༄༅།།ཀྲུང་ཝེའི་དཔལ་འབྱོར་ཚོང་དོན་མཉམ་ལས་ལ་གྲུབ་འབྲས་བཟང་པོ་ཐོབ་པ།

     ལོ་མང་རིང་། ཀྲུང་གོ་དང་ཝེ་ཐེ་ནམ་གྱིས་ཁེ་ཕན་བརྟེན་ནས་མཉམ་སྐྲུན་མཐའ་འཁྱོངས་བྱས་པར་དཔལ་འབྱོར་ཚོང་དོན་མཉམ་ལས་ལ་གྲུབ་འབྲས་གཡུར་དུ་ཟ་བ་ཐོབ་ཡོད། སྐམ་མཚོ་འབྲེལ་མཐུད་ཁུལ་གྱི་ལེགས་ཆར་བརྟེན་ནས་རྒྱལ་ཁབ་གཉིས་པོས་ཐོན་ལས་གསབ་རེས་ཀྱི་མི་མངོན་པའི་ནུས་པ་སྔོག་འདོན་གཏིང་ཟབ་བྱས་ཏེ་གཉིས་ཕན་གཉིས་ཁེའི་མཉམ་ལས་ཀྱི་རྣམ་པ་བཏོད་ཡོད། ཀྲུང་གོས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་ལ་ཕྱོགས་ཡོངས་ནས་སྐུལ་འདེད་བཏང་སྟེ་ཕྱོགས་གཉིས་པོའི་དཔལ་འབྱོར་ཚོང་དོན་དང་། མཉམ་འབྲེལ་མཉམ་མཐུད། གྲངས་འཛིན་དཔལ་འབྱོར་སོགས་ཁྱབ་ཁོངས་ཀྱི་མཉམ་ལས་རྒྱ་ཆེར་གཏོང་བར་གོ་སྐབས་གསར་པ་བཏོད་ཡོད། འབྱུང་འགྱུར། ཀྲུང་ཝེས་འཕེལ་རྒྱས་འཐབ་ཇུས་སྦྲེལ་མཐུད་ལ་སྐུལ་འདེད་རྒྱུན་མཐུད་བཏང་ནས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང“ཁྱམས་གཉིས་སྐོར་གཅིག”གི་སྒྲོམ་གཞིའི་སྦྲེལ་མཐུད་མཉམ་ལས་འཆར་འགོད་དོན་འཁྱོལ་ཡག་པོ་བྱས་ཏེ་རྒྱལ་ཁབ་གཉིས་པོའི་འབྲེལ་བའི་འཕེལ་རྒྱས་ལ་སྒུལ་ཤུགས་གསར་པ་སྣོན་རྒྱུ་རེད།

    དྲ་ཉོར་བརྟེན་ནས་དམངས་ལ་ཕན་པ་བསྐྲུན་པ།

    “ཟོག་འགྲེམས་མ་ལག་སྔར་བས་དར་རྒྱས་ཕྱིན་ནས་ཚོང་དོན་འགྲོ་འོང་སྔར་བས་སྟབས་བདེ་རུ་ཕྱིན་པ”

    ལག་ཐོགས་ཁ་པར་སྟེང་གི་ཉོ་སྒྲུབ་མཉེན་ཆས་ཁ་ཕྱེ་ནས་ཚོང་ཟོག་འདེམས་པ་དང་། ཉོ་བ། དངུལ་སྤྲོད་པ་བཅས་བྱས་ནས་ཉིན་གསུམ་སོང་རྗེས། ཝེ་ཐེ་ནམ་གྱི་ཤིང་འབྲས་ལིའུ་ལན་པེ་ཅིང་གི་གྲོང་མི་ལིའུ་ཐེན་གྱི་ལག་ཏུ་འབྱོར། ཉེ་བའི་ལོ་ཤས་རིང་། རྒྱལ་སྒྲོལ་དྲ་ཐོག་ཚོང་དོན་རྒྱ་ཁྱབ་ངང་འཕེལ་རྒྱས་ཕྱིན་པ་དང་ཆབས་ཅིག ཝེ་ཐེ་ནམ་གྱི་ལིའུ་ལན་སོགས་ཚ་ཁུལ་གྱི་ཤིང་འབྲས་སྟབས་བདེ་པོའི་ངང་ཀྲུང་གོའི་ཁྲོམ་རར་བཏོན་པ་དེ་ཀྲུང་གོའི་འཛད་སྤྱོད་པས་དགའ་པོ་བྱེད་ས་གསར་པར་གྱུར་པ་མ་ཟད། ཝེ་ཐེ་ནམ་མི་དམངས་ལ་དཔལ་འབྱོར་གྱི་ཕན་པ་མང་པོ་བཏགས་ཡོད། ཝེ་ཐེ་ནམ་འགག་སྒོ་སྤྱི་ཁྱབ་ཅུས་ཀྱི་གྲངས་གཞི་ལས་མངོན་པར། 2024ལོའི་ཟླ་དང་པོ་ནས་བཅུ་གཅིག་པའི་བར་ཝེ་ཐེ་ནམ་གྱིས་ཀྲུང་གོར་ཕྱིར་གཏོང་བྱས་པའི་ཤིང་འབྲས་དང་། སྔོ་ཚལ་དང་། དེ་བཞིན་ཆུའི་ཐོན་རྫས་ཀྱི་དངུལ་འབོར་ཨ་སྒོར་དུང་ཕྱུར་41དང་ཨ་སྒོར་དུང་ཕྱུར་14སོ་སོར་ཟིན་ནས་དུས་མཚུངས་ལས་28.7%དང་23.2%འཕར་ཡོད།

