༄༅།།ཀྲུང་གོ་རྒྱལ་སྤྱིའི་འཛད་རྫས་དངོས་མང་སྟོན་ཚོགས་སྐབས་བཞི་པ་གཉེར་གྲབས་ཡོད་པ།

     འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཟླ་4ཚེས་13ཉིན་ནས་ཚེས་18ཉིན་བར་ཀྲུང་གོ་རྒྱལ་སྤྱིའི་འཛད་རྫས་དངོས་མང་སྟོན་ཚོགས་སྐབས་བཞི་པ་ཧའེ་ཁོའུ་རུ་འཚོག་རྒྱུ་རེད། སྟོན་ཚོགས་ནང་ཞུགས་རྒྱུའི་བོད་ཀྱི་ཁེ་ལས་27གྱིས་གྲགས་ཁྱད་ལེགས་གསར་གྱི་ཐོན་རྫས་200ལྷག་ཙམ་གཅིག་སྡུད་ཐོག་འགྲེམས་སྟོན་བྱ་རྒྱུ་ཡིན་པ་དེའི་ཁོངས་སུ་ས་མཐོའི་ཁྱད་ལྡན་བཟའ་བཅའ་དང་། མི་རིགས་ཀྱི་ཁྱད་ཆོས་ལྡན་པའི་ལག་ཤེས་བཟོ་རྩལ་ཐོན་རྫས། ནགས་གསེབ་ཐོན་རྫས། རིག་གནས་གསར་གཏོད་ཐོན་རྫས། བོད་སྨན་སོགས་ཚུད་ཡོད་པ་རེད།
     ཤེས་རྟོགས་བྱུང་བར་གཞིགས་ན། སྐབས་འདིའི་འཛད་རྫས་དངོས་མང་སྟོན་ཚོགས་རིང་བོད་ཀྱིས་འཛད་རྫས་དངོས་མང་སྟོན་ཚོགས་ཀྱི་ལས་སྟེགས་ལ་བརྟེན་ནས་ཚོང་འགུགས་མ་འདྲེན་གྱི་ཆེད་དོན་འོས་སྦྱོར་ཚོགས་འདུ་འཚོགས་ཏེ་བོད་ཀྱི་མ་འཇོག་ཁོར་ཡུག་དང་། ཚོང་འགུགས་སྲིད་ཇུས། ཐོན་རྫས་གྲགས་ཅན་དང་སྤུས་ལེགས་སོགས་དྲིལ་བསྒྲགས་དང་འོས་སྦྱོར་བྱེད་པ་དང་། ཕྱོགས་ཡོངས་དང་རྣམ་པ་མང་པོའི་ཐོག་ནས་བོད་ཀྱི་ཚོང་གཉེར་ཁོར་ཡུག་ཡག་པོ་མངོན་པར་བྱེད་པ། “ནང་དུ་འདྲེན་པ”དང“ཕྱིར་སྐྱོད་པར”སྤྱི་འདོམས་སྐུལ་འདེད་གཏོང་བ། ཁེ་ལས་དང་འབྲེལ་མཐུད་བྱེད་ཤུགས་ཆེ་རུ་གཏོང་བ། སྤེལ་རེས་དང་མཉམ་ལས་རྒྱ་ཆེར་གཏོང་བ་བཅས་བྱས་ནས་ཁེ་ལས་དེ་བས་མང་པོ་བོད་དུ་ཡོང་བ་དང་། བོད་ཤེས་རྟོགས་བྱེད་པ། བོད་ལ་མ་རྩ་འཇོག་པ་བཅས་ཀྱི་ཡིད་དབང་འགུག་ཐབས་བྱ་རྒྱུ་རེད།
     རང་སྐྱོང་ལྗོངས་ཚོང་དོན་ཐིང་གི་འབྲེལ་ཡོད་འགན་འཁུར་བས་ངོ་སྤྲོད་བྱས་པར། ད་ཐེངས་ཀྱི་འཛད་རྫས་དངོས་མང་སྟོན་ཚོགས་ནང་ཞུགས་པའི་ལས་དོན་ཡག་པོ་སྒྲུབ་ཆེད། རང་ལྗོངས་ཀྱིས་དུས་འགོའི་ལས་དོན་འབོར་ཆེན་བསྒྲུབས་ཡོད། སྟོབས་ཤུགས་དང་ལེགས་ཆ་ལྡན་པ་དང་དེང་རབས་སྤྱི་ཚོགས་ཀྱི་དགོས་མཁོ་དང་འཚམ་པའི་ཁྱད་ལྡན་ཐོན་རྫས་གདམ་གསེས་ཀྱིས་འོས་སྦྱོར་བྱས་ཏེ། ས་མཐོའི་ཁྱད་ཆོས་ལྡན་པའི་ཐོན་རྫས་དང་དེང་རབས་ཅན་གྱི་ལག་རྩལ་གསར་གཏོད་ཀྱི་གྲུབ་འབྲས་ཁྱོན་ཡོངས་ནས་མངོན་པར་བྱ་རྒྱུ་དང་བོད་ཀྱི་སྤུས་རྟགས་ས་མཐོ་ནས་ཐོན་ཏེ་འཛམ་གླིང་ཕྱོགས་སུ་བསྐྱོད་རྒྱུར་སྐུལ་འདེད་གཏོང་རྒྱུ་ཡིན་པ་རེད།