༄༅།།2014ལོའི་རྒྱལ་ཡོངས་མི་རིགས་སྐད་ཡིག་ལས་དོན་གྱི་ཡུལ་དངོས་ཚོགས་འདུ་
ཀུའེ་ཀྲོའུ་ཞིང་ཆེན་དུ་འཚོགས་པ།

    མི་དམངས་དྲ་བའི་འཕྲིན། ཟླ10པའི་ཚེས28ཉིན་ནས་ཚེས30ཉིན་བར། རྒྱལ་ཡོངས་ཀྱི་མི་རིགས་སྐད་ཡིག་ལས་དོན་གྱི་ཡུལ་དངོས་ཚོགས་འདུ་དེ་ཀུའེ་ཀྲོའུ་ཞིང་ཆེན་དུ་འཚོགས། ཚོགས་འདུའི་ནང་དོན་གཙོ་བོ་ནི། གཅིག་ནས་ཏང་གི་སྐབས་བཅོ་བརྒྱད་པའི་ཚང་འཛོམས་གྲོས་ཚོགས་ཐེངས་གསུམ་པ་དང་ཐེངས་བཞི་བའི་དགོངས་དོན་དང་། ཀྲུང་དབྱང་གི་མི་རིགས་ལས་དོན་དང་འབྲེལ་བའི་ཚོགས་འདུ་ཁག་ཅིག་དང་ཡིག་ཆ། གསུངས་བཤད་བཅས་ཀྱི་དགོངས་དོན་སློབ་སྦྱོང་དང་ལག་བསྟར་བྱེད་པ། གཉིས་ནས་མི་རིགས་སྐད་ཡིག་ལས་དོན་གྱི་གནས་ཚུལ་སྤྱི་བསྡོམས་དང་བགྲོ་གླེང་བྱས་ཐོག ཀུའེ་ཀྲོའུ་ཞིང་ཆེན་གྱི་སྐད་གཉིས་ཀྱི་འཆམ་མཐུན་དང་མི་རིགས་མཐུན་སྒྲིལ་ལ་བསྐུལ་བ་ཞེས་པའི་བྱ་བའི་ཉམས་མྱོང་སློབ་སྦྱོང་དང་ཁྱབ་གདལ་དུ་གཏོང་བ། གསུམ་ནས་རྗེས་མའི་དུས་ཡུན་གཅིག་རིང་གི་མི་རིགས་སྐད་ཡིག་ལས་དོན་ལ་ཞིབ་འཇུག་དང་བཀོད་སྒྲིག་བྱེད་པ་བཅས་རེད། ཚོགས་འདུའི་སྟེང་ནང་སོག་དང་པེ་ཅིང་། ཧེ་ལུང་ཅང་། ཀོང་ཞི། ཀན་སུའུ། ཡུན་ནན། བོད་ལྗོངས། མཚོ་སྔོན། ཞིན་ཅང་སོགས་ནས་ཡོང་བའི་འབྲེལ་ཡོད་མི་སྣ120ལྷག་ཞུགས་ཡོད་པ་རེད།