༄༅།།བོད་ཀྱི་དངོས་བྲིས་ལུགས་ཀྱི་ཐང་ག་གཞི་ཁྱོན་ཆེན་པོས་འགྲེམས་སྟོན་ཐེངས་དང་པོ་བྱས་པ། 

         ཤིན་ཧྭ་གསར་འགྱུར་ཁང་ལྷ་ས་ནས་ཟླ་10ཚེས་11ཉིན་གློག་འཕྲིན་འབྱོར་གསལ། ཟླ་10ཚེས་11ཉིན། དངོས་བྲིས་ལུགས་ཀྱི་ཐང་ག་60ལྷ་སར་གཅིག་སྡུད་འགྲེམས་སྟོན་བྱས་པ་དང་། འདི་ནི་དངོས་བྲིས་ལུགས་ཀྱི་ཐང་ག་གཞི་ཁྱོན་ཆེན་པོས་འགྲེམས་སྟོན་བྱེད་ཐེངས་དང་པོ་རེད།
          དངོས་བྲིས་ལུགས་ཀྱི་ཐང་ག་ནི་བོད་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་ཡིན་པ་དང་། སློབ་དཔོན་ཆེན་པོ་ཨ་མདོ་བྱམས་པས་སྲོལ་གཏོད་གནང་བ་རེད། སྨན་ཐང་སོགས་སྲོལ་རྒྱུན་གྱི་ཐང་གའི་འབྲི་ལུགས་དང་མི་འདྲ་བ་ནི་དངོས་བྲིས་ལུགས་ཀྱི་ཐང་གས་བོད་ཀྱི་སྲོལ་རྒྱུན་ཐང་གའི་འབྲི་སྟངས་རྒྱུན་འཛིན་བྱས་པའི་རྨང་གཞིའི་ཐོག་དངོས་བྲིས་རི་མོའི་ཁྱད་ཆོས་མཉམ་འདྲེས་བྱས་ཡོད་པ་རེད།
         འགྲེམས་སྟོན་བྱས་པའི་ཐང་ག《གཉའ་ཁྲི་བཙན་པོ》ལ་མི་མང་པོ་ཞིག་གིས་དོ་ཁུར་བྱེད་ཅིང་། ཐང་ག་དེར་བོད་ཀྱི་རྗེ་ལ་སྔ་བ་གཉའ་ཁྲི་བཙན་པོ་རྒྱལ་སར་འཁོད་པའི་བརྒྱུད་རིམ་དང་ཕོ་བྲང་ཡུམ་བུ་བརླ་སྒང་བཞེངས་པའི་རྣམ་པ་བཀོད་ཡོད། གཞན་ཡང་། བོད་བརྒྱུད་ནང་བསྟན་དགེ་ལུགས་པའི་སྲོལ་གཏོད་པ་ཙོང་ཁ་པས་ཆོས་འཁོར་བསྐོར་བའི་བརྩམས་ཆོས《ཙོང་ཁ་པ》དང་བོད་སྨན་བཟོ་ལུགས་ཀྱི་བརྒྱུད་རིམ་སྟོན་པའི་བརྩམས་ཆོས《གཡུ་ཐོག་གསར་མ་ཡོན་ཏན་མགོན་པོ》ལ་ཡང་དོ་ཁུར་ཆེན་པོ་ཐོབ་ཡོད་པ་རེད།
        བོད་ལྗོངས་སློབ་ཆེན་སྒྱུ་རྩལ་སློབ་གླིང་གི་དགེ་རྒན་ཆེ་མོ་བ་བསྟན་པ་རབ་བརྟན་གྱིས་དངོས་བྲིས་ལུགས་ཀྱི་ཐང་ག་ནི་ཚོས་གཞི་ཞི་མཐུན་ལྡན་ལ་ཞིབ་ཚགས་པོ་ཡོད། བརྩམས་ཆོས་དེ་རིགས་ནང་ཡུལ་གྱི་བཀོད་པ་དང་། མི་སྣའི་གྱོན་ཆས། ལུས་ཀྱི་མཛེས་རྒྱན། ཐོན་སྐྱེད་ཡོ་བྱད་སོགས་ཀྱི་ནང་དོན་བྲིས་ཡོད་པས། སྐབས་དེ་དུས་ཀྱི་སྤྱི་ཚོགས་ཀྱི་ལམ་ལུགས་དང་། མི་རྣམས་ཀྱི་ལག་རྩལ་ཆུ་ཚད། དེ་བཞིན་བོད་ཀྱི་ས་གནས་ཁག་གི་འཕེལ་རྒྱས་ཀྱི་ཚད་གཞི་བཅས་ལ་ཞིབ་འཇུག་བྱ་རྒྱུར་དཔྱད་གཞིའི་རྒྱུ་ཆ་གལ་ཆེན་མཁོ་འདོན་བྱས་ཡོད་པ་རེད།