༄༅།།ཡུན་ནན་ཞིང་ཆེན་སེམས་ཀྱི་ཉི་ཟླ་གྲོང་ཁྱེར་གྱི་མ་ཎི་འཁོར་ལོ་ཆེན་པོས་ཕྱོགས་
བཞི་མཚམས་བརྒྱད་ཀྱི་མགྲོན་པོ་བཀུག་པ།

     མི་དམངས་དྲ་བའི་འཕྲིན། རྒྱ་མཚོའི་ངོས་ལས་མཐོ་ཚད་སྨི་3300ཡོད་པའི་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་སེམས་ཀྱི་ཉི་ཟླ་གྲོང་ཁྱེར་རྡོ་མཁར་གནའ་གྲོང་དུ་མཐོ་ཚད་ལ་སྨི་21དང་སྤྱིའི་ལྗིད་ཚད་ལ་ཏུན་60ཡོད་པའི་མ་ཎི་འཁོར་ལོ་ཆེན་པོ་ཞིག་ཡོད་པ་རེད། ས་གནས་དེ་གའི་ཡུལ་སྐོར་སྡེ་ཁག་གིས་མཚམས་སྦྱོར་བྱས་པ་ལྟར་ན། མ་ཎི་འཁོར་ལོ་ཆེན་པོ་དེ་ནི་ཚ་གསེར་དང་ཟངས་ལྷད་མེད་ཀྱིས་བཞེངས་པ་ཡིན་ཞིང་། འཁོར་ལོའི་ནང་དུ་གཟུངས་སྔགས་དང་མ་ཎི་ཡིག་དྲུག་ཁྲི་124དང་རིན་པོ་ཆེ་སྣ་ཚོགས་ཁྱོན་བསྡོམས་ཏུན་16སོགས་ཡོད་པས་མི་བཞི་ལྔས་མཉམ་དུ་ཤུགས་བརྒྱབ་ན་མ་གཏོགས་བསྐོར་མི་ཐུབ། ད་ལྟར་མ་ཎི་འཁོར་ལོ་ཆེན་པོ་ནི་སེམས་ཀྱི་ཉི་ཟླ་གྲོང་ཁྱེར་གྱི་ཡུལ་སྐོར་ལྗོངས་རྒྱུ་བྱ་ཡུལ་གྲགས་ཅན་དུ་གྱུར་ཏེ་ས་གནས་སོ་སོའི་ཡུལ་སྐོར་བ་ཚོ་བཀུག་ནས་ལྟ་སྐོར་བྱེད་པར་འོང་བཞིན་ཡོད།