༄༅།།མཚོ་སྔོན་ཡོངས་ཀྱི་མཐོ་རྒྱུགས་ཁྲོད་བོད་ཡིག་རྩིས་ཚན་སྐོར་གྱི་ཨང་དང་པོར་བྱ་དགའ་གནང་
བའི་མཛད་སྒོ་བསྡུས་པ།

      མི་དམངས་དྲ་བའི་འཕྲིན། སྤྱི་ཟླ་6ཚེས་30ཉིན། མཚོ་སྔོན་ཞིང་ཆེན་མཚོ་ལྷོ་ཁུལ་མི་རིགས་མཐོ་འབྲིང་དང་པོས་2016ལོའི་ཞིང་ཆེན་ཡོངས་ཀྱི་མཐོ་རྒྱུགས་ཁྲོད་བོད་ཡིག་རྩིས་ཚན་སྐོར་གྱི་རྒྱུགས་འབྲས་ཨང་དང་པོའི་སློབ་མར་བྱ་དགའ་གནང་བའི་མཛད་སྒོ་བསྡུས་ཤིང་། ཁུལ་སློབ་གསོ་ཅུའུ་དང་སློབ་གྲྭའི་དགེ་སློབ་ཀུན་མཛད་སྒོར་ཞུགས། མཚོ་ལྷོ་ཁུལ་མི་རིགས་མཐོ་འབྲིང་དང་པོའི་2016ལོའི་ཞིང་ཆེན་ཡོངས་ཀྱི་མཐོ་རྒྱུགས་ཁྲོད་བོད་ཡིག་རྩིས་ཚན་སྐོར་གྱི་རྒྱུགས་འབྲས་ཨང་དང་པོ་ལེན་མཁན་སློབ་མ་རྡོ་རྗེ་སྐྱིད་(ཆུང་བ)ཀྱི་སྐར་གྲངས་535དང་། ཨང་བཞི་བ་ལེན་མཁན་རྡོ་རྗེ་སྐྱིད་(ཆེ་བ)ཀྱི་སྐར་གྲངས་510། ཨང་བདུན་པ་ལེན་མཁན་རྟ་མགྲིན་རྒྱལ་གྱི་སྐར་གྲངས་499།  ཨང་བརྒྱད་པ་ལེན་མཁན་དཔལ་ཆེན་གྱི་སྐར་གྲངས་497། ཨང་དགུ་བ་ལེན་མཁན་ཨོ་རྒྱན་ཚེ་རིང་གི་སྐར་གྲངས་496བཅས་ཡིན། དེར་མ་ཟད་སློབ་གྲོགས་དབང་ཆེན་རྒྱལ་དང་འཕགས་མོ་སྒྲོལ་མ། ལྷ་མོ་ཚེ་བརྟན་བཅས་ཀྱིས་འདྲ་མཉམ་ཨང་བཅུ་གཅིག་པ་སྟེ་སྐར་གྲངས484བླངས་པ་རེད།
      ཐོག་མར་མཚོ་ལྷོ་ཁུལ་སློབ་གསོ་ཅུའི་འགོ་ཁྲིད་དང་སློབ་གཙོས་གསུང་བཤད་གནང་རྗེས། 2016ལོའི་མཐོ་རྒྱུགས་ཁྲོད་བོད་ཡིག་རྩིས་ཚན་ཐད་རྒྱུགས་འབྲས་གཡུར་དུ་ཟ་བའི་སློབ་མ་རྣམས་ལ་བྱ་དགའ་གནང་བ་སྟེ། ཨང་དང་པོར་བྱ་དགའ་སྒོར་10000དང་། ཨང་བཞི་བ་དང་བདུན་པ། བརྒྱད་པ། དགུ་བ་བཅས་སོ་སོར་སྒོར་2000རེ་གནང།
     དེར་མཐུད་དེ་བོད་ཡིག་རྩིས་ཚན་གྱི་རྒྱུགས་འབྲས་ལེགས་པའི་སློབ་མ་འདི་དག་གིས་གུས་ཤིང་བརྩེ་བའི་དགེ་རྒན་རྣམས་ལ་དྲིན་ཆེ་བའི་ཁ་བཏགས་ཕུལ་རྗེས། སློབ་མ་རྡོ་རྗེ་སྐྱིད་ཀྱིས་ཁོ་ཚོའི་ཚབ་བྱས་ཏེ་སློབ་སྦྱོང་གི་མྱོང་ཚོར་དང་། དགེ་རྒན་དང་སློབ་གྲྭར་བཀའ་དྲིན་ཆེ་བར་བརྗོད་ཅིང་། རྗེས་ཕྱོགས་ཀྱང་མུ་མཐུད་དུ་སློབ་སྦྱོང་དང་ཕྱོགས་གང་ཐད་ནས་འབད་པ་ཆེར་བསྐྱེད་བྱ་རྒྱུ་ཡིན་པ་བསྟན།
