༄༅།།ཀན་སུའུ་འབྲུག་ཆུ་རྫོང་ནས་དུས་སྔ་མའི་བོན་ཆོས་ཀྱི་གསུང་རབ་གླེགས་བམ་བྲིས་མ་མང་པོ་ཞིག་རྙེད་པ།

     མི་དམངས་དྲ་བའི་འཕྲིན། ཉེ་ཆར་གསར་འགོད་པས་འབྲུག་ཆུ་རྫོང་གི་ཁམ་སྒང་དང་། འཕེན་ཏེན། ཆུ་མགོ་ན། བོད་ཡུལ། དགོན་པ་ལ་སོགས་པའི་ཤང་གི་གྲོང་ཚོ་བཅུའི་ཡུལ་དངོས་སུ་དམངས་ཁྲོད་ཐར་ཐོར་ཉར་ཡོད་པའི་བོན་ཆོས་ཀྱི་གསུང་རབ་བརྟག་དཔྱད་བྱས་ཏེ་བོད་རིགས་དུད་ཁྱིམ་12ནས་བོན་ཆོས་ཀྱི་དཔེ་རྙིང་བམ་པོ་180ལྷག་ཙམ་ལ་གླེགས་བམ་2500 ལྷག་ཙམ་གྱི་ཤོག་གྲངས་21500 ལྷག་ཙམ་ཡོད་པ་དང་། གནོད་སེལ་རི་མོ་མཚོན་རྟགས་80ལྷག་ཙམ། ཆོས་ལུགས་ཡོ་བྱད་སྣ་ཚོགས་30 ལྷག་ཙམ་བཅས་རྙེད་པ་རེད།
     ལན་ཀྲོའུ་སློབ་ཆེན་གྱི་ནུབ་བྱང་གྲངས་ཉུང་མི་རིགས་ཞིབ་འཇུག་ལྟེ་གནས་ཀྱི་ཞིབ་འཇུག་པ་ངག་དབང་རྒྱ་མཚོས་ཡི་གེའི་ཁྱད་ཆོས་དང་། འབྲི་སྟངས། ཡིག་མགོའི་མཚོན་རྟགས། ཚིག་སྦྱོར་སྟངས། དེ་བཞིན་དཔེ་ཆའི་ནང་གི་བར་བཅུག་རི་མོ་དང་་རི་མོ་འབྲི་སྟངས་སོགས་ཀྱི་ཐད་ནས་ཐོག་མའི་གསལ་འབྱེད་བྱས་པ་ན། དཔེ་གཞུང་འདི་དག་ཁྲོད་ཀྱི་མང་ཆེ་བ་ནི་དུས་སྔ་མའི་སྲིད་པ་བོན་ཆོས་ཀྱི་ནང་དོན་ཡིན་པ་དང་། ཉུང་ཤོས་ཤིག་ནི་གཡུང་དྲུང་བོན་ཆོས་ཀྱི་དཔེ་ཆ་བྲིས་མ་ཡིན་ཞིང་། དེ་དག་གི་ནང་དོན་གནམ་རིགས་སྐར་རྩིས་དང་། དུས་ཚིགས་དང་གནས་གཤིས། མོ་རྩིས། གསོལ་འདེབས་སྨོན་ཚིག ནད་བཅོས་གྲིབ་འགོག ཡུལ་ལྷར་གསོལ་བ། ཕྱྭ་གཡང་འཁོར་བ། གེགས་སེལ་ཞོད་འགོག་སོགས་དང་འབྲེལ་བ་ཡོད་པའི་ངོས་འཛིན་གནང་བ་རེད།
     ནུབ་བྱང་མི་རིགས་སློབ་ཆེན་གྱི་བོད་རིག་པ་ཞིབ་འཇུག་གླིང་གི་དགེ་རྒན་ཆེ་མོ་རྡོ་རྗེ་རིན་ཆེན་གྱིས་དཔེ་རྙིང་འདི་དག་གིས་འབྲུག་ཆུ་འབབ་རྒྱུད་འཚོ་བའི་བོད་མི་རིགས་ཀྱི་བསམ་པའི་རིག་གནས་རྒྱུན་འཛིན་བྱས་ཡོད་པ་དང་། བོད་མི་རིགས་ཀྱི་སྲོལ་རྒྱུན་རིག་གནས་ཀྱི་འོད་སྟོང་འབར་བའི་གྲུབ་འབྲས་མཚོན་ཡོད་པས། ཏུང་ཧོང་བྲག་ཕུག་ཏུ་ཉར་ཡོད་པའི་བོད་ཀྱི་ཡིག་རིགས་དང་དོ་ཟླ་བྱེད་ཐུབ་པའི་གནའ་བོའི་བོད་ཡིག་གི་དཔེ་ཆ་ཡིན་པས། ལོ་རྒྱུས་ཀྱི་དཔྱད་གཞིའི་ཡིག་རིགས་ཀྱི་རིན་ཐང་དང་རིག་གཞུང་ཞིབ་འཇུག་གི་རིན་ཐང་ཧ་ཅང་ཆེན་པོ་ཡོད་ཅེས་གསུངས་པ་རེད།