༄༅།།གཡུང་དྲུང་བོན་དང་འབྲེལ་བའི་དཔྱད་གླེང་ལོ་དེབ་མུ་ཁྲི་བཙན་པོའི་དཔྱད་རྩོམ་བདམས་
བསྒྲིགས་འགྲེམ་སྤེལ་གནང་བའི་མཛད་སྒོ་སྤེལ་བ། 

     མི་དམངས་དྲ་བའི་འཕྲིན། 2015ལོའི་ཟླ་6ཚེས་29ཉིན་ལ་ཟུང་ཆུ་རྫོང་འཐབ་ཕྱོགས་གཅིག་གྱུར་པུའུ་དང་རྫོང་ནང་བསྟན་མཐུན་ཚོགས་རྫོང་མི་རིགས་ཆོས་དོན་ཅུས། གསེར་ཆུ་ཡུལ་ཚོ། བྱང་བྱ་དུར་དགའ་མལ་དགོན་ཆེན། རིན་སྤུངས་བཀྲ་ཤིས་སྨིན་གྲོལ་གླིང་གི་དམངས་གཙོ་དོ་དམ་ཨུ་ཡོན་ལྷན་ཁང་བཅས་ཐུགས་ཁུར་དང་རྒྱབ་སྐྱོར་འོག་རིན་སྤུངས་ཚུལ་བསྟན་དང་ཨ་དཔལ་བཟང་གཉིས་ཀྱིས་གཙོ་གཉེར་གྱི་དེབ་སི་ཁྲོན་མི་རིགས་དཔེ་སྐྲུན་ཁང་ནས་པར་བསྐྲུན་བྱས་པའི་གཡུང་དྲུང་བོན་དང་འབྲེལ་བའི་དཔྱད་གླེང་ལོ་དེབ་《མུ་ཁྲི་བཙན་པོའི་དཔྱད་རྩོམ་བདམས་བསྒྲིགས་》འགྲེམ་སྤེལ་གྱི་མཛད་སྒོ་སྟེ། ཟུང་ཆུ་རྫོང་གཙོ་ཚང་དགོན་གྲོང་རྡལ་བྱང་བྱ་དུར་དགའ་མལ་དགོན་ཆེན་དུ་སྤེལ་བ་རེད།
     མཛད་སྒོའི་ཐོག་ཟུང་ཆུ་རྫོང་ནང་བསྟན་མཐུན་ཚོགས་ཀྱི་ཚོགས་གཞོན་མཁན་ཆེན་བླ་མ་ཚེ་རིང་དང་། རྫོང་འཐབ་ཕྱོགས་གཅིག་གྱུར་པུའུ་ཡི་པུའུ་གཞོན་པ་སངས་བཀྲ་ཤིས་དང་། ཆོས་ལུགས་ཅུས་ཀྱི་ཅུས་གཞོན་བློ་ཐར། གསེར་ཆུ་ཡུལ་ཚོའི་ཤང་གཞོན་སྙན་རྒྱལ་རྗེ་སོགས་སྲིད་གཞུང་གི་མི་སྣ་དང་། དེ་བྱང་བྱ་དུར་དགའ་མལ་དགོན་ཆེན་གྱི་མཁན་ཆེན་ཤེས་རབ་གཡུང་དྲུང་དབང་རྒྱལ་རིན་པོ་ཆེ་དང་དཔོན་སློབ་ཤེས་རབ་མཐར་ཕྱིན། རིན་སྤུངས་དགོན་པའི་དབུ་བླ་རྣལ་འབྱོར་ལྷུན་གྲུབ་བསྟན་འཛིན་སོགས་བླ་མ་དང་སྤྲུལ་སྐུ་སྐྱ་སེར་ཉིས་བརྒྱ་ལྷག་མཛད་སྒོར་བཞུགས་ཡོད། ཚོགས་ཐོག་ཏུ་མཁན་ཆེན་བླ་མ་ཚེ་རིང་དང་པ་སངས་བཀྲ་ཤིས་སོགས་ནས་དཔྱད་རྩོམ་བདམས་བསྒྲིགས་ཀྱི་དེབ་དང་འབྲེལ་བའི་གསུང་བཤད་གལ་ཆེན་གནང་བ་རེད།