༄༅།།ཀན་ལྷོ་བསང་ཆུའི་གནམ་གྲུ་ཐང་ནས་ཁྲེན་ཏུའུ་དང་དབྱིན་ཁྲོན་ལ་མཁའ་ལམ་གསར་
པ་གཉིས་གཏོད་རྒྱུ་ཡིན་པ།

     མི་དམངས་དྲ་བའི་འཕྲིན། གསར་འགོད་པས་འབྲེལ་ཡོད་སྡེ་ཁག་ནས་རྒྱུས་ལོན་པ་ལྟར་ན། མི་འགྱངས་བར་བསང་ཆུའི་གནམ་གྲུ་ཐང་ནས་ཁྲེན་ཏུའུ་དང་དབྱིན་ཁྲོན་ (银川) ལ་མཁའ་ལམ་གསར་པ་གཉིས་བཏོད་རྒྱུ་ཡིན་ལ། མཁའ་ལམ་འདི་གཉིས་ནས་དངོས་སུ་འཕུར་སྐྱོད་བྱ་ཐུབ་ཚེ། ཀན་ལྷོ་ཁུལ་དང་ཕྱི་རོལ་འཇིག་རྟེན་གྱི་བར་ཐག་སླར་ཡང་ཇེ་ཐུང་དུ་གཏོང་ཐུབ་ངེས་ཡིན།
     བསང་ཆུའི་གནམ་གྲུ་ཐང་བཙུགས་ནས་འཁོར་སྐྱོད་བྱས་པ་ནས་བཟུང་། ཀན་ལྷོའི་འགྲིམ་འགྲུལ་ལ་སྔ་ན་མེད་པའི་སྟབས་བདེ་བསྐྲུན་ཡོད་ཅིང་། ཚོང་དོན་བགྲོ་གླེང་དང་ཡུལ་སྐོར་སྤྲོ་གསེང་གང་ཡིན་ནའང་། ཕྱི་ནང་གི་ཡུལ་སྐོར་མགྲོན་པོ་ཕར་འགྲོ་ཚུར་འོང་བྱས་ནས། རྩྭ་ཐང་གི་མཛེས་པ་དང་ཕྱི་རོལ་གྱི་འཇིག་རྟེན་ཉམས་སུ་མྱོང་བར་འགྲུལ་བཞུད་ཀྱི་མཐུན་རྐྱེན་ལེགས་པོ་ཞིག་བསྐྲུན་ཡོད། ཀན་ལྷོ་ཁུལ་ཨུ་དང་ཁུལ་སྲིད་གཞུང་གིས་རྒྱབ་སྐྱོར་ཤུགས་ཆེན་བྱས་པར་བརྟེན་ནས། ཟླ་12ཚེས་18ཉིན་ནས་བཟུང་། སླར་ཡང་མཁའ་ལམ་གསར་པ་འདི་གཉིས་ནས་དངོས་སུ་གནམ་གྲུ་གཏོང་རྒྱུའི་འཆར་གཞི་ཡོད་པ་དེས་ཀན་ལྷོ་དང་འཛམ་གླིང་བར་གྱི་བར་ཐག་ཡང་བསྐྱུར་ཐུང་དུ་ཐེངས་ཤིག་གཏོང་རྒྱུ་རེད། 
     གསར་དུ་འཕུར་སྐྱོད་བྱེད་པའི་གནམ་གྲུའི་ཨང་གྲངས་ནི་3U8115 དང་8116ཡིན་ལ། གཟའ་འཁོར་རེར་འཕུར་ཐེངས་གསུམ་རེ་གཏན་འཁེལ་བྱས་ཡོད་དེ། སོ་སོ་ནི་གཟའ་མིག་དམར་དང་གཟའ་ཕུར་བུ། གཟའ་པ་སངས་ཉིན་འཕུར་སྐྱོད་བྱེད་རྒྱུ་ཡིན་ལ། ཞོགས་པར་ཁྲེན་ཏུའུ་ནས་འཕུར་ཏེ་བསང་ཆུའི་གནམ་གྲུ་ཐང་ནས་བབས་པ་དང་། དེ་ནས་བསང་ཆུའི་གནམ་གྲུ་ཐང་ནས་དབྱིན་ཁྲོན་ལ་འཕུར་རྒྱུ་ཡིན་པ་དང་། ཉིན་གུང་ནས་སླར་ཡང་དབྱིན་ཁྲོན་ནས་བསང་ཆུ་བརྒྱུད་དེ་ཁྲེན་ཏུའུ་ལ་ཕྱིར་འཕུར་རྒྱུ་རེད། ༼ཀན་ལྷོ་རྒྱང་སྒྲོག་བརྙན་འཕྲིན་ཁང་། ཚེ་རིང་རྡོ་རྗེས།༽