༄༅།།ས་མཐོའི་རི་ཀླུང་སྔོ་ལྗང་གོས་ཀྱིས་བཀླུབས། དེ་ཡི་ཕན་འབྲས་བསྐལ་བརྒྱ་བར་དུ་གནས།

     འདི་ལོ་ནི་བོད་རང་སྐྱོང་ལྗོངས་དབུ་བརྙེས་ནས་ལོ་ངོ་60འཁོར་བའི་ལོ་ཞིག་རེད། ལོ་ངོ་དྲུག་ཅུར་དཀའ་ངལ་ཁྱད་དུ་བསད། ལོ་ངོ་དྲུག་ཅུར་གངས་ལྗོངས་འཕོ་འགྱུར་ཆེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་སྙན་སེང་གསན་སྐབས“མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་ཧུར་ཐག་སྐྲུན་དགོས”ཞེས་ནན་བཤད་གནང་བ་རེད། དེ་རིང་ནས་བཟུང་པར་ངོས་འདིར་རིམ་སྤེལ་དཔྱད་གཏམ་སྤེལ་ནས་གངས་ལྗོངས་ས་མཐོའི་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་མངོན་པ་དང་མཛེས་སྡུག་ལྡན་པའི་བོད་ཀྱི་ལེའུ་གསར་རྩོམ་པའི་སྟོབས་ཤུགས་གཅིག་སྒྲིལ་བྱ་རྒྱུ་ཡིན།

—— རྩོམ་སྒྲིག་པའི་སྦྲགས་མཆན།

     སྤྱི་སྤྱོད་རླངས་འཁོར་གོང་དཀར་གནམ་ཐང་ནས་ལྷ་ས་གྲོང་ཁྱེར་གྱི་ཕྱོགས་སུ་སྐྱོད་སྐབས། ལམ་འགྲམ་དུ་སྔོ་ཐིང་ཐིང་གི་གསོམ་ཤིང་དང་ཐང་ཤིང་སོགས་གྲལ་སྟར་འགྲིག་ལ། ཆུ་འདྲེན་སྦུ་གུ་ནས་ཐོར་བའི་ཆུ་ཐིགས་ཉི་འོད་དང་སྡེབ་རྗེས་ཕུག་ལམ་རེ་རེའི་མདུན་དུ་རྣམ་པར་བཀྲ་བའི་འཇའ་ཚོན་འཐེན་པ་དང་འདྲ། ཐག་རིང་དུ་བལྟས་ན་དེ་སྔའི་སྐྱ་ཐེར་ཐེར་གྱི་རི་རྒོད་སྔོ་ལྗང་རབ་ཏུ་རྒྱས། མི་མང་པོ་ཞིག་གིས་ས་མཐོར་ཤིང་སྡོང་ཆེན་པོ་མཐོང་དཀའ་ཟེར་མོད། ད་ཆ་མི་རྣམས་ཧང་སངས་དགོས་པའི་ཤིང་སྡོང་ཆེན་པོ་མང་པོ་མཐོང་རྒྱུ་ཡོད།

      རང་བྱུང་ཆ་རྐྱེན་ནི་ས་མཐོའི་ས་ཁུལ་གཞན་དག་དང་མི་འདྲ་ཞིང་། ཤིང་འཛུགས་པ་ཚེ་རིང་དཔལ་སྐྱིད་ལྷ་སའི་ལྷོ་རི་བྱང་རིར་ཐེངས་དང་པོར་ཡོང་སྐབས་ཤིང་སྡོང་གཅིག་ཀྱང་མེད་པ་དང་། སྐྱ་ཐེར་ཐེར་གྱི་རི་རྒོད་དུ་ཤིང་འཛུགས་པ་ནི་འགྲུབ་ཐབས་བྲལ་བའི་ལས་འགན་ཞིག་ཡིན་པའི་ཚོར་སྣང་བྱུང་ཞེས་བཤད། འདི་གར་ས་བབ་སྨི་4000ཟིན་པ་དང་། ཆ་སྙོམས་གཟར་ཚད་ཏུའུ་60ཟིན་པ། ས་རིམ་གྱི་ཆ་སྙོམས་མཐུག་ཚད་ལི་སྨི་10ལས་ཟིན་གྱི་མེད། ད་དུང་ས་ཁོངས་མང་ཆེ་བར་བྲག་རྡོ་དང་རྡོ་ཧྲུག་འདུས་ཚད་60%ནས་70%བར་ཟིན་གྱི་ཡོད་པས། རྒྱུན་དུ་སྔོན་ལ་གློག་གསོར་གྱིས་བྲག་རྡོ་བཅག་རྗེས་གཞི་ནས་ས་གཤོས་ཏེ་ཤིང་འཛུགས་དགོས་ཀྱི་ཡོད།

