༄༅།།“བོད་དུ་ང་ལ་ཤིང་སྡོང་ཞིག་ཡོད”ཅེས་པར་རྒྱལ་ཁབ་རིམ་པའི་ལོ་འཁོར་གྱི་ཕུལ་བྱུང་དགེ་སྒྲུབ་རྣམ་གྲངས་ཀྱི་མཚན་སྙན་ཐོབ་པ།

     འདི་ག་ཚགས་པར་ཁང་དུ་གནས་ཚུལ་འབྱོར་གསལ། བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཉེ་ཆར། 《ཀྲུང་གོའི་དགེ་སྒྲུབ་པ》ཡིས་གཙོ་གཉེར་བྱས་པའི“འདུས་འགྱུར་གྱི་བཀྲག་མདངས”2025ལོའི་ལོ་འཁོར་གྱི་དགེ་སྒྲུབ་མཛད་སྒོ་གཟབ་རྒྱས་དེ་ཀྲུང་གོ་སུང་ཆིང་ལིང་གཞོན་ནུ་ལོ་ཆུང་ཚན་རྩལ་རིག་གནས་སྤེལ་རེས་ལྟེ་གནས་ཀྱི་འབྱུང་འགྱུར་ཟློས་གར་ཁང་དུ་འཚོགས་ཤིང་། བོད་རང་སྐྱོང་ལྗོངས་དགེ་སྒྲུབ་སྤྱི་ཁྱབ་ལྷན་ཚོགས་ཀྱིས་བཏོན་པའི“བོད་དུ་ང་ལ་ཤིང་སྡོང་ཞིག་ཡོད”ཅེས་པའི་རྣམ་གྲངས་ལ“ལོ་འཁོར་གྱི་ཕུལ་བྱུང་རྣམ་གྲངས”ཀྱི་མཚན་སྙན་ཐོབ་ཡོད།

     ཤེས་རྟོགས་བྱུང་བར་གཞིགས་ན། “བོད་དུ་ང་ལ་ཤིང་སྡོང་ཞིག་ཡོད”ཅེས་པའི་རྣམ་གྲངས་ནི་བོད་རང་སྐྱོང་ལྗོངས་དགེ་སྒྲུབ་སྤྱི་ཁྱབ་ལྷན་ཚོགས་ཀྱིས་སྒྲིག་འཛུགས་ལག་བསྟར་བྱས་པ་ཞིག་ཡིན་ཞིང་། དེའི་ལྟེ་བའི་དམིགས་ཡུལ་ནི་སྤྱི་ཚོགས་ལས་རིགས་ཁག་གི་སྟོབས་ཤུགས་ས་མཐོའི་སྐྱེ་ཁམས་འཛུགས་སྐྲུན་ནང་ཞུགས་པར་སྐུལ་སློང་བྱས་ཏེ། ཤིང་འཛུགས་ནགས་བཟོ་བརྒྱུད་བོད་ཀྱི་སྐྱེ་ཁམས་ཁོར་ཡུག་ལེགས་སུ་གཏོང་བ་དང་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་པར་རམ་འདེགས་བྱེད་ཆེད་རེད།