      རྒྱུས་ལོན་པ་ལྟར་ན། རྡོ་རྗེ་སྐྱིད་ནི་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོ་ནས་མཐར་ཕྱིན་ཞིང་ཕ་ཡུལ་མཚོ་ལྷོ་ཁུལ་མང་རྫོང་རེད། མོ་ནི་ཆུང་དུས་ནས་སློབ་སྦྱོང་སོགས་གང་ཅིའི་ཐད་ནས་ནན་ཏན་ཅན་ཞིག་ཡིན་ཞིང་། སློབ་སྦྱོང་ཐད་ནས་སྔོན་སྦྱོང་དང་། སློབ་ཁྲིད་དངོས། བསྐྱར་སྦྱོང་བཅས་ལ་ཏན་ཏིག་བྱེད་པ་དང་། རྒན་བཀུར་སློབ་བྱམས་ཀྱི་སློབ་བུ་བཟང་བོ་ཞིག་རེད།
     མཚོ་ལྷོ་ཁུལ་མི་རིགས་མཐོ་འབྲིང་དང་པོའི་2016ལོའི་མཐར་ཕྱིན་སློབ་མ་བསྡོམས་པས་823དང་། དེ་ལས་རིག་ཚན་སྐོར་གྱི་སློབ་མ་499དང་རྩིས་ཚན་སྐོར་གྱི་སློབ་མ་324ཡོད།
      ཞིང་ཆེན་ཡོངས་ཀྱི་མི་རིགས་སློབ་མས་མི་རིགས་སློབ་གྲྭར་རྒྱུགས་སྤྲད་པའི་རྩིས་ཚན་ཐད། རྩིས་ཚན་གྱི་དངོས་གཞི་དང་པོའི་སློབ་བསྡུའི་མི་གྲངས་17དང་སྐར་གྲངས་ཀྱི་ཚད་གཞི་ལ་ཐོན་པའི་སློབ་གྲྭ་འདིའི་སློབ་མ8དེ། སློབ་བསྡུ་མི་གྲངས་ཀྱི་47.06%ཟིན། རྩིས་ཚན་གྱི་དངོས་གཞི་གཉིས་པའི་སློབ་བསྡུའི་མི་གྲངས་252དང་སྐར་གྲངས་ཀྱི་ཚད་གཞི་ལ་ཐོན་པའི་སློབ་གྲྭ་འདིའི་སློབ་མ་114སྟེ། སློབ་བསྡུ་མི་གྲངས་ཀྱི་45.24%ཟིན། གྲ་སྒྲིག་དངོས་གཞིའི་སློབ་བསྡུ་མི་གྲངས་550དང་སྐར་གྲངས་ཀྱི་ཚད་གཞི་ལ་ཐོན་པའི་སློབ་གྲྭ་འདིའི་སློབ་མ་140སྟེ། སློབ་བསྡུ་མི་གྲངས་ཀྱི་25.45%ཟིན།
      ཞིང་ཆེན་ཡོངས་ཀྱི་མི་རིགས་སློབ་མས་མི་རིགས་སློབ་གྲྭར་རྒྱུགས་སྤྲད་པའི་རིག་ཚན་ཐད། རིག་ཚན་གྱི་དངོས་གཞི་དང་པོའི་སློབ་བསྡུའི་མི་གྲངས་25དང་སྐར་གྲངས་ཀྱི་ཚད་གཞི་ལ་ཐོན་པའི་སློབ་གྲྭ་འདིའི་སློབ་མ་3ཏེ། སློབ་བསྡུ་མི་གྲངས་ཀྱི་12%ཟིན། རིག་ཚན་གྱི་དངོས་གཞི་གཉིས་པའི་སློབ་བསྡུའི་མི་གྲངས་262དང་སྐར་གྲངས་ཀྱི་ཚད་གཞི་ལ་ཐོན་པའི་སློབ་གྲྭ་འདིའི་སློབ་མ་127སྟེ། སློབ་བསྡུ་མི་གྲངས་ཀྱི་48.47%ཟིན། གྲ་སྒྲིག་དངོས་གཞིའི་སློབ་བསྡུ་མི་གྲངས་200དང་སྐར་གྲངས་ཀྱི་ཚད་གཞི་ལ་ཐོན་པའི་སློབ་གྲྭ་འདིའི་སློབ་མ་43ཏེ། སློབ་བསྡུ་མི་གྲངས་ཀྱི་21.5%ཟིན།
      མི་རིགས་སློབ་མས་རྒྱའི་སློབ་གྲྭར་རྒྱུགས་སྤྲོད་རྩིས་རྒྱག་ལྟར་ན། རིག་ཚན་དང་རྩིས་ཚན་གཉིས་ཀྱི་སྐར་གྲངས་ཚད་གཞི་ལ་ཐོན་ཚད་100%ཡིན། ༼ མཚོ་སྔོན་པོ་དྲ་བ་ལས་དྲངས། ༽