༄༅།།ཀྲུང་གོའི་མངོན་མིན་རིག་གནས་ཤུལ་བཞག་རྒྱུན་འཛིན་པའི་ཞིབ་འཇུག་ཟབ་སྦྱོང་གསོ་སྐྱོང་
འཆར་གཞི་གསོ་སྦྱོང་འཛིན་གྲྭར་འཚམས་འདྲི་བྱས་པ།

     མི་དམངས་དྲ་བའི་འཕྲིན། ཟླ་11ཚེས་20ཉིན། གསར་འགོད་པ་ལྷོ་ནུབ་མི་རིགས་སློབ་གྲྭ་ཆེན་མོར་བསྐྱོད་ནས་སློབ་ཆེན་དེ་རུ་འཛུགས་གཉེར་བྱེད་པའི"ཀྲུང་གོའི་མངོན་མིན་རིག་གནས་ཤུལ་བཞག་རྒྱུན་འཛིན་པའི་ཞིབ་འཇུག་ཟབ་སྦྱོང་གསོ་སྐྱོང་འཆར་གཞི་གསོ་སྦྱོང་འཛིན་གྲྭར"འཚམས་འདྲི་བྱས་པ་རེད། སི་ཁྲོན་ཞིང་ཆེན་རྔ་བ་བོད་རིགས་ཆའང་རིགས་རང་སྐྱོང་ཁུལ་ནས་ཡོང་བའི་སློབ་གཉེར་བ་40ཡིས་འདི་རུ་ཐང་ག་འབྲི་རྩལ་སློབ་སྦྱོང་བྱེད་ཀྱི་ཡོད་པ་རེད། 
     ཐེངས་འདིའི་གསོ་སྦྱོང་བྱེད་དོན་གཙོ་གནད་ནི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་བོད་ཀྱི་ཐང་ག་སྒྱུ་རྩལ་སྲུང་སྐྱོང་དང་རྒྱུན་འཛིན། འཕེལ་རྒྱས་བཅས་བྱ་རྒྱུའི་སྐོར་ཡིན་ཞིང་། དམིགས་ཡུལ་ནི་ཐང་ག་གསར་དུ་འབྲི་བ་དང་འབྲི་བའི་གོ་རིམ་ཁྲོད་ཀྱི་འགག་རྩའི་ལག་རྩལ་སོགས་ཀྱི་དཀའ་གནད་ཐག་གཅོད་བྱེད་རྒྱུ་ཡིན་ཞིང་། གསོ་སྦྱོང་བྱས་པ་བརྒྱུད་སློབ་གཉེར་བ་ཚོའི་ཐང་ག་འབྲི་རྩལ་གྱི་ཆུ་ཚད་ཇེ་མཐོར་བཏང་ནས་ཐང་ག་སྒྱུ་རྩལ་དང་དེང་རབས་ཀྱི་རི་མོ་འབྲི་རྩལ་གཉིས་མཉམ་འདྲེས་ངང་གོང་དུ་འཕེལ་བར་སྐུལ་འདེད་དང་། ཁྱད་ཆོས་ལྡན་པའི་རིག་གནས་ཀྱི་གསར་གཏོད་ཐོན་ལས་གོང་དུ་འཕེལ་བར་སྐུལ་འདེད་གཏོང་བའི་རེ་བ་བྱེད་ཀྱི་ཡོད་པ་རེད།