     ས་བབ་དང་བསྟུན་ནས་བརྒྱུད་རིམ་ལྡན་པའི་སྲུང་སྐྱོང་བྱས་ཤིང་། མངའ་རིས་ས་ཁུལ་རུ་ཐོག་རྫོང་རེ་ཅོ་གྲོང་ཚོར་ལོ་ངོ་200ལྷག་ཙམ་གྱི་ལོ་རྒྱུས་ཡོད་པའི་མཚོ་མོ་ངང་ལྷའི་རྒྱ་ལྕང་ཞིག་ཡོད། མཚོ་མོ་ངང་ལྷའི་རྒྱ་ལྕང་གི་ཁྱད་ཆོས་ཆེ་ཤོས་ནི་གྲང་ངད་དང་ཐན་པ་བཟོད་ཐུབ་ལ་གསོན་ཚད་ཀྱང་མཐོ་པོ་ཡོད་པས། ས་བབ་མཐོ་བའི་ཁུལ་གྱི་སྔོ་འགྱུར་ནགས་བཟོར་འཚམ་པ་དང་། ད་ཆ་འདེབས་ཁྱོན་ཆེ་རུ་འགྲོ་བཞིན་ཡོད། དེ་ཙམ་མ་ཟད། ལྷ་ས་སྐྱིད་ཆུ་བཞུར་སའི་ལྷ་ཞབས་གླིང་དང་། འཇག་མ་གླིང་། དེ་བཞིན་གྲོང་ཁུལ་རྒྱུད་དུ་སྐྱེ་ཁམས་ཀྱི་བར་ཁྱམས་བསྐྲུན་པ་དང་། དགེ་རྒྱས་རྫོང་འོམ་བུ་དྭངས་བསངས་ཤང་དུ་མི་ཐབས་རྩྭ་ར་མུའུ་3600ཙམ་བཏབ་ཡོད་པས། འབྲོག་པར་དགུན་ཁ་གཟན་རྩྭ་དཀོན་པའི་དཀའ་ངལ་བསལ་བ་མ་ཟད། སྤང་རྩྭ་ཡང་ལེགས་སུ་ཕྱིན་ཡོད། མ་ཕམ་གཡུ་མཚོ་འདམ་རར་བདག་སྐྱོང་པ་90ཡིས་རེས་མོས་ངང་སྐོར་གཡེང་བྱས་ཏེ་མ་རབས་ཀྱི་བྱེད་སྤྱོད་ལ་ཁ་ཏ་སློབ་གསོ་དང་མཛེས་པའི་འདམ་རར་སྲུང་སྐྱོང་བྱེད་པ་སོགས། ཤིང་འཛུགས་ནགས་བཟོ་ཁོ་ན་བྱེད་པ་ནས་ཆུ་བོ་འབབ་རྒྱུད་ཀྱི་སྐྱེ་ཁམས་སྲུང་སྐྱོང་གི་བར་དང་། དེ་ནས་རི་ཆུ་ནགས་ཞིང་མཚེའུ་རྩྭ་བྱེ་མ་དང་འཁྱགས་རོམ་བཅས་གཞི་གཅིག་ཅན་སྲུང་སྐྱོང་བྱེད་པའི་བར་ས་མཐོའི་སྔོ་འགྱུར་ནི་ཕྱོགས་བསྡུས་ཅན་དང་བརྒྱུད་རིམ་ལྡན་པའི་བཅོས་སྐྱོང་བརྒྱུད་རིམ་ཞིག་རེད། དེ་ནི་སྐྱེ་ཁམས་ཉམས་གསོ་བྱེད་པའི་ཉམས་མྱོང་གལ་ཆེན་ཞིག་ཡིན་ལ། ལས་དོན་ལ་སྐུལ་འདེད་གཏོང་བའི་བྱ་ཐབས་ནུས་ལྡན་ཞིག་ཀྱང་རེད།

      མང་ཚོགས་ལ་བརྟེན་པ་དང་མང་ཚོགས་ལ་ཕན་པ་བཏགས། ལྗོན་ཤིང་འདེབས་པ་ནི་ལས་སླ་མོ་ཞིག་མིན་པ་དང་མང་ཚོགས་ནི་སྟོབས་ཤུགས་གསར་པ་ཞིག་ཡིན། སྔོ་འགྱུར་ལས་ལ་གཞོལ་ནས་ལོ་8སོང་བའི་མི་འགྱུར་གྱིས། ཐོག་མར་དྲེལ་དང་མི་མེད་གནམ་གྲུ་མེད་པས། མིས་སྡོང་ཕྲུག་སྒལ་པར་འཁུར་ནས་རི་སྟེང་དུ་དབོར་དགོས་པ་དང་། ཞོགས་པའི་ཆུ་ཚོད་7པ་ནས་དབོར་འགོ་བཙུགས་ཚེ་མི་རེས་དབོར་ཐེངས་5འགྲོ་ཐུབ་ཅེས་ཕྱིན་དྲན་བྱེད་བཞིན་བཤད། རྒྱ་ཆེའི་མང་ཚོགས་ཀྱིས་དཀའ་སྤྱད་འབད་བརྩོན་བྱས་པ་ལས་གང་སར་སྔོ་ཐིང་ཐིང་དུ་གྱུར་པ་མ་ཟད། ཁོར་ཡུག་བཟང་པོས་མང་ཚོགས་ལ་ཕན་པའང་བཏགས་ཡོད།

