མི་དམངས་དྲ་བ།

བོད་ལྗོངས་ཀྱི་ཁྱད་ལྡན་ཐོན་རྫས་ཕྱིར་གཏོང་བྱེད་ཚད་ཇེ་མགྱོགས་སུ་ཕྱིན་པ།

༄༅།།དུས་ཚིགས་དང་པོ་ནས་གསུམ་པའི་བར་རིམ་རྩིས་བརྒྱབ་ན་ཕྱིར་གཏོང་དངུལ་འབོར་སྒོར་ཁྲི་3000ཟིན་པ།

གསར་འགྱུར་སྤེལ་དུས། 　【2025ལོའི་ཟླ་ 11ཚེས་14ཉིན། 09:56】 ཡོང་ཁུངས།：མི་དམངས་ཉིན་རེའི་ཚགས་པར། （རྩོམ་སྒྲིག་འགན་འཁུར་པ། མཁའ་འགྲོ།）

འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། བོད་ལྗོངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། གསར་འགོད་པས་ལྷ་ས་འགག་སྒོ་ལས་ཁུངས་ནས་ཤེས་རྟོགས་བྱས་པར། བོད་ཀྱི་གྲོང་ཁྱེར（ས་ཁུལ）7གྱི་ཁྱད་ལྡན་ཐོན་རྫས་ཕྱིར་གཏོང་ཡོངས་ཁྱབ་མངོན་འགྱུར་བྱུང་ཞིང་། ད་ལོའི་དུས་ཚིགས་དང་པོ་ནས་གསུམ་པའི་བར་རིམ་རྩིས་བརྒྱབ་ན། ཕྱིར་གཏོང་དངུལ་འབོར་སྒོར་ཁྲི་3000ཟིན་ཞིང་། དབྱར་རྩྭ་དགུན་འབུ་དང་། ཁ་ཆེ་ཤ་སྐམ། ས་མཐོའི་གཏེར་ཆུ་སོགས་བོད་ཀྱི་ཁྱད་ལྡན་ཐོན་རྫས་ཁག་གཅིག་རྒྱལ་སྤྱིའི་ཁྲོམ་རར་བཏོན་ཡོད།

ད་ལོ་ཚུན་དུ། བོད་ཀྱི་དམིགས་བསལ་ཐོན་ཁུངས་དང་ས་བབ་ཀྱི་ལེགས་ཆར་གཞི་ཚུགས་ཏེ། ལྷ་ས་འགག་སྒོ་ལས་ཁུངས་ཀྱིས་བོད་ཀྱི་ཕྱི་ཕྱོགས་ཚོང་དོན་སྤུས་ཚད་མཐོ་བའི་འཕེལ་རྒྱས་ལ་ཞབས་འདེགས་ཞུ་བའི་བྱ་ཐབས་ཁག་12བཏོན་པ་དང་། ཁེ་ལས་ལ“ཕྱི་ཕྱོགས་ཚོང་དོན་གྱི་ལས་སྒོ་ཐོག་མར་སྒྲུབ་པའི”གསོ་སྐྱོང་འཆར་གཞི་ལག་བསྟར་བྱས་ཏེ། ཁེ་ལས་ཀྱི་མངགས་ཐོ་གཏན་འཁེལ་དང་ཟོག་འགྲེམས་འབྲེལ་མཐུད་དེ་འགག་སྒོ་ནས་གཏོང་བའི་བརྒྱུད་རིམ་ཧྲིལ་པོར་རྗེས་སྙེག་མཛུབ་ཁྲིད་བྱས་པ་བརྒྱུད། བོད་ལྗོངས་ཀྱི་ཁ་ཆེ་ཤ་སྐམ་ཐོག་མར་ཕྱིར་གཏོང་ཐུབ་ཡོད།