༄༅།།ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་གནས་བབ་གསར་པའི་འོག་གི་
མི་རིགས་ལས་དོན་ལ་ཤུགས་སྣོན་དང་ལེགས་བཅོས་བྱ་རྒྱུའི་སྐོར་གྱི་
བསམ་འཆར་འགྲེམ་སྤེལ་བྱས་པ།

      མི་དམངས་དྲ་བའི་འཕྲིན། ཉེ་ཆར། ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་༼གནས་བབ་གསར་པའི་འོག་གི་མི་རིགས་ལས་དོན་ལ་ཤུགས་སྣོན་དང་ལེགས་བཅོས་བྱ་རྒྱུའི་སྐོར་གྱི་བསམ་འཆར་༽ཞེས་པ་འགྲེམ་སྤེལ་བྱས་ཏེ། མི་རིགས་གནད་དོན་ཐག་གཅོད་བྱེད་པའི་ཀྲུང་གོའི་ཁྱད་ཆོས་ལྡན་པའི་ཡང་དག་ལམ་བུའི་ཐོག་བློ་བརྟན་འགྱུར་མེད་ཀྱིས་བསྐྱོད་རྒྱུ་དང་། དམངས་འཚོ་ལེགས་བཅོས་བྱེད་རྒྱུར་གཞིགས་ནས་མི་རིགས་ས་ཁུལ་གྱི་དཔལ་འབྱོར་སྤྱི་ཚོགས་གོང་འཕེལ་ལ་སྐུལ་འདེད་གཏོང་རྒྱུ། མི་རིགས་ཁག་བར་ཕན་ཚུལ་འབྲེལ་བ་དང་སྤེལ་རེས་ཟབ་མོ་བྱ་རྒྱུར་སྐུལ་འདེད་གཏོང་རྒྱུ། མི་རིགས་ཁག་གིས་ཐུན་མོང་གི་བསམ་པའི་ཁྱིམ་གཞིས་བསྐྲུན་རྒྱུ། མི་རིགས་ལས་དོན་ཁྲིམས་ལྟར་སྐྱོང་ཐུབ་པའི་ནུས་པ་ཆེ་རུ་གཏོང་རྒྱུ། ཏང་གིས་མི་རིགས་ལས་དོན་ཐད་སྣེ་ཁྲིད་རྒྱུར་ཤུགས་སྣོན་རྒྱག་རྒྱུ་བཅས་ཕྱོགས་དྲུག་གི་ཐད་བསམ་འཆར་ཁག་༢༥ལྷག་ཙམ་བཏོན་ཡོད་པ་དང་། དམིགས་ཡུལ་གཙོ་བོ་ནི་གནས་བབ་གསར་པའི་འོག་གི་མི་རིགས་ལས་དོན་ལ་ཤུགས་སྣོན་རྒྱག་པ་དང་ལེགས་བཅོས་བྱེད་པ། རྒྱལ་ཡོངས་མི་རིགས་སོ་སོའི་མི་དམངས་རྣམས་ཀྱི་སྣེ་ཁྲིད་དེ་ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་པའི་ཐད་སྐུལ་འདེད་དང་། ཀྲུང་ཧྭ་མི་རིགས་ཀྱི་རླབས་ཆེའི་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་རྒྱུར་འབད་བརྩོན་ཧུར་ཐག་བྱེད་པ་བཅས་ཀྱི་ཆེད་དུ་རེད།
