༄༅།།བསྐྱར་དར་རྟགས་ཅན་ལ་བསྡད་ནས་ལྷ་སར་ཕེབས་པ།

   ཀྲུང་གོར་བཅའ་སྡོད་རྒྱལ་ཁབ་མང་པོའི་གཞུང་ཚབ་ཆེ་མོ་བ་དང་། རྒྱལ་ཁོངས་ཕྱི་རྒྱལ་ནས་ཡིན་པའི་མི་སྣ། སྨྱན་སྦྱོར་གྱི་གསར་འགོད་པ་སོགས་ལས་གྲུབ་པའི་ལྟ་སྐོར་འཚམས་འདྲི་ཚོགས་པའི་རུ་ཁག་ཉེ་ཆར་བསྐྱར་དར་རྟགས་ཅན་ལ་བསྡད་དེ་ཉིང་ཁྲི་ནས་ལྷ་སར་བསྐྱོད་པ་རེད། བསྐྱར་དར་རྟགས་ཅན་ས་མཐོར་བྱ་འཕུར་བ་ལྟར་བསྐྱོད་པ་དང་། སྒེའུ་ཁུང་ཕྱིའི་མཛེས་ལྗོངས་འགྱུར་ལྡོག་ཟམ་མི་ཆད་པར་བྱུང་བར་ཚང་མས་དྲན་རྟེན་གྱི་པར་རྒྱག་གི་ཡོད། མེ་འཁོར་ལྷ་ས་འབབ་ཚིགས་སུ་སླེབས་པ་དང་ཆབས་ཅིག་འབབ་སྟེགས་འཁྲུག་ཆ་དོད་དུ་ཕྱིན་ནས། ཁ་བཏགས་དང་གཡག་བྲོ། ཨ་ཅེ་ལྷ་མོ་སོགས་འཁྲབ་ནས་སྐུ་མགྲོན་དག་བསུ་མ་བྱས་ཡོད་པ་རེད། དེ་རྗེས་ཉིན་ཤས་ནང་།  ལྷ་ས་དང་ལྷོ་ཁར་འཚམས་འདྲིར་བསྐྱོད་ནས་བོད་ལྗོངས་ཀྱི་དམངས་གཙོ་བཅོས་སྒྱུར་བྱས་ཚུན་ཐོབ་པའི་འཕེལ་རྒྱས་དང་ཡར་རྒྱས་ཉམས་སུ་མྱོང་རྒྱུ་རེད།