༄༅།།ཕ་ཡུལ་ནི་ཡུལ་སྨད་ཡིན་ལ་རྒྱལ་ཁབ་ནི་ཀྲུང་གོ་ཡིན།

     མི་དམངས་དྲ་བའི་འཕྲིན། ད་ལོའི་ཚོགས་ཆེན་གཉིས་ལ་ཞུགས་པའི་འཐུས་མི་ཡི་ཁྲོད་དུ། མི་གཅིག་ནི་ཧ་ཅང་དམིགས་བསལ་ཅན་ཞིག་རེད། ཁོ་མོའི་མིང་ལ་སྒྲོན་དཀར་ཟེར་ཞིང་། མི་རིགས་ནི་བོད་རེད། ད་ལོར་ལོ་57ཡིན་ལ། ཕ་ཡུལ་ནི་བོད་ལྗོངས་ལྷོ་ཁ་གྲོང་ཁྱེར་ལྷུན་རྩེ་རྫོང་གི་ཡུལ་སྨད་ཤང་དུ་ཡོད་པ་རེད། 
     2017ལོའི་ཟླ་10ཚེས་28ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁོ་མོ་དང་གཅུང་མོ་གཡང་འཛོམས་གཉིས་ལ་འཕྲིན་ལན་བསྐུར་གནང་ཞིང་། འཕྲིན་ལན་དུ་སྤྱི་ཁྱབ་ཧྲུའུ་ཅི་ཡིས་ཁོང་ཚོ་ཕ་དང་བུ་མོ་མི་རབས་གཉིས་ཀྱིས་རྒྱལ་ཁབ་ཀྱི་མཐའ་མཚམས་སྲུང་པའི་བྱ་སྤྱོད་ལ་ཁག་ཐེག་བྱས་པ་མ་ཟད། ཁོང་ཚོ་ལ་བླ་མེད་ཀྱི་གུས་པ་དང་ལྷད་མེད་ཀྱི་བཀའ་དྲིན་ཆེ་ཞུས་གནང་བ་རེད།
     ཡུལ་སྨད་ཤང་ནི་བོད་རང་སྐྱོང་ལྗོངས་ཀྱི་ལྷོ་རྒྱུད་ན་ཡོད་ལ། དུས་བཞིར་གངས་ཀྱིས་གཡོགས་པའི་རི་བོ་ཧི་མ་ལ་ཡ་བརྒལ་བ་ན། ད་གཟོད་གངས་དང་གདོད་མའི་ནགས་ཚལ་གྱིས་བསྐོར་བའི་གྲོང་གསེབ་དེ་མཐོང་ཐུབ།
     ཡུལ་སྨད་ཤང་ནི་ཀྲུང་གོའི་མི་གྲངས་ཆེས་ཉུང་བའི་ཤང་ཞིག་ཡིན་ལ། སྔར་ཆད་འདི་ན་ཨ་ཕ་སངས་རྒྱས་ཆོས་དཔལ་དང་། སྒྲོན་དཀར་གཅེན་གཅུང་བཅས་ཁྱིམ་མི་གསུམ་པོ་བསྡད་ཡོད་པ་རེད། འདི་ནི་རང་རྒྱལ་གྱི་མི་གྲངས་ཆ་བགོས་ཀྱི་རྒྱ་ཁྱོན་ཆེས་ཆེ་བའི་ཤང་ཞིག་ཀྱང་ཡིན་ལ། རྒྱ་ཁྱོན་ནི་སྤྱི་ལེ་གྲུ་བཞི་མ་3644ཟིན་པས། ཧྲང་ཧའེ་གྲོང་ཁྱེར་གྱི་ཕྱེད་ཀ་ཙམ་ཡོད་པ་རེད།
     སྒྲོན་དཀར་དང་གཡང་འཛོམས་ཁྱིམ་ཚང་གིས་ཚེ་སྲོག་གི་ཉེན་ཁ་ལ་མ་འཛེམ་པར་མེས་རྒྱལ་གྱི་ས་ཆ་འདི་འདྲའི་ཆེན་པོ་ཞིག་སྲུང་ནས་བསྡད་ཡོད་པ་རེད།
དུས་རབས་སྔ་མའི་ལོ་རབས་50ཡི་མཇུག་ནས་ད་ལྟ་བར་དུ། ཁོང་ཚོ་ཁྱིམ་མི་ཚང་མ་ཡུལ་སྨད་ཤང་དུ་བསྡད་ཡོད་ལ། འཚོ་གནས་ཀྱི་ཆ་རྐྱེན་ཞན་ན་ཡང་། ཁྱིམ་མི་ཚང་མས་ལོ་ངོ་50ལྷག་ལ་བརྟན་སྲུང་བྱས་ཡོད་ལ། མེས་རྒྱལ་གྱི་ས་ཆ་འདི་དང་ས་ཆ་འདི་ཡི་རྩྭ་དང་རྩི་ཤིང་རྐང་རེ་ཚང་མ་བསྲུངས་ཡོད་པ་རེད། 
     མི་དམངས་ཉིན་རེའི་ཚགས་པར་ཕྱི་རྒྱལ་ལ་ཕྱོགས་པའི་པར་ངོས་ཁོངས་གཏོགས་ཀྱི"ཀྲུང་གོའི་གཏམ་རྒྱུད་ལས་སྒྲུབ་ཁང"དང"སློབ་སྦྱོང་ཚོགས་ཆུང" "བདེན་འཛིན་དཔའ་བོའི་གླིང་ཕྲན"བཅས་གསུམ་གྱིས་བསྒྲིགས་པའི་གློག་བརྙན་ཐུང་ངུ་《ཕ་ཡུལ་ནི་ཡུལ་སྨད་ཡིན་ལ་རྒྱལ་ཁབ་ནི་ཀྲུང་གོ་ཡིན་》ཞེས་པ་ལས་སྒྲོན་དཀར་ཚང་གི་མི་སེམས་འགུལ་བའི་གཏམ་རྒྱུད་བརྗོད་ཡོད་པ་རེད།