༄༅།།སྐབས་བཅུ་པའི་བདེ་སྐྱིད་བུམ་པའི་རྐང་རྩེད་སྤོ་ལོ་འགྲན་ཚོགས་ཀྲུང་ནན་མི་རིགས་
སློབ་ཆེན་དུ་འགྲན་བསྡུར་བྱེད་འགོ་བརྩམས་པ།

     མི་དམངས་དྲ་བའི་འཕྲིན། སྤྱི་ཟླ་4ཚེས་11ཉིན་སྐབས་བཅུ་པའི་བདེ་སྐྱིད་བུམ་པའི་རྐང་རྩེད་སྤོ་ལོ་འགྲན་ཚོགས་ཀྱི་འགྲན་བསྡུར་བྱེད་འགོ་རྩོམ་པའི་མཛད་སྒོ་ཀྲུང་ནན་མི་རིགས་སློབ་ཆེན་དུ་འཚོགས་ཤིང་། འགྲན་ཚོགས་སྟེང་ཀྲུང་ནན་ནོར་དཔལ་སྲིད་ཁྲིམས་སློབ་ཆེན་དང་ཀྲུང་ནན་མི་རིགས་སློབ་ཆེན། ཝུའུ་ཧན་སློབ་ཆེན། ཝུའུ་ཧན་ཚན་རྩལ་སློབ་ཆེན་སོགས་སློབ་ཆེན་བཅུ་ཡི་བོད་རིགས་སློབ་མ་ཞུགས་ཡོད་པ་དང་། འགྲན་ཚོགས་འདི་ཟླ་4ཚེས་11ཉིན་ནས་ཚེས་25ཉིན་བར་གྱི་གཟའ་སྤེན་པ་དང་གཟའ་ཉི་མར་སྤེལ་རྒྱུ་རེད།