༄༅།།2014ལོར་བོད་ལྗོངས་ཀྱིས་ཀྲུང་དབྱང་གི་གཏན་འབེབས་དོན་ཚན་བརྒྱད་དང་
འགལ་བའི་མི་138ལ་ཏང་སྲིད་སྒྲིག་ལམ་གྱི་ཆད་པ་བཅད་པ།

     མི་དམངས་དྲ་བའི་འཕྲིན། སྤྱི་ཟླ་1ཚེས་27ཉིན་བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་2014ལོའི་ལྗོངས་ཡོངས་ཀྱི་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ཀྱི་གྲུབ་འབྲས་ཡོངས་བསྒྲགས་བྱས་པ་ལྟར་ན། 2014ལོར་བོད་ལྗོངས་ཀྱི་རིམ་ཁག་སྒྲིག་ཁྲིམས་ཞིབ་བཤེར་དང་ལྟ་ཞིབ་ལས་ཁུངས་ཀྱིས་འབྲེལ་ཡོད་སྡེ་ཚན་དང་མཉམ་དུ་གཞི་ཁྱོན་ཆེ་བའི་མངོན་བཤེར་ལྐོག་ཞིབ་བྱས་ནས་གཞུང་དངུལ་སྤྱད་དེ་བཟའ་བཏུང་དང་། ལག་རྟགས་སྤྲོད་པ། ཡུལ་སྐོར་དུ་སྐྱོད་པ་སོགས་ཀྱི་སྒྲིག་འགལ་ཁྲིམས་འགལ་གྱི་གནད་དོན་ཞིབ་བཤེར་ཐག་གཅོད་ནན་པོ་བྱས་ཤིང་། ལོ་འཁོར་མོར་ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དང་འགལ་བའི་གནད་དོན་201ཞིབ་བཤེར་ཐག་གཅོད་བྱས་པ་དང་མི་240ཐག་གཅོད་བྱས་པ་དེའི་ནང་ནས་མི་138ལ་ཏང་སྲིད་སྒྲིག་ལམ་གྱི་ཆད་པ་བཅད་པ་རེད།
     རུལ་སུངས་ལ་ཆད་པ་གཅོད་པའི་ཐད་བོད་རང་སྐྱོང་ལྗོངས་ཀྱིས་རུལ་སུངས་ལ་ཆད་པ་གཅོད་རྒྱུར“བཀག་སྡོམ་ཁུལ”མེད་པ་བྱ་རྒྱུ་མཐའ་འཁྱོངས་ཀྱིས་རུལ་སུངས་ཡོད་ཕྱིན་ངེས་པར་དུ་ཆད་པ་ནན་པོ་གཅོད་པ་དང་ལྐོག་ཟ་བྱས་ཕྱིན་རྡུང་རྡེག་ཚ་ནན་བཏང་ཞིང་། ལྷ་ས་གྲོང་ཁྱེར་དཔལ་འབྱོར་ལག་རྩལ་གསར་སྤེལ་ཁུལ་གྱི་དེ་སྔའི་ཏང་གི་ལས་དོན་ཨུ་ཡོན་ལྷན་ཁང་གི་ཧྲུའུ་ཅི་དང་ཀྲུའུ་རེན་གཞོན་པ་ཧོང་ཡུས་ཐེན་གྱི་སྒྲིག་འགལ་གྱི་གྱོད་གཞི་ཚབས་ཆེན་དང་། རང་སྐྱོང་ལྗོངས་བཟོ་ལས་དང་ཆ་འཕྲིན་ཅན་ཐིང་གི་དེ་སྔའི་སྐོར་གཟིགས་པ་གཞོན་པ་ཀྲུའུ་ཐའེ་ཀྲུང་གི་སྒྲིག་འགལ་གྱི་གྱོད་གཞི་ཚབས་ཆེན། བོད་རང་སྐྱོང་ལྗོངས་ཚྭ་ལས་སྤྱི་ཁྱབ་ཀུང་སིའི་དེ་སྔའི་སྤྱི་ཁྱབ་ཅིང་ལི་ཁྲེང་རུན་ཧྲེ་ཡི་སྒྲིག་འགལ་ཁྲིམས་འགལ་གྱི་གྱོད་གཞི་བཅས་ཞིབ་བཤེར་ཐག་གཅོད་ནན་པོ་བྱས་ཡོད། གྲོང་གསེབ་ཀྱི་ལས་བྱེད་པའི་སྒྲིག་འགལ་གྱི་གནད་དོན་གོང་ཞུ་བྱས་པར་གཅིག་སྡུད་ཐོག་བསྐྱར་ཞིབ་བྱས་ནས་མི་52ལ་ཏང་སྲིད་སྒྲིག་ལམ་གྱི་ཆད་པ་བཅད་པ་རེད།
      གཞན་ཡང་། མང་ཚོགས་ལ་བསམ་འཆར་ཆེན་པོ་ཡོད་པའི་མངོན་གསལ་དོད་པའི་གནད་དོན་ཡང་བཅོས་སྒྲིག་བྱེད་ཤུགས་ཆེ་རུ་བཏང་ཞིང་། ལོ་གཅིག་རིང་རིམ་ཁག་སྒྲིག་བཤེར་དང་ལྟ་ཞིབ་ལས་ཁུངས་ཀྱིས་སྔ་རྗེས་སུ“གཞུང་གྲོན་གསུམ”དོ་དམ་དང་བེད་སྤྱོད་བྱས་ཚུལ་ལ་ཆེད་དོན་ཞིབ་བཤེར་བྱས་ནས་སྒྲིག་འགལ་དངུལ་སྒོར་ཁྲི་6043འདེད་ལེན་བྱས་པ་དང་། དམངས་ཕན་མ་དངུལ་ལྐོག་ཟ་དང་། གཡོ་ལེན། སྒེར་སྤྱོད་སོགས་སྒྲིག་འགལ་གྱི་གནད་དོན་གྱོད་དོན་ཐོ་འགོད་དང་བརྟག་དཔྱད་བྱས་ཏེ་མི་8ལ་ཏང་སྲིད་སྒྲིག་ལམ་གྱི་ཆད་པ་བཅད་པ། གཞུང་འཁོར་སྒེར་སྤྱོད་ཀྱི་བྱེད་སྤྱོད་ཁག་295བཅོས་སྒྲིག་བྱས་པ། གྲངས་ཚད་དང་ཚད་གཞི་ལས་བརྒལ་བའི་རླངས་འཁོར་18བསྡུས་པ་བཅས་རེད།