༄༅།།འཛམ་གླིང་དྲ་སྦྲེལ་ཚོགས་ཆེན་རིག་གནས་ཤུལ་བཞག་གྲངས་འཛིན་ཅན་གྱི་གླེང་སྟེགས་འཚོག་རྒྱུ་ཡིན་པ།

    འདི་ག་ཚགས་པར་ཁང་དུ་པེ་ཅིང་ནས་ཟླ་8ཚེས་26ཉིན་གློག་འཕྲིན་འབྱོར་གསལ། གསར་འགོད་པར་འཛམ་གླིང་དྲ་སྦྲེལ་ཚོགས་ཆེན་གྱི་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། 2025ལོའི་འཛམ་གླིང་དྲ་སྦྲེལ་ཚོགས་ཆེན་རིག་གནས་ཤུལ་བཞག་གྲངས་འཛིན་ཅན་གྱི་གླེང་སྟེགས་ཟླ་9ཚེས་16དང་17ཉིན་ཧྲའན་ཤིས་ཤིས་ཨན་དུ་འཚོག་རྒྱུ་རེད། ད་ཐེངས་ཀྱི་གླེང་སྟེགས་འཛམ་གླིང་དྲ་སྦྲེལ་ཚོགས་ཆེན་གྱིས་གཙོ་གཉེར་བྱས་པ་དང་ཧྲའན་ཤིས་ཞིང་ཆེན་མི་དམངས་སྲིད་གཞུང་གིས་གཉེར་འགན་ཁུར་ཡོད།

    གླེང་སྟེགས་ཀྱིས“གྲངས་འཛིན་གྱིས་གནའ་དེང་སྦྲེལ། བློ་གྲོས་ཀྱིས་ཤེས་དཔལ་བཏོད—དྲ་རྒྱའི་བར་མཐོངས་ཀྱི་ལས་དབང་གཅིག་མཐུན་ཚོགས་པ་མཉམ་དུ་གཏོད”ཅེས་པ་བརྗོད་དོན་གཙོ་བོར་བྱས་ཏེ་འགོ་ཚུགས་མཛད་སྒོ་ཕུད། བརྗོད་དོན་གཙོ་བོའི་གླེང་སྟེགས་ཀྱིས“སྲུང་སྐྱོང་དང་རྒྱུན་འཛིན”དང་། “ལག་རྩལ་དང་གསར་གཏོད” “ཐོན་ལས་དང་མཐུན་རྐྱེན་སྦྱོར་བ” “སྒོ་དབྱེ་དང་མཉམ་བཅོས”བཅས་གྲོས་དོན་བཞི་ལ་དམིགས་ཏེ་གྲོས་བསྡུར་བྱས་ནས་གྲངས་འཛིན་ཅན་གྱི་མཐུན་རྐྱེན་སྦྱོར་བའི་རིག་གནས་ཤུལ་བཞག་སྲུང་སྐྱོང་གི་བྱ་ཐབས་གསར་པ་དང་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ཏེ་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་པར་སྐུལ་འདེད་གཏོང་རྒྱུ་རེད། དེ་དང་ཆབས་ཅིག གླེང་སྟེགས་ཀྱིས་རིག་གནས་ཤུལ་བཞག་གྲངས་འཛིན་ཅན་གྱི་རྣམ་གྲངས་རྩེ་གྲ་འགྲེམས་སྟོན་དང་། རིག་གནས་ཤུལ་བཞག་གྲངས་འཛིན་ཅན་གྱི་ལས་དོན་ཚོགས་ཆུང་གི་ཆེད་དོན་ཚོགས་འདུ། འཛམ་གླིང་དྲ་སྦྲེལ་ཚོགས་ཆེན་གྱི་གྲངས་འཛིན་ཞིབ་སྦྱོང་ཁང་གི་རིག་གནས་ཤུལ་བཞག་གྲངས་འཛིན་ཅན་སྲུང་སྐྱོང་གི་བརྗོད་དོན་གཙོ་བོའི་ཞིབ་སྦྱོང་འཛིན་གྲྭ་བཅས་མཉམ་དུ་གཉེར་རྒྱུ་མ་ཟད། འཛམ་གླིང་དྲ་སྦྲེལ་ཚོགས་ཆེན་གྱི་རིག་གནས་ཤུལ་བཞག་གྲངས་འཛིན་ཅན་གྱི་དཔེ་མཚོན་ཡོངས་བསྒྲགས་བྱས་ཏེ་རིག་གནས་ཤུལ་བཞག་གྲངས་འཛིན་ཅན་གྱི་སྤེལ་རེས་མཉམ་ལས་ཀྱི་རྒྱལ་སྤྱིའི་སྟེགས་བུ་བསྐྲུན་རྒྱུ་རེད།