༄༅།།མཚོ་བོད་ཀྱི་ཚན་རིག་རྟོག་ཞིབ་ཆེད་དོན་རྣམ་གྲངས་88ཀྱིས་བོད་ལྗོངས་ཀྱི་སྣོད་བཅུད་སྒྲིབ་ཡོལ་
འཛུགས་སྐྲུན་ལ་འདེགས་སྐྱོར་བྱས་པ།

   མི་དམངས་དྲ་བའི་འཕྲིན། བོད་རང་སྐྱོང་ལྗོངས་ཚན་རིག་ལག་རྩལ་ཐིང་གི་གཞི་གྲངས་ལས་མངོན་གསལ་བྱུང་བ་སྟེ། མཚོ་བོད་མཐོ་སྒང་ཕྱོགས་བསྡུས་ཚན་རིག་རྟོག་ཞིབ་ཞིབ་འཇུག་ཐེངས་གཉིས་པ་དངོས་སུ་སྤེལ་བ་ནས་བཟུང་། ཆེད་དོན་ཚན་རིག་རྟོག་ཞིབ་བྱེད་སྒོ88བོད་ལྗོངས་སུ་གཏིང་ཟབ་ཏུ་སྤེལ་ཡོད་ཅིང་། སའི་གོ་ལའི་“གླིང་སྣེ་གསུམ་པ”སྲུང་སྐྱོང་ཡག་པོ་བྱེད་པར་གཞི་གྲངས་གལ་ཆེན་བཏོན་པ་དང་ཚན་རྩལ་གྱི་འདེགས་སྐྱོར་བྱས་ཡོད། མཚོ་བོད་མཐོ་སྒང་ཕྱོགས་བསྡུས་ཚན་ཞིབ་ཐེངས་གཉིས་པ་ནི་2017ལོའི་ཟླ་8པར་ཁྱོན་ཡོངས་ནས་སྤེལ་བ་ནས་བཟུང་། ཚན་ཞིབ་ལས་དོན་མི་སྣ་ཁག་མང་པོས་མཚོ་བོད་མཐོ་སྒང་གི་ཆུ་དང་སྣོད་བཅུད། མིའི་རིགས་ཀྱི་བྱེད་སྒོ་སོགས་ཁོར་ཡུག་གནད་དོན་ཐད་ལ་ཁྱོན་ཡོངས་ནས་རྟོག་ཞིབ་ཞིབ་འཇུག་གཏིང་ཟབ་བྱས་ནས། སའི་གོ་ལའི་“གླིང་སྣེ་གསུམ་པ”སྲུང་སྐྱོང་ཡག་པོ་བྱེད་ཐུབ་ཆེད་གཞི་གྲངས་གལ་ཆེན་བཏོན་པ་དང་ཚན་རྩལ་གྱི་འདེགས་སྐྱོར་བྱས་ཡོད།
   ད་བར། ཚན་རིག་རྟོག་ཞིབ་ལས་དོན་ལ་གྲུབ་འབྲས་རབ་དང་རིམ་པ་ཐོབ་པ་སྟེ།
    --མེ་ཏོག་ནས་ཐོག་མར་བྲག་སྐྱ་ཧ་བོའི་རིགས་ཀྱི་རྩི་ཤིང་རྙེད་ཡོད།གནམ་མཚོ་ས་ཁུལ་ནས་སྐམ་པོ་ཆགས་པའི་ཤུག་པའི་སྡོང་རྐང་དང་གཞུང་རྟ་ལྷག་ལུས་ཁག་ཅིག་རྙེད་པས་རང་རྒྱལ་ཁོངས་ད་ལྟའི་བར་སྡོང་ཕྲན་ལོ་རིས་རིང་ཤོས་ཀྱི་ལོ་ཚིགས་(1479ལོ་ནས་2015ལོའི་བར།སྤྱིའི་རིང་ཚད་ལོ་537)བསྐྱར་དུ་བསྐྲུན་པ་རེད།
   --མཚོ་བོད་མཐོ་སྒང་གི་གཞི་རྒྱ་ཆེ་བའི་མཚེའུ་འཁྱགས་ཀྱི་དུས་རྟགས་དང་རླངས་འགྱུར་ཚད་ཀྱི་འབྲས་བུ་སྟེ། མཚོ་བོད་མཐོ་སྒང་གི་མཚེའུ་ལོ་རེར་རླངས་པར་འགྱུར་བའི་ཆུའི་ཐོན་ཁུངས་སྤྱིའི་གྲངས་ནི་ཕལ་ཆེར་ཏུན་དུང་ཕྱུར་517ཡིན་པ་ཐོག་མར་ཅུང་ཡང་དག་པའི་སྒོ་ནས་ཚོད་རྩིས་བྱས་ཐུབ་ཡོད།
    --གནམ་མཚོའི་ཆུའི་གཏིང་ཚད་སྨི་94.5ཟིན་པའི་དཔེ་སྒྲུག་བྱེད་སའི་ཁུང་བུ་གཅིག་ཏུ་སྨི་153.44བསྟུད་མར་འཛུལ་ཐུབ་པ་བྱུང་ནས།འཚོལ་བསྡུ་བྱེད་ཚད་96%ཟིན་པའི་སྤུས་ཚད་མཐོ་བའི་བྲག་རྡོའི་ནང་སྙིང་བླངས་ཐུབ་པ་དེས་རང་རྒྱལ་གྱི་མཚེའུ་ཡི་བྲག་རྡོའི་སྙིང་པོར་འཛུལ་བའི་འཚོལ་ཞིབ་ཐད་ཀྱི་ཟིན་ཐོ་གསར་པ་བཏོད་ཡོད་པ་རེད།
