༄༅།།བློ་བཟང་རྒྱལ་མཚན་གྱིས་ནག་ཆུ་ས་ཁུལ་ནུབ་རྒྱུད་ཀྱི་རྫོང་བཞི་དང་ནག་ཆུ་རྫོང་དུ་
བརྟག་ཞིབ་གནང་བ།

    མི་དམངས་དྲ་བའི་འཕྲིན། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱལ་མཚན་གྱིས་ཟླ་11ཚེས་10ཉིན་ནས་11ཉིན་བར་ནག་ཆུ་ས་ཁུལ་ནུབ་རྒྱུད་ཀྱི་རྫོང་དང་ཤང་དུ་བརྟག་ཞིབ་གནང་བར་ཕེབས་རིང་རང་སྐྱོང་ལྗོངས་ཏང་ཨུད་དང་སྲིད་གཞུང་དང་ཧྲུའུ་ཅི་ཁྲེན་ཆོན་གོའི་ཚབ་ཞུས་ཏེ་ནག་ཆུ་ས་ཁུལ་གྱི་མི་རིགས་ཁག་གི་ལས་བྱེད་པ་དང་མང་ཚོགས་ལ་བྱམས་བརྩེའི་འཚམས་འདྲི་དང་འབྲེལ་གཞི་རིམ་གྱི་མངོན་གསལ་དོད་པའི་དཀའ་ངལ་དང་གནད་དོན་སེལ་རྒྱུར་མཛུབ་སྟོན་ཡང་གནང་བ་རེད།
      ཚེས་10ཉིན་གྱི་སྔ་དྲོ་བློ་བཟང་རྒྱལ་མཚན་དང་བཅས་པས་ལྷ་ས་ནས་རླངས་འཁོར་ལ་ཞུགས་ཏེ་རྒྱལ་ཁབ་རིམ་པའི་མཛེས་ལྗོངས་ཁུལ་གནམ་མཚོར་ཕེབས་ནས་དེ་གའི་ཡུལ་སྐོར་ཐོན་ལས་གཞན་སྒྱུར་རིམ་སྤོར་བྱས་ཚུལ་ལ་ཐུགས་སྣང་ཆེན་པོ་གནང་སྟེ་གནམ་མཚོའི་འགྲམ་གྱི་མཛེས་ལྗོངས་ཁུལ་གྱི་འཆར་འགོད་དང་འགྲིམ་འགྲུལ་གནས་ཚུལ་ལ་མཁྱེན་རྟོགས་ཞིབ་ཕྲ་གནང་ཞིང་།ཁོང་གིས་གཞན་སྒྱུར་རིམ་སྤོར་བྱ་རྒྱུ་ནི་རང་ལྗོངས་ཀྱི་ཡུལ་སྐོར་ལས་རིགས་རྒྱ་སྟོབས་ཆེ་རུ་དང་ཞིབ་ཚགས་སུ་གཏོང་རྒྱུར་ངེས་པར་དུ་བསྐྱོད་དགོས་པའི་ལམ་ཞིག་ཡིན་པས་གནམ་མཚོའི་མཛེས་ལྗོངས་ཁུལ་འཕེལ་རྒྱས་གཏོང་བར་རྩེར་སོན་དང་།སྤུས་རྟགས།ཁྱད་ལྡན་བཅས་ཡོང་བ་བྱ་རྒྱུ་མཐའ་འཁྱོངས་ཀྱིས་ཡུལ་སྐོར་དང་།མཛེས་ལྗོངས་ཁུལ།སྤུས་རྟགས་བཅས་ཆེན་པོ་ཡོང་བའི་འཕེལ་རྒྱས་ཀྱི་འགྲོ་ལམ་ཐོག་བསྐྱོད་དེ་A5རིམ་པའི་རྒྱལ་ཁབ་ཡུལ་སྐོར་མཛེས་ལྗོངས་ཁུལ་གཏོད་དགོས་ཞེས་གསུངས།
      ཚེས་10ཉིན་གྱི་ཉིན་དགུང་བློ་བཟང་རྒྱལ་མཚན་དཔལ་མགོན་རྫོང་ཕྱིང་ལུང་ཤང་དུ་ཕེབས་ནས་དེ་གའི་སློབ་གྲྭ་དང་།སྨན་ཁང་།ཉེན་རྟོག་ཞབས་ཞུའི་ས་ཚིགས།ཤང་དང་གྲོང་རྡལ་གྱི་གཞི་རིམ་སྲིད་དབང་བཅས་འཛུགས་སྐྱོང་གི་གནས་ཚུལ་ལ་གཟིགས་པ་དང་།དེ་ནས་དཔལ་མགོན་རྫོང་སློབ་ཆུང་དང་།རྫོང་མི་དམངས་སྨན་ཁང་།སྨན་རྩིས་ཁང་།རྒན་གསོ་ཁང་བཅས་ལ་ཕེབས་ཤིང་།ཁོང་གིས་གཞི་རིམ་གྱི་ཞིང་འབྲོག་པ་དང་འབྲེལ་བ་དམ་ཟབ་ཡོད་པའི་དངོས་ཡོད་ཀྱི་ཁེ་ཕན་གནད་དོན་ཡིན་ཕྱིན་ང་ཚོས་ཞིབ་འཇུག་ནན་ཏན་བྱས་ནས་ཆོད་སེམས་བརྟན་པོ་དང་།སེམས་ནུས་ཆེན་པོ།ནུས་ཤུགས་གང་ཡོད་བཅས་ཀྱིས་ཐག་གཅོད་ནན་ཏན་བྱ་རྒྱུ་ཡིན་ཞེས་གསུངས།
