༄༅།།ཞིང་ལས་གྲོང་གསེབ་པུའུ་ཡིས་ལས་དོན་ཚོགས་ཆུང་མངགས་ནས་ཞིང་ཆེན་18ལ་བསྐྱོད་དེ་སྟོན་འབྲུ་
ཐོན་སྐྱེད་དང་གནོད་འཚེ་སྔོན་འགོག་ཉུང་གཏོང་སྐོར་ལ་བརྟག་ཞིབ་མཛུབ་ཁྲིད་བྱས་པ།

    ཤིན་ཧྭ་གསར་འགྱུར་ཁང་པེ་ཅིང་ནས་ཟླ་8ཚེས་27ཉིན་གློག་འཕྲིན་འབྱོར་གསལ། ཉིན་ཤས་གོང་། གསར་འགོད་པར་ཞིང་ལས་གྲོང་གསེབ་པུའུ་ནས་ཤེས་རྟོགས་བྱུང་བར། ཞིང་ལས་གྲོང་གསེབ་པུའུ་འདེབས་འཛུགས་ལས་རིགས་དོ་དམ་སིས་ཉེ་དུས་རྒྱལ་ཡོངས་ཞིང་ལས་ལག་རྩལ་ཁྱབ་གདལ་ཞབས་ཞུ་ལྟེ་གནས་དང་ཞིང་ལས་གྲོང་གསེབ་པུའུ་ཞིང་སྨན་ཞིབ་བཤེར་གཏན་འཁེལ་སུའོ་དང་མཉམ་དུ་ལས་དོན་ཚོགས་ཆུང་8མངགས་ནས་ཞིང་ཆེན་18ལ་ཁག་སོ་སོར་བསྐྱོད་དེ་སྟོན་འབྲུ་ཐོན་སྐྱེད་དང་གནོད་འཚེ་སྔོན་འགོག་ཉུང་གཏོང་སྐོར་ལ་གཅིག་སྡུད་བརྟག་ཞིབ་མཛུབ་ཁྲིད་བྱས་པ་རེད།

    མཛུབ་ཁྲིད་ནང་དོན་ལ་ཕྱོགས་བཞི་ཚུད་ཡོད་པ་སྟེ། གཅིག་ནི་སྟོན་འབྲུའི་ཞིང་ནང་གཡོག་བྱེད་ལ་དམ་འཛིན་ཡག་པོ་བྱས་ཏེ། ས་ཡུལ་དངོས་སུ་ལྗང་པ་སྐྱེ་འཚར་དང་། བཞའ་ཚན། ནད་དང་གནོད་འབུ་བཅས་ཀྱི་གནས་ཚུལ་ལ་ཞིབ་བཤེར་བྱས་ཏེ་ཡུལ་བབ་དང་བསྟུན་ནས་ཞིང་ནང་གཡོག་བྱེད་བྱ་ཐབས་དོན་འཁྱོལ་ཡོང་བར་མཛུབ་ཁྲིད་བྱ་རྒྱུ་དང་། གཉིས་ནི་གནོད་འཚེ་སྔོན་འགོག་དང་ཉུང་གཏོང་ལ་ཤུགས་སྣོན་བརྒྱབ་སྟེ་གནོད་འཚེའི་གནས་ཚུལ་གྱིས་སྟོན་འབྲུའི་ཐོན་འབབ་ལ་ཤུགས་རྐྱེན་ཡོད་མེད་ཚོད་སྐོར་བྱས་ནས་རང་བྱུང་གནོད་འཚེ་དང་ནད་དང་གནོད་འབུའི་གནོད་འཚེ་འགོག་ཟོན་བྱེད་པར་མཛུབ་ཁྲིད་བྱ་རྒྱུ། གསུམ་ནི་གཞི་ཁྱོན་ཆེན་པོས་མུའུ་རེའི་ཐོན་འབབ་མང་དུ་གཏོང་བར་སྐུལ་འདེད་བཏང་སྟེ་ཁྱབ་ཁོངས་དང་ལོ་ཏོག་དབྱེ་ནས་འགག་རྩའི་བྱ་ཐབས་དོན་འཁྱོལ་གྱིས་ཞིང་ས་གཤིན་པོ་དང་། སོན་བཟང་། གོ་སྐབས་བཟང་པོ། ཐབས་ཤེས་བཟང་པོ་བཅས“བཟང་པོ་བཞི”མཉམ་འདྲེས་ལ་སྐུལ་འདེད་གཏོང་རྒྱུ། བཞི་ནི“གཏོར་བ་གཅིག་དང་སྐུལ་འདེད་མང་པོ”དོན་འཁྱོལ་བྱས་ཏེ། ས་གནས་ཁག་གིས་དུས་ཚོད་ཡག་ཤོས་དམ་འཛིན་བྱས་ནས་ལུད་གཏོར་བར་སྐུལ་འདེད་བཏང་སྟེ་སྤུས་ཚད་དང་ལས་ཕྱོད་ཆེ་རུ་གཏོང་རྒྱུ་བཅས་རེད།