   --“ཨེ་ཤ་ཡའི་ཆུ་གསོག་མཐོ་ལྕོག”གི་འཁྱགས་རོམ་དང་། མཚེའུ། ཆུ་བོ་གཙོ་བོ་བཅས་ཀྱི་བཞུར་རྒྱུན་བསྡོམས་གྲངས་དེ་སྨི་རྒྱ་དཔངས་གྲུ་བཞི་མ་དུང་ཕྱུར་ཁྲི་9ལས་བརྒལ་ཡོད་པ་ཚོད་རྩིས་རགས་ཙམ་བྱས་ཐུབ་བྱུང་བས་རྒྱལ་ཁབ་ཀྱི་ཆུའི་ཐོན་ཁུངས་སྲུང་སྐྱོང་འཐབ་ཇུས་ལ་ཚན་རིག་དང་མཐུན་པའི་འདེགས་སྐྱོར་གལ་ཆེན་མཁོ་འདོན་བྱས་ཡོད།
   --མཚོ་བོད་ས་མཐོའི་ས་བབ་མཐོ་ཚད་སྨི་7000ཐོག་གི་རླུང་ཁམས་ཆེ་མོའི་ཡན་ལག་གྲངས་གཞི་ཐོག་མར་ཐོབ་པ་དང་། མཚོ་བོད་ས་མཐོ་ཡར་མ་འབུར་གོང་གི་སྔ་མོའི་དུས་རབས་གསུམ་པའི་སྣོད་བཅུད་མ་ལག་གི་སྤྱི་ཡོངས་ཀྱི་རྣམ་པ་ཐོག་མར་མངོན་ཐུབ་པ་དང་། ལྟོ་གས་ཉ་རིགས་དང་ས་མཐོའི་འདམ་ཉའི་ཁྱབ་གནས་རྒྱ་མཚོའི་ངོས་ལས་མཐོ་ཚད་སྨི་5200ལས་བརྒལ་པ་ཐོག་མར་ཤེས་ཐུབ་ཡོད་པ། མེ་ཏོག་ནས་ཁུག་རྟ་ཁྱབ་ཚུལ་ཐོག་མར་མཐོང་བས་ཡར་ཀླུང་གཙང་པོའི་འཁྱགས་ཐོར་གནོད་འཚེའི་ལྟ་ཞིབ་ཚད་ལེན་གྱི་ཉེན་ཟོན་སྟེགས་བུ་ཞིག་རགས་ཙམ་བསྐྲུན་ཡོད་པ་རེད།
   ཤེས་རྟོགས་བྱུང་བར་གཞིགས་ན། གྲུབ་འབྲས་འདི་དག་གིས་“ཨེ་ཤ་ཡའི་ཆུ་གསོག་མཐོ་ལྕོག”གི་འགྱུར་ལྡོག་དང་ཤུགས་རྐྱེན། དེ་བཞིན་དུ་ཁ་གཏད་འཇལ་ཐབས་བཅས་ཐད་ཀྱི་ངོས་འཛིན་གཏིང་ཟབ་གཏོང་བ་མ་ཟད། རྒྱལ་ཁབ་ཀྱི་སྣོད་བཅུད་དཔལ་ཡོན་འཛུགས་སྤེལ་དང་ས་ཁོངས་ཀྱི་གནོད་འཚེ་འགོག་འཕྲིའི་ཐད་ལ་ཚན་རྩལ་གྱི་འདེགས་སྐྱོར་བྱེད་ངེས་རེད།
   བོད་རང་སྐྱོང་ལྗོངས་ཚན་རིག་རྟོག་ཞིབ་ཐེངས་གཉིས་པའི་འགོ་ཁྲིད་ཚོ་ཆུང་གཞུང་ལས་ཁང་གི་ཀྲུའུ་རེན་དང་རང་སྐྱོང་ལྗོངས་ཚན་རྩལ་ཐིང་གི་ཐིང་ཀྲང་འཕྲིན་ལས་དབང་རྒྱལ་གྱིས་གོམ་སྟབས་རྗེས་མར། མཚོ་བོད་མཐོ་སྒང་ཚན་རིག་རྟོག་ཞིབ་ཐེངས་གཉིས་པས་མུ་མཐུད་ནས་ཆུ་དང་སྣོད་བཅུད། མིའི་རིགས་ཀྱི་བྱེད་སྒོ་བཅས་ལ་དམིགས་ནས་རིག་གཞུང་ཚན་ཁག་མང་པོའི་དགེ་མཚན་ལྡན་པའི་སྟོབས་ཤུགས་ཕྱོགས་བསྡུས་དང་། མཉམ་འབྲེལ་འགག་སྒྲོལ་བྱེད་ཤུགས་ཇེ་ཆེར་གཏོང་བ།སའི་གོ་ལའི་“གླིང་སྣེ་གསུམ་པ”སྲུང་སྐྱོང་ལ་ཞབས་འདེགས་ཞུ་བ་བཅས་བྱ་རྒྱུ་ཡིན་ཞེས་བཤད་པ་རེད།(བརྒྱུད་སྐུར་བྱེད་དུས་དྲ་ཚིགས་འདི་མ་གསུབ་རོགས་གནང་།http://tibet.people.com.cn/15835105.html)