      ཚེས་11ཉིན་གྱི་སྔ་དྲོར།བློ་བཟང་རྒྱལ་མཚན་ཤན་རྩ་རྫོང་འཕྲོད་བསྟེན་ཞབས་ཞུའི་ལྟེ་གནས་སུ་ཕེབས་ཤིང་།ལྟེ་གནས་དེ་ནི་མི་དམངས་སྨན་ཁང་དང་།སྨན་རྩིས་ཁང་།མ་བུ་འཕྲོད་སྦྱོར་བདེ་སྲུང་ཁང་།ནད་ཡམས་སྔོན་འགོག་ཚོད་འཛིན་ལྟེ་གནས་བཅས་བཞི་ལས་གྲུབ་པའི་ཕྱོགས་བསྡུས་ཀྱི་གཞི་རིམ་གྱི་འཕྲོད་བསྟེན་ཞབས་ཞུའི་སྒྲིག་གཞི་ཞིག་ཡིན།བློ་བཟང་རྒྱལ་མཚན་གྱིས་ལྟེ་གནས་དེའི་སྡེ་ཁག་སོ་སོར་ཕེབས་ནས་སྨན་ཁང་ཚད་གཞི་ལྡན་པར་འཛུགས་སྐྲུན་དང་།སྨན་བཅོས་ཞབས་ཞུ།ཤེས་ལྡན་པ་བཀོད་གཏོང་སོགས་ཀྱི་གནས་ཚུལ་ལ་མཁྱེན་རྟོགས་ཞིབ་ཕྲ་གནང་བ་མ་ཟད།སྨན་དང་སྨན་པ་དཀོན་པ་སོགས་ཀྱི་གནད་དོན་ཡོད་མེད་ཀྱང་འདྲི་རྟོགས་གནང་ཞིང་།ཁོང་གིས་རྫོང་ཁུལ་གྱི་སྨན་བཅོས་ཐོན་ཁུངས་མཉམ་དུ་བསྒྲིལ་བ་དེས་སྨན་བཅོས་ཀྱི་སྟོབས་ཤུགས་བསྡུ་སྒྲིལ་དང་།སྨན་བཅོས་ཞབས་ཞུའི་སྒྲིག་གཞིའི་རྨང་གཞིའི་ནུས་པ་འདོན་སྤེལ།ཞིང་འབྲོག་པར་སྨན་བཅོས་ཞབས་ཞུ་སྔར་ལས་ཡག་པ་དང་སྟབས་བདེ་ཡོང་བ་བཅས་བྱ་རྒྱུར་ཕན་ཐོགས་ཡོད་ཅེས་གསུངས།དེ་ནས་བློ་བཟང་རྒྱལ་མཚན་ཤན་རྩའི་ཆ་ཚང་སློབ་ཆུང་གཉིས་པར་ཕེབས་ཏེ་དེ་གའི་འབྲོག་ཁུལ་གྱི་གཞི་རིམ་སློབ་གསོའི་འཕེལ་ཚུལ་དང་དགེ་སློབ་ཀྱི་འཚོ་བའི་གནས་ཚུལ་ལ་མཁྱེན་རྟོགས་ཞིབ་ཕྲ་གནང་ཞིང་།ཁོང་གིས་ལོ་བརྒྱའི་ཇུས་ཆེན་གྱི་རྩ་བ་སློབ་གསོར་ཐུག་པས་འབྲོག་ཁུལ་གྱི་ལས་དོན་ལེགས་པར་བསྒྲུབས་པར་དང་ཐོག་སློབ་གསོ་སྔོན་ལ་འཕེལ་རྒྱས་དང་།སློབ་གྲྭ་སྔོན་ལ་འཛུགས་སྐྲུན།ཕྲུ་གུར་སྔོན་ལ་སློབ་གསོ་ཐོབ་པ་བྱེད་དགོས་ཞེས་གསུངས།དེ་རྗེས་བློ་བཟང་རྒྱལ་མཚན་གྱིས་ཤན་རྩ་རྫོང་གི་རྒན་གསོ་ཁང་གི་མི་ཧྲེང་རྒན་རྒོན་དང་།ལམ་སྐྱོང་དུམ་བུའི་ལམ་བཟོ་བར་ཡང་གཟིགས་པ་དང་འཚམས་འདྲི་གནང་བ་རེད།