༄༅།།བོད་བརྒྱུད་ནང་བསྟན་གྱི་སྐབས་བཅོ་བརྒྱད་པ་དང་བཅུ་དགུ་པའི་མཐོ་རམས་པའི་མཚན་གནས་སྤྲོད་པའི་མཛད་སྒོ་པེ་ཅིང་དུ་འཚོགས་པ།

     ཤིན་ཧྭ་གསར་འགྱུར་ཁང་པེ་ཅིང་ནས་ཟླ་5ཚེས་23ཉིན་གློག་འཕྲིན་འབྱོར་གསལ། ཟླ་5ཚེས་23ཉིན། བོད་བརྒྱུད་ནང་བསྟན་གྱི་སྐབས་བཅོ་བརྒྱད་པ་དང་བཅུ་དགུ་པའི་མཐོ་རམས་པའི་མཚན་གནས་སྤྲོད་པའི་མཛད་སྒོ་པེ་ཅིང་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་དུ་འཚོགས་ཤིང་། བོད་བརྒྱུད་ནང་བསྟན་གྱི་དགེ་ལུགས་དང་། རྙིང་མ། ས་སྐྱ། བཀའ་རྒྱུད། བོན་ཆོས་བཅས་ཀྱི་དགེ་འདུན་པ་62ཀྱིས་ལོ་3རིང་སྦྱངས་པ་ལྷུར་ལེན་གནང་བས། སྦྱང་བྱའི་གནས་ཚང་མ་མཐར་ཕྱིན་ནས་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་མཐོ་རིམ་མཚན་གནས་འཛིན་གྲྭའི་སློབ་ཐོན་ལག་ཁྱེར་རག་པ་དང་། ཐོབ་ཐང་ཞིབ་བཤེར་དང་། རྟགས་གསལ་བཏང་བ། དཔྱད་རྩོམ་ལ་རྩོད་ལན་འདེབས་པ་བཅས་གོ་རིམ་ནན་པོ་བརྒྱུད། དགེ་འདུན་པ་62ལ་བོད་བརྒྱུད་ནང་བསྟན་གྱི“མཐོ་རམས་པའི”མཚན་གནས་ཐོབ་པ་རེད།
     ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་། བོད་བརྒྱུད་ནང་བསྟན་མཚན་གནས་ལས་དོན་མཛུབ་ཁྲིད་ཨུ་ཡོན་ལྷན་ཁང་གི་ཀྲུའུ་རེན། ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་གི་ཡོན་ཀྲང་བཅས་ཡིན་པའི་འཇམ་དབྱངས་སྤྲུལ་སྐུས“མཐོ་རམས་པའི”མཚན་གནས་ཐོབ་མཁན་ལ་མཚན་གནས་ལག་ཁྱེར་གནང་བ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་དང་བོད་བརྒྱུད་ནང་བསྟན་མཚན་གནས་ལས་དོན་མཛུབ་ཁྲིད་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་སྒྲུབ་ཁང་ཐུབ་བསྟན་མཁས་གྲུབ་ཀྱིས་མཚན་གནས་ཐོབ་མཁན་ལ་བཀྲ་ཤིས་བདེ་ལེགས་ཞུས་པ་རེད།