༄༅།།བོད་རིགས་ཀྱི་ཤོ་རྩེད་རྩེད་སྟངས།

     ཇ་ཁང་དང་གླིང་ག་སོགས་ས་ཆ་མང་པོར་མི་རྣམས་ཀྱིས་མཉམ་དུ་ཤོ་རྒྱག་པ་མཐོང་རྒྱུ་ཡོད། ཤོ་པས་ཤོ་མིག་ལ་ལྟ་བཞིན་ཤོ་བཤད་བཏང་ནས་ཤོ་རྒྱག་པ་དང་ཧ་ཅང་འཁྲུག་པོ་ཡོད།
      ཉིན་ལྟར་ཕྱི་དྲོའི་ཆུ་ཚོད་གསུམ་པ་བཞི་པ་ཙམ་ལ་རྫོང་རྒྱབ་སྤྱི་གླིང་དུ་ཤོ་བརྒྱབ་ནས་སྡོད་མཁན་མང་པོ་མཐོང་རྒྱུ་ཡོད། ཤོ་རྒྱག་སྐབས་ཤོ་གྲུ་བཞི་གཉིས་དང་། ཤོ་གདན། བརྡབ་སེ། ཤོ་ཕོར། ཤོ་རྡེལ་ལག་ཁྱི་བཅས་དགོས་ཤིང་། ཤོ་དངོས་སུ་རྒྱག་སྐབས་མི་གཉིས་མཉམ་དུ་རྒྱག་པའི་ཉིས་ཤོ་དང་། མི་གྲངས་གསུམ་མཉམ་དུ་རྒྱག་པའི་གསུམ་ཤོ མི་གྲངས་བཞི་ཕྱོགས་གཉིས་སུ་བགོས་ཏེ་མཉམ་དུ་རྒྱག་པའི་བཞི་ཤོ་བཅས་རྩེ་ལུགས་ཁག་གསུམ་ཡོད། སྲོལ་རྒྱུན་ལྟར་ན། ཤོ་མ་བརྒྱབ་གོང་ལ་རྟེན་འབྲེལ་མཚོན་བྱེད་དུ་འཛུགས་ཆང་ཞེས་ཤོ་པ་ཡོད་ཚད་ཀྱིས་ཆང་ཞབས་བཏགས་གང་ངམ་གསུམ་སྒྲོན་མཉེས་དག་དང་ཡང་ན་གསུམ་སྒྲོན་ཞབས་བཏགས་གང་རུང་གཅིག་གྱུར་འཐུང་དགོས། དེ་ནས་སྔ་དྲོ་ཆེ་དང་དགོང་དྲོ་ཆུང་ཞེས་རྩེད་མོ་རྩེ་བའི་དུས་ཚོད་ཞོགས་པ་ཡིན་ཚེ་ལོ་ན་རྒན་པ་དང་ཕྱི་དྲོ་འཁེལ་ཚེ་ལོ་ན་གཞོན་པ་དེས་སྔོན་དུ་འཛུགས་དགོས། དེ་མིན་ཤོ་མོ་ཤར་དང་བག་མ་ཀླུང་ཞེས་པ་ལྟར་ལག་ཁྱི་བརྡབ་སེའི་ནུབ་ནས་ཤར་ལ་གཡས་སྐོར་བརྒྱབ་ནས་གཏོང་དགོས། ཤོ་རྒྱག་སྐབས་ཤོ་པ་ཕྱོགས་སོ་སོས་གཞན་གྱི་ལག་ཁྱི་གསོད་པ་དང་རང་གི་ལག་ཁྱི་དགུ་པོ་གང་ཐུབ་ཀྱིས་ཟླ་སྒྲིལ་བཏང་སྟེ་ཤོ་རྡེལ་གཅིག་ཀྱང་མ་ལུས་པ་བགྲངས་ནས་འགྲོ་མགྱོགས་མིན་ལྟ་བའི་ཕན་ཚུན་འགྲན་བསྡུར་ལྟ་བུ་ཞིག་ཡིན་ལ་རྡེའུ་རེ་རེ་གཏོང་བར་ཡང་རང་རྒྱལ་གཞན་ཕམ་གྱི་བསམ་བློའི་ཐབས་ཇུས་འདིང་དགོས། ལག་ཁྱི་དང་པོ་བཙུགས་པ་ནས་མཇུག་བར་མཐར་འཁྱོལ་བྱུང་ན། ཤོ་ལ་ཐོན་པ་ཞེས་རྒྱལ་བར་བརྩི་སྲོལ་ཡོད། ཤོ་རྒྱག་སྐབས་ད་དུང་ཤོ་ཕོར་སྐོར་བའི་ལག་པའི་སྟངས་སྟབས་དང་བསྟུན་ནས་ཤོ་མིག་སོ་སོའི་ཐ་སྙད་ཀྱི་སྒྲ་དང་ཡོངས་སུ་མཚུངས་པའམ་ཟུར་ཙམ་འདྲ་བའི་འཚོ་བ་དངོས་ཀྱི་བྱ་དངོས་སྣ་ཚོགས་ཟུང་དུ་སྦྲེལ་ཏེ་གསར་རྩོམ་བྱས་པའི་ཚིག་དུམ་གོ་བདེ་ལ་དོན་ཟབ་པ། ཚིག་སྙན་ལ་བརྗོད་བྱ་བདེ་བ། ཟུར་ཟ་དང་དགོད་བྲོའི་རྣམ་པས་ཕྱུག་པའི་ཤོ་བཤད་རྒྱག་གི་ཡོད། བོད་ཀྱི་ཡུལ་གྲུ་གང་དུ་ཕྱིན་ཀྱང་རྩེད་མོ་དེ་རྩེད་མཁན་ཕལ་ཆེ་བ་སྐྱེས་པ་རེད། ཤོ་བཤད་ལ་ཤོ་མིག་གི་སྒོ་ནས་ཕྱེ་ན་ཤོ་མིག་རྐྱང་པ་དང་འདྲེས་མའི་ཤོ་བཤད་དང་། དམིགས་ཡུལ་མི་འདྲ་བའི་ངོས་ནས་ཕྱེ་ན་ཤོ་ཕོར་ལག་ཏུ་འཁྱེར་བ་ནས་ཁ་མ་ཕྱེ་གོང་སྐྱོར་བའི་རེ་སྨོན་མཚོན་བྱེད། ཤོ་ཕོར་ཁ་འབྱེད་སྐབས་རང་ལ་དགོས་པའི་ཤོ་བབས་ཡོད་པ་ཤེས་འཕྲལ་བརྗོད་པའི་སྤོབས་སེམས་མཚོན་བྱེད། ལ་མ་ཐོན་སྔོན་ནས་ཤོ་སྐོར་དེ་རང་རྒྱལ་སོང་སྙམ་ནས་ངག་ཏུ་འདྲེན་པའི་སྤོབས་སེམས་མཚོན་བྱེད་བཅས་ཁག་གསུམ་ཙམ་ཡོད། གལ་སྲིད་ཤོ་བཤད་དེ་ཙམ་མི་ཤེས་ཚེ་མི་སུ་འདྲ་ཞིག་ཡིན་རུང་ཤོ་གྲལ་དུ་ཚུད་དཀའ་བ་མ་ཟད། མཐར་ཚུད་ཀྱང་ལྐུགས་པས་ལྷ་མཐོང་བ་བཞིན་མི་གཞན་གྱི་ཁ་ལ་བལྟས་ནས་སྡོད་རྒྱུ་ལས་རྩེད་འཇོའི་སྤྲོ་སྣང་འཕེལ་ཐུབ་ཀྱི་མེད། ༼ བོད་ལྗོངས་ཉིན་རེའི་ཚགས་པར་ལས་དྲངས། ༽