       ༼བསམ་འཆར་༽ནང་། རང་རྒྱལ་ནི་གཅིག་གྱུར་ཅན་གྱི་མི་རིགས་མང་བའི་རྒྱལ་ཁབ་ཅིག་ཡིན་པའི་གཞི་རྩའི་རྒྱལ་དོན་གནས་ཚུལ་ལ་ངོས་འཛིན་གཏིང་ཟབ་བྱ་དགོས་པ་དང་། ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་ཡང་དག་པའི་ལམ་བུའི་གཞི་རྩའི་ནང་དོན་ལ་ཁྱོན་ཡོངས་ནས་གོ་བ་ཟབ་མོ་ལེན་དགོས་ན་གཤམ་གྱི་གཞི་རྩའི་བླང་བྱ་ཁག་ངོས་དམ་འཛིན་བྱེད་དགོས་པ་སྟེ། དེ་ཡང་ཏང་གི་འགོ་ཁྲིད་རྒྱུ་རྒྱུན་འཁྱོངས་བྱེད་དགོས་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་བུ་རྒྱུན་འཁྱོངས་བྱེད་དགོས་པ། མེས་རྒྱལ་གཅིག་གྱུར་ལ་སྲུང་སྐྱོང་བྱ་རྒྱུ་རྒྱུན་འཁྱོངས་བྱེད་དགོས་པ། མི་རིགས་ཁག་འདྲ་མཉམ་ཡོང་རྒྱུར་རྒྱུན་འཁྱོངས་བྱེད་པ། མི་རིགས་ས་ཁུལ་གྱི་རང་སྐྱོང་ལམ་ལུགས་རྒྱུན་འཁྱོངས་དང་འཐུས་སྒོ་ཚང་དུ་གཏོང་བ། མི་རིགས་ཁག་མཉམ་དུ་མཐུན་སྒྲིལ་ཧུར་ཐག་དང་དར་རྒྱས་གོང་འཕེལ་ཡོང་རྒྱུ་རྒྱུན་འཁྱོངས་བྱེད་པ། ཀྲུང་ཧྭ་མི་རིགས་ཀྱི་ཐུན་མོང་གི་གཞི་རྩའི་བསམ་བློ་འཛུགས་སྐྱོང་བྱ་རྒྱུ་རྒྱུན་འཁྱོངས་བྱེད་དགོས་པ་དང་། ཁྲིམས་ལྟར་རྒྱལ་ཁབ་སྐྱོང་རྒྱུ་རྒྱུན་འཁྱོངས་བྱེད་དགོས་པ། ད་ཆའི་རང་རྒྱལ་གྱི་མི་རིགས་ལས་དོན་གྱི་དུས་སྐབས་རང་བཞིན་གྱི་ཁྱད་ཆོས་ལ་ངོས་འཛིན་ཟབ་མོ་བྱེད་དགོས་པ་སྟེ། བསྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་ཐད་གོ་སྐབས་དང་འགྲན་རྩོད་མཉམ་དུ་གནས་པ་དང་གཅིག མི་རིགས་ས་ཁུལ་གྱི་དཔལ་འབྱོར་གོང་འཕེལ་མགྱོགས་པོ་འགྲོ་བ་དང་གོང་འཕེལ་གྱི་ཆུ་ཚད་དམའ་བའི་གནས་ཚུལ་ལྡན་པ་དང་གཉིས། རྒྱལ་ཁབ་ཀྱིས་མི་རིགས་ས་ཁུལ་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་མི་རིགས་ས་ཁུལ་གྱི་གཞི་རྩའི་སྤྱི་པའི་ཞབས་ཞུའི་ནུས་པའི་འཛུགས་སྐྱོང་བྱེད་ཤུགས་སྔར་བས་ཞན་པའི་གནས་ཚུལ་ལྡན་