    ཝེ་ཐེ་ནམ་གྱི་ཙུང་ལི་ཧྥན་མིང་ཀྲེང་གིས། ཀྲུང་གོའི་ཁེ་ལས་ཀྱིས་ཝེ་ཐེ་ནམ་དུ་གྲངས་འཛིན་དཔལ་འབྱོར་དང་། ལྗང་མདོག་དཔལ་འབྱོར། འཁོར་རྒྱུག་དཔལ་འབྱོར། ཤེས་བྱའི་དཔལ་འབྱོར། མཉམ་སྤྱོད་དཔལ་འབྱོར་བཅས་ལ་གཙོ་གནད་ཐོག་མ་འཇོག་བྱ་རྒྱུའི་རེ་བ་ཡོད། ཝེ་ཐེ་ནམ་ཕྱོགས་ནས་ཀྲུང་གོ་ཕྱོགས་ཀྱིས་ཝེ་ཐེ་ནམ་གྱི་ཁེ་ལས་གོ་ལ་ཧྲིལ་པོའི་རིན་ཐང་ཕྲེང་འབྲེལ་ནང་ཞུགས་པར་རམ་འདེགས་བྱེད་པ་དང་འབྲེལ། གསར་དར་དཔལ་འབྱོར་ཁྱབ་ཁོངས་སུ་མ་འཇོག་བྱེད་ཤུགས་ཆེ་རུ་གཏོང་བར་ལྕག་སྐུལ་བྱ་རྒྱུ་ཡིན་ཞེས་བརྗོད།

    མཐའ་མཚམས་ཉོ་ཚོང་ལ་བརྟེན་ནས་མི་དམངས་ཕྱུག་པོ་ཆགས་པར་བྱེད་པ།

    “ཕ་ཡུལ་དུ་མཐའ་མཚམས་ཉོ་ཚོང་ལ་ཞུགས་པས་ཡོང་འབབ་དེ་བས་མང་དུ་སོང་བ”

     མཛའ་གྲོགས་འགག་སྒོ་ནས་བསྒྲལ་རྗེས་ཆུ་ཚོད་6ཡང་མ་འགོར་བར་ཀྲུང་གོའི་ཚོང་ཟོག་ཧོ་ནོ་དབྱི་རུ་འབྱོར་གྱི་ཡོད། དེ་དང་ཆབས་ཅིག ཤིང་འབྲས་པོ་ལུའོ་དང་ཤིང་ཏོག་ཨ་མྲ་སོགས་ཝེ་ཐེ་ནམ་གྱི་ཤིང་འབྲས་སོས་པ་བྱུར་བུར་བླུགས་པའི་རླངས་འཁོར་ཡང་ས་ཆ་འདི་ག་ནས་ཀྲུང་གོར་སྐྱོད་ཀྱི་ཡོད། ཕར་འགྲོ་ཚུར་འོང་བྱེད་མཁན་མང་བའི་འཁྲུག་ཆ་དོད་པའི་རྣམ་པ་དེ་ཀྲུང་ཝེའི་མཐའ་མཚམས་ཁུལ་དུ་རྟག་ཏུ་མཐོང་རྒྱུ་ཡོད།

     ཀྲུང་ཝེ་རྒྱལ་ཁབ་གཉིས་རི་ཆུས་འབྲེལ་བ་དང་། དཔལ་འབྱོར་ཚོང་དོན་མཉམ་ལས་ཟབ་པ། མཐའ་མཚམས་ཉོ་ཚོང་འཕེལ་རྒྱས་མགྱོགས་པ་བཅས་ཡོད། ཀོང་ཤིས་ཀྱིས་ས་བབ་ཀྱི་ལེགས་ཆར་བརྟེན་ནས་ཀྲུང་ཝེའི་དཔལ་འབྱོར་ཚོང་དོན་མཉམ་ལས་ཀྱི་མདུན་ཕྱོགས་དང་སྐར་ཁུང་གི་ནུས་པ་རྒྱུན་ཆད་མེད་པར་བཏོན་ཡོད། ནན་ཉིང་འགག་སྒོས་བསྡོམས་རྩིས་བརྒྱབ་པར་གཞིགས་ན། 2024ལོར་ཀོང་ཤིས་ཀྱིས་ཝེ་ཐེ་ནམ་ལ་ཕྱིར་གཏོང་ནང་འདྲེན་བྱས་པར་མི་དམངས་ཤོག་སྒོར་དུང་ཕྱུར་2955.1ཟིན་པ་དེ་དུས་མཚུངས་ལས་16.4%འཕར་ནས་ཀྲུང་ཝེའི་ཉོ་ཚོང་རིན་ཐང་བསྡོམས་འབོར་གྱི་15.9%བཟུང་ཡོད།

