༄༅།།བོད་ལྗོངས་སུ་ས་ག་ཟླ་བའི་དུས་ཆེན་ཐོན་པ།

     ཟླ་5ཚེས་19ཉིན་ནི་བོད་རྩིས་ཀྱི་ཟླ་4ཚེས་1ཉིན་ཡིན་པ་དང་། ཉིན་འདི་ནི་བོད་ཀྱི་དུས་ཆེན་ས་ག་ཟླ་བའི་ཉིན་དང་པོ་རེད། བོད་རྩིས་སུ་ཟླ་བཞི་པར་ས་ག་ཟླ་བ་ཟེར་ཞིང་། ཟླ་འདིའི་ནང་རང་ཅག་གི་སྟོན་པ་སངས་རྒྱས་ཤཱཀྱ་ཐུབ་པ་སྐུ་འཁྲུངས་པ་དང་། སངས་རྒྱས་པ། མྱ་ངན་ལས་འདས་པ་གསུམ་འཛོམས་པའི་ཟླ་བ་ཞིག་ཡིན། བོད་བརྒྱུད་ནང་བསྟན་གྱི་དད་ལྡན་མང་ཚོགས་ཀྱིས་ཟླ་འདིའི་ནང་རྣམ་དཀར་གྱི་ལས་བསྒྲུབ་ན་བྱིན་བརླབས་དང་ཕན་ཡོན་ཆེ་བར་སྙམ་པས། ཁོང་ཚོ་སྔ་མོ་ནས་ལངས་ཏེ་བསྐོར་བ་བྱེད་པ་དང་། མཆོད་མཇལ་ལ་འགྲོ་བ། རྣམ་དཀར་གྱི་ལས་སོགས་བསྒྲུབ། དགོན་སྡེ་ཁག་གིས་ཀྱང་སྨོན་ལམ་འཚོགས་པ་རེད།