༄༅།།ལི་ཁེ་ཆང་གིས་ཨུ་རུ་སུར་རྒྱལ་དོན་འཚམས་འདྲི་གནང་འགོ་ཚུགས་པ།

    མི་དམངས་དྲ་བའི་འཕྲིན། ཨུ་རུ་སུའི་ཙུང་ལི་མའེ་ཏེ་ཝའེ་ཅེ་ཧྥུའུ་ཡིས་གདན་ཞུས་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་ས་གནས་དེ་གའི་དུས་ཚོད་ཟླ་༡༠ཚེས་༡༢་ཉིན་གྱི་ཕྱི་དྲོར། ཆེད་སྤྱོད་གནམ་གྲུར་བཞུགས་ཏེ་མའོ་སི་ཁོ་གྲོང་ཁྱེར་དུ་འབྱོར་བ་རེད། ཨུ་རུ་སུའི་སྲིད་གཞུང་གི་མཐོ་རིམ་དཔོན་པོ་སྐོར་ཞིག་གནམ་གྲུ་ཐང་དུ་ཕེབས་ཏེ་ལི་ཁེ་ཆང་ལ་བསུ་བ་གཟབ་རྒྱས་ཞུས། 
     ལི་ཁེ་ཆང་གིས་གསུངས་དོན། ཀྲུང་ཨུའི་སྒོ་ཀུན་གྱི་འཐབ་ཇུས་མཉམ་ལས་དང་རོགས་ཟླའི་འབྲེལ་བ་དུས་རིམ་གསར་པར་སླེབས་ཡོད། བདག་གིས་ཐེངས་འདིའི་འཚམས་འདྲི་བརྒྱུད་དེ་ཀྲུང་ཨུའི་སྲོལ་རྒྱུན་མཛའ་བཤེས་གཏིང་ཇེ་ཟབ་དང་། མཉམ་ལས་རྒྱ་ཇེ་ཆེ་རུ་བཏང་སྟེ་ཕྱོགས་གཉིས་ཀྱི་འབྲེལ་བ་མུ་མཐུད་དུ་ཇེ་བཟང་ཇེ་ལེགས་སུ་གཏོང་འདོད་ཡོད།