    མ་འཇོག་ལ་བརྟེན་ནས་དམངས་ལ་ཕན་པ་བཏགས་པ།

    “ཝེ་ཀྲུང་ཕྱོགས་གཉིས་པོས་མ་འཇོག་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་བརྒྱབ་ནས་རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་བསྐྲུན་པ”

    ཝེ་ཐེ་ནམ་གྱི་གྲོང་ཁྱེར་གྱི་ཐེག་ཆུང་མེ་འཁོར་དང་པོ་ཅི་ལིང་ནས་ཧོ་ཏུང་ལམ་ཐིག་ལ་ཧོ་ནོ་དབྱིའི་ཐེག་ཆུང་མེ་འཁོར་ལམ་ཐིག་ཨང་2པའང་བརྗོད་ཀྱི་ཡོད། ཀྲུང་གོ་ལྕགས་ལམ་ཅུས་དྲུག་པ་ཚོགས་པ་ཚད་ཡོད་ཀུང་སིས་བསྐྲུན་འགན་འཁུར་བ་དེ་ནི་ཀྲུང་ཝེ་རྒྱལ་ཁབ་གཉིས་ཀྱི“རྒྱུད་གཅིག་ལམ་གཅིག”མཉམ་སྐྲུན་གྱི་མཚོན་རྟགས་རང་བཞིན་གྱི་རྣམ་གྲངས་ཤིག་ཡིན་པ་དང་། 2021ལོའི་ཟླ་11པར་གཉེར་སྐྱོང་བྱེད་འགོ་ཚུགས་ནས་ལམ་ཐག་ཧྲིལ་པོའི་རིང་ཚད་ལ་སྤྱི་ལེ་13ལྷག་ཙམ་ཡོད་པ་དང་བསྡོམས་མེ་འཁོར་བབས་ཚུགས་12བཀོད་སྒྲིག་བྱས་ཡོད། ཧོ་ནོ་དབྱིའི་ལྕགས་ལམ་ཀུང་སིས་བསྡོམས་རྩིས་བརྒྱབ་པར་གཞིགས་ན། ད་ལོའི་ཟླ་3ཚེས་25ཉིན་བར། ལམ་ཐིག་དེས་བསྡོམས་འགྲུལ་པ་མི་ཐེངས་ཁྲི་3400ལྷག་ཙམ་སྐྱེལ་འདྲེན་བྱས་པས་ཧོ་ནོ་དབྱིའི་ལྗང་མདོག་ཤེས་དཔལ་གྱི་གྲོང་ཁྱེར་འཛུགས་སྐྲུན་དང་འགྲིམ་འགྲུལ་ཕྱིར་སྐྱོད་ལེགས་སུ་གཏོང་བར་ནུས་པ་གལ་ཆེན་བཏོན་ཡོད།

     ཉེ་བའི་ལོ་ཤས་རིང་། ཀྲུང་ཝེས་དངོས་སྒྲུབ་མཉམ་ལས་རྒྱུན་ཆད་མེད་པར་གཏིང་ཟབ་ཏུ་བཏང་ནས་མི་དམངས་ཀྱི་བདེ་རྩ་ཆེ་རུ་གཏོང་བའི་མཉམ་ལས་རྣམ་གྲངས་ཁག་གཅིག་མ་འཇོག་བྱས་ནས་བསྐྲུན་ཡོད། ཝེ་ཐེ་ནམ་གྱི་པེ་ཅང་དང་པེ་ཉིང་སོགས་བཟོ་ལས་གྲོང་རྡལ་གལ་ཆེན་དུ་ཀྲུང་གོའི་ནུས་རྒྱུ་གསར་པ་དང་གློག་རྡུལ་བཟོ་སྐྲུན་ཁེ་ལས་ཀྱིས་མ་འཇོག་བྱས་ནས་བསྐྲུན་པའི་དེང་རབས་ཅན་གྱི་ཐོན་ལས་གླིང་གིས་ཐོན་ལས་ཁྱུ་ཚོགས་ཆགས་པར་སྐུལ་ཁྲིད་བྱས་ནས། ས་གནས་དེ་གའི་དཔལ་འབྱོར་འཕེལ་རྒྱས་ལ་གསོན་ཤུགས་བསྣན་ཡོད།