཚལ་སྲུང་སྐྱོབ་ལས་གྲྭ་ལག་བསྟར་བྱས་པ་དང་ཆབས་ཅིག ཀན་སུའུ་ཐེ་བོའི་ནགས་ཁུལ་དུ་ཉེ་བའི་ལོ་ཤས་ནང་ནགས་ཚལ་ཐོན་ཁུངས་དེ་སླར་གསོའི་རང་བཞིན་ངང་མང་དུ་ཕྱིན་ཐོག ནགས་ཚལ་གྱི་སྣོད་བཅུད་མ་ལག་རིམ་བཞིན་བརྟན་དུ་ཕྱིན་པ་དང་། སྣོད་བཅུད་ཀྱི་རྣམ་པ་རིམ་བཞིན་ངང་ལེགས་སུ་ཕྱིན་པ། སྐྱེ་དངོས་ཀྱི་སྣ་མང་རང་བཞིན་ལ་སྲུང་སྐྱོབ་ནུས་ལྡན་བྱུང་བ། ནགས་ཁུལ་གྱི་བདག་ཏུ་མ་བཟུང་བའི་སྲོག་ཆགས་དང་རི་སྐྱེས་རྩི་ཤིང་ཐོན་ཁུངས་ཀྱང་ཕུན་སུམ་ཚོགས་སུ་ཕྱིན་པ། སྔར་ཡོད་ཀྱི་བདག་ཏུ་མ་བཟུང་བའི་སྲོག་ཆགས་དང་རི་སྐྱེས་རྩི་ཤིང་རིམ་བཞིན་མེད་པ་ནས་ཡོད་པའི་བར་དང་ཉུང་བ་ནས་མང་བའི་བར་འགྱུར་ལྡོག་འགྲོ་བཞིན་ཡོད་པ་རེད།