པ་དང་གསུམ། མི་རིགས་ཁག་བར་ཕན་ཚུན་སྤེལ་རེས་དང་འབྲེལ་བ་དམ་ཟབ་བྱེད་ཤུགས་ཆེ་རུ་འགྲོ་བ་དང་མི་རིགས་ཀྱི་རྒྱུ་རྐྱེན་ལས་བྱུང་བའི་འགལ་བ་མང་དུ་འགྲོ་བ་གཉིས་མཉམ་དུ་གནས་པ་དང་བཞི། མི་རིགས་ཁ་བྲལ་དང་ཆོས་ལུགས་ཐད་ཀྱི་ཐལ་སྐྱོད། གཏུམ་སྤྱོད་འཇིགས་སྐུལ་ལ་འཐབ་རྩོད་བྱེད་པར་གྲུབ་འབྲས་མངོན་གསལ་དོད་པོ་བྱུང་ཡོད་པ་དང་ས་ཁུལ་ཁ་ཤས་ལ་འཇིགས་སྐུལ་རིང་ལུགས་ཀྱི་བྱ་སྤྱོད་ད་དུང་གནས་ཡོད་པ་སོགས་ཀྱི་གནས་ཚུལ་ཚུད་ཡོད་པས། གནས་བབ་གསར་པའི་འོག་གི་མི་རིགས་ལས་དོན་སྐོར་གྱི་མཛུབ་སྟོན་བསམ་བློ་སྔར་བས་ཁ་གསལ་དུ་བཏང་ནས། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་ཡོང་ཆེད་ཐུན་མོང་དུ་འབད་བརྩོན་བྱེད་དགོས་ཞེས་བསྟན་འདུག
       ༼བསམ་འཆར་༽ནང་། མི་རིགས་ས་ཁུལ་གྱི་དཔལ་འབྱོར་སྤྱི་ཚོགས་གོང་འཕེལ་གཏོང་རྒྱུའི་རྨང་གཞིའི་བསམ་བློ་འཛུགས་རྒྱུུ་དང་། ཁྱོན་ཡོངས་ནས་འབྱོར་འབྲིང་སྤྱི་ཚོགས་ཀྱི་དམིགས་འབེན་འགྲུབ་པར་བྱས་ཏེ་ནུབ་རྒྱུད་གསར་སྤེལ་ཆེན་མོའི་འཐབ་ཇུས་གཏིང་ཟབ་ཏུ་གཏོང་རྒྱུ། སྤྱི་པའི་ཞབས་ཞུའི་རྨང་གཞིའི་ཆུ་ཚད་མཐོ་རུ་གཏོང་བ། དམངས་འཚོ་ལེགས་བཅོས་བྱ་རྒྱུ་དེ་ལས་འགན་དང་པོར་བརྩིས་ཏེ་དབུལ་སྐྱོར་རྒྱུན་འཁྱོངས་བྱེད་རྒྱུ་གཙོ་གནད་དུ་འཛིན་པ། སློབ་གསོ་དང་། ལས་ཞུགས། ཐོན་ལས་སྒྲིག་གཞི་སྙོམས་སྒྲིག རྨང་གཞིའི་སྒྲིག་ཆས་འཛུགས་སྐྲུན་དང་སྐྱེ་ཁམས་ཁོར་ཡུག་སྲུང་སྐྱོང་བྱ་རྒྱུ་གཙོ་བོར་བཟུང་ནས་ཁྲོམ་རའི་གྲུབ་ཆའི་འཁོར་སྐྱོད་དང་མི་རིགས་ཁག་གི་འགྲོ་འོང་སྤེལ་རེས། དངུལ་རྩའི་འབྲེལ་གཏུག་སོགས་བྱེད་ཤུགས་ཆེ་རུ་བཏང་ནས་ས་ཁུལ་རང་བཞིན་གྱི་ཐུན་མོང་གནད་དོན་ཐག་གཅོད་བྱ་རྒྱུ། མི་དམངས་བདེ་སྐྱིད་དང་མི་རིགས་མཐུན་སྒྲིལ་ལ་སྐུལ་འདེད་བཏང་ནས་མི་རིགས་ཁག་འཆམ་མཐུན་མཉམ་གནས་དང་། ཞི་མཐུན་ངང་གོང་འཕེལ་བཏང་ནས་ཁྱད་ཆོས་ལྡན་པ་དང་མི་རིགས་ས་ཁུལ་གྱི་ཁྱད་ཆོས་ལྡན་པའི་ཚན་རིག་གི་འཕེལ་རྒྱལ་ལམ་བུའི་ཐོག་བསྐྱོད་དགོས་ཞེས་བསྟན་འདུག
       ༼བསམ་འཆར་༽ནང་། ཕན་ཚུན་འདྲེས་འདྲེས་རང་བཞིན་གྱི་སྤྱི་ཚོགས་གྲུབ་ཆ་དང་སྡེ་ཁུལ་ཁོར་ཡུག་སྐྲུན་རྒྱུར་སྐུལ་འདེད་གཏོང་དགོས་པ་དང་། མི་རིགས་ཁག་གི་མང་ཚོགས་བར་ཕན་ཚུན་ཤེས་རྟོགས་དང་། བརྩི་འཇོག ཁོག་ཡངས། སྤྲོ་དགའ། སློབ་སྦྱོང་། རོགས་རམ་བཅས་བྱ་རྒྱུར་སྐུལ་འདེད་གཏོང་དགོས་པ། ཁྱོན་ཡོངས་ནས་གཏིང་ཟབ་ལ་དུས་ཡུན་རིང་བའི་མི་རིགས་མཐུན་སྒྲིལ་ཡར་རྒྱས་ཀྱི་གསར་གཏོད་བྱེད་སྒོ་སྤེལ་ཏེ། རྒྱུན་གཏན་དང་། བསམ་པའི་སྤེལ་རེས། བྱ་སྤྱོད། གཞི་རིམ་བཅས་གཙོ་བོར་འཛིན་དགོས་པ་དང་། མི་ཆོས་རིག་གནས་དང་། དངོས་གཟུགས་ཅན། སྤྱི་ཡོངས་ཅན་ལ་སྣང་ཆེན་བྱ་རྒྱུ་རྒྱུན་འཁྱོངས་བྱེད་དགོས། བློ་བརྟན་འགྱུར་མེད་ངང་རྒྱལ་ཁབ་ཀྱི་རྒྱུན་སྤྱོད་སྐད་ཡིག་སློབ་གསོ་ལག་བསྟར་བྱེད་དགོས་པ་དང་། ཁྱོན་ཡོངས་ནས་རྒྱལ་ཁབ་ཀྱི་རྒྱུན་སྤྱོད་སྐད་ཡིག་སློབ་ཚན་འཛུགས་དགོས་པ། ཁྱོན་ཡོངས་ནས་རྒྱལ་ཁབ་ཀྱི་རྒྱུན་སྤྱོད་སྐད་ཡིག་ཁྱབ་གདལ་གཏོང་བ་བཅས་བྱས་ཏེ་གྲངས་ཉུང་མི་རིགས་ཀྱི་སློབ་མས་རྒྱལ་ཁབ་ཀྱི་རྒྱུན་སྤྱོད་སྐད་ཡིག་སྤྱིའི་ཆ་ནས་ཁོངས་སུ་ཆུད་པ་དང་བེད་སྤྱོད་ཐུབ་པར་འགན་སྲུང་བྱེད་དགོས་པ་དང་ཆབས་ཅིག་གྲངས་ཉུང་མི་རིགས་ཀྱིས་རང་མི་རིགས་ཀྱི་སྐད་ཡིག་ཐོག་ནས་སློབ་གསོ་མྱོང་བའི་དབང་ཆར་བརྩི་འཇོག་དང་འགན་སྲུང་བྱས་ནས་གྲངས་ཉུང་མི་རིགས་ཀྱི་སྐད་ཡིག་སློབ་གསོའི་ཆུ་ཚད་ཟམ་མི་ཆད་པར་མཐོ་རུ་གཏོང་དགོས་པ་དང་། མི་རིགས་ས་ཁུལ་དུ་ལས་དོན་སྒྲུབ་བཞིན་པའི་རྒྱ་རིགས་ལས་བྱེད་པས་གྲངས་ཉུང་མི་རིགས་ཀྱི་སྐད་ཡིག་ཁོངས་སུ་ཆུད་པ་བྱེད་དགོས་ཞེས་ནན་བཤད་བྱས་ཡོད།