     ས་མཐོ་སྔོ་ལྗང་ཅན་དུ་འགྱུར་བ་ནི་དཀའ་ངལ་ཡོད་ཀྱང་ངེས་པར་དུ་སྒྲུབ་དགོས་པ་ཞིག་ཡིན་ཞིང་། བོད་ནི་རྒྱལ་ཁབ་ཀྱི་སྐྱེ་ཁམས་བདེ་འཇགས་སྲུང་བཅད་གལ་ཆེན་ཞིག་ཡིན་པས“བོད་ཀྱི་སྐྱེ་ཁམས་ཁོར་ཡུག་ལ་སྲུང་སྐྱོང་ཡག་པོ་བྱས་ན་ཕན་འབྲས་སྐལ་བརྒྱར་ཐོན་པ་དང་གནམ་འོག་ཀུན་ལ་ཕན་པ་འདོགས་ཐུབ” ནགས་བཟོ་སྔོ་འགྱུར་ས་ཚིགས་སུ་དངོས་སུ་བསྐྱོད་དེ་སྡོང་རྐང་རེ་རེ་འདེབས་འཛུགས་བྱེད་པའི་བརྒྱུད་རིམ་དང་། དཀའ་ངལ་ལ་མི་སྐྲག་པར་རི་བོ་ཐམས་ཅད་སྔོ་ལྗང་གོས་བཟང་བཀླུབས་ངེས་ཀྱི་འབད་བརྩོན་བྱེད་པའི་དོན་སྙིང་ཤེས་ཚེ་གཞི་ནས་བོད་ཀྱི་ད་ལྟའི་སྐྱེ་ཁམས་མཛེས་སྡུག་དང་ལྡན་པ་འདི་ལྟ་བུ་ཡོང་དོན་ནི་བོད་ཀྱི་མི་དམངས་ཀྱིས་ལོ་ངོ་བཅུ་ཕྲག་ཁ་ཤས་ཉིན་གཅིག་ལྟར་འབད་བརྩོན་བྱས་པ་ལས་བྱུང་བ་ཞིག་ཡིན་པ་རྟོགས་ཐུབ། བཅར་འདྲི་བྱ་ཡུལ་སྔོ་འགྱུར་པ་ཚང་མས་སྤོབས་པ་ཆེན་པོས་ནང་མི་ཚོས་ཁོང་ཚོར་ཁས་ལེན་དང་ཁྱིམ་མཚེས་ཀྱིས་ཁོང་ཚོར་བསྔགས་བརྗོད་བྱེད་ལུགས་བརྗོད་སྐབས“ས་མཐོའི་རི་ཀླུང་སྔོ་ལྗང་གོས་ཀྱིས་བརྒྱན། དེ་ཡི་ཕན་འབྲས་བསྐལ་བརྒྱ་བར་དུ་གནས”ཞེས་བརྗོད།

      རླངས་འཁོར་རྒྱལ་ལམ་ཐོག་སྐྱོད་སྐབས་གཙོད་དང་། ནོར། རྐྱང་བཅས་ལམ་འགྲམ་དུ་ཅི་དགར་རྒྱུག་བཞིན་མཆིས། རྒྱལ་ལམ་འགྲམ་དུ་རྩྭ་ཐང་དང་འདམ་ར་ཡོད་ལ། གཙང་པོ་དང་མཚེའུ་དང་། དེ་བཞིན་རྒྱང་རིང་དུ་མུ་ལ་མུ་འཁྱུད་ཀྱི་རི་བོ་གངས་དཀར་དར་གྱིས་བཀླུབས། དེ་ལྟ་བུའི་ཡི་གར་འོང་བའི་ཡུལ་ལྗོངས་སུ“རི་སྔོན་ཆུ་དྭངས་གསེར་དངུལ་རི་ལས་ལྷག གངས་རི་འཁྱགས་ཀླུང་ཡིན་ཡང་གསེར་དངུལ་རི”ཞེས་པའི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མངགས་བཅོལ་གྱི་དོན་གྱི་སྙིང་པོ་དེ་བས་གསལ་པོར་རྟོགས་ཐུབ།

(རྩོམ་པ་པོ་ནི་འདི་ག་ཚགས་པར་གྱི་སྨྱན་སྦྱོར་གསར་པའི་ལྟེ་གནས་ཀྱི་གསར་འགོད་པ་ཡིན)