       ༼བསམ་འཆར་༽ནང་། ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་གསོ་སྤེལ་ཧུར་ཐག་བྱས་ནས་མི་རིགས་ཁག་གི་ལས་བྱེད་མང་ཚོགས་ནས་ཀྲུང་གོ་ནི་རྒྱལ་ཡོངས་མི་རིགས་ཁག་གི་མཉམ་དུ་བསྐྲུན་པའི་རྒྱལ་ཁབ་ཅིག་དང་། ཀྲུང་ཧྭ་རིག་གནས་ནི་མི་རིགས་ལྔ་བཅུ་ང་དྲུག་གི་རིག་གནས་ཚུད་པའི་རིག་གནས་ཤིག་ཡིན་པ། ཀྲུང་ཧྭའི་ཤེས་དཔལ་ནི་མི་རིགས་ཁག་གིས་མཉམ་དུ་གཏོད་པའི་ཤེས་དཔལ་ཞིག་ཡིན་པ། ཀྲུང་ཧྭ་མི་རིགས་ནི་མི་རིགས་ཁག་ལ་དབང་བའི་ཁྱིམ་ཚང་ཆེན་མོ་ཞིག་ཡིན་པ་ཤེས་རྟོགས་གཏིང་ཟབ་ཐུབ་རྒྱུར་ཁྲིད་སྟོན་བྱས་ཏེ། མི་རིགས་ཁག་འོ་ཆུ་འདྲེས་པ་དང་། གཅིག་ལ་གཅིག་རྟེན། བདེ་སྡུག་མཉམ་འབྲེལ། གཟི་བརྗིད་དང་བརྙས་བཅོས་མཉམ་མྱོང་ཡིན་པའི་འདུ་ཤེས་སྲ་བརྟན་ཞིག་འཛུགས་དགོས་པའི་བླང་བྱ་བཏོན་ཡོད།
       ༼བསམ་འཆར་༽ནང་། མི་རིགས་ལས་དོན་གྱི་ཁྲིམས་ལུགས་ཁྲིམས་སྲོལ་འཛུགས་རྒྱུར་ཤུགས་སྣོན་བརྒྱབ་ནས་མི་རིགས་ས་ཁོངས་རང་སྐྱོང་བཅའ་ཁྲིམས་ལག་བསྟར་ནན་པོ་བྱེད་དགོས་པ་དང་། མི་རིགས་ལས་དོན་དང་འབྲེལ་བའི་ཁྲིམས་སྲོལ་དོན་ཚན་བཟོ་བཅོས་དང་འཐུས་ཚང་དུ་གཏོང་དགོས། ཁྲིམས་ལྟར་མི་རིགས་རྒྱུ་རྐྱེན་དང་འབྲེལ་བའི་གནད་དོན་ཐག་གཅོད་འོས་འཚམ་བྱེད་དགོས་པ་དང་། ཁྲིམས་ལུགས་ཀྱི་ཁྱབ་ཁོངས་ནང་དང་ཁྲིམས་འཛིན་གྱི་འཁོར་ལམ་ཐོག་མི་རིགས་རྒྱུ་རྐྱེན་དང་འབྲེལ་བའི་གནད་དོན་ཐག་གཅོད་བྱེད་དགོས་པ་ལས་གྲངས་ཉུང་མི་རིགས་མང་ཚོགས་ཀྱི་དམངས་དོན་དང་ཉེས་དོན་གནད་དོན་མི་རིགས་གནད་དོན་དུ་བསྡུ་མི་རུང་བ་དང་། མི་རིགས་ས་ཁུལ་དུ་ཐོན་པའི་སྤྱིར་བཏང་གི་འགལ་ཟླ་དང་རྩོད་གཞི་མི་རིགས་གནད་དོན་དུ་བསྡུ་མི་རུང་ཞེས་བཏོན་ཡོད་པ་རེད།