༄༅།།ཞི་ཅིན་ཕིང་དང་རྒྱ་གར་གྱི་ཙུང་ཐུང་མུར་མུ་ཡིས་ཀྲུང་གོ་དང་རྒྱ་གར་དབར་ཕྱི་འབྲེལ་བཙུགས་ནས་ལོ་75འཁོར་བར་རྟེན་འབྲེལ་གློག་འཕྲིན་གཏོང་རེས་གནང་བ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་4ཚེས་1ཉིན་གློག་འཕྲིན་འབྱོར་གསལ། ཟླ་4ཚེས་1ཉིན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་རྒྱ་གར་གྱི་ཙུང་ཐུང་མུར་མུ་ཡིས་རྟེན་འབྲེལ་གློག་འཕྲིན་གཏོང་རེས་གནང་སྟེ། རྒྱལ་ཁབ་གཉིས་པོའི་དབར་ཕྱི་འབྲེལ་བཙུགས་ནས་ལོ་75འཁོར་བར་རྟེན་འབྲེལ་ཞུས་པ་རེད།

ཞི་ཅིན་ཕིང་གིས་གསུངས་དོན། ཀྲུང་གོ་དང་རྒྱ་གར་ནི་གནའ་བོའི་ཤེས་དཔལ་རྒྱལ་ཁབ་དང་། འཕེལ་རྒྱས་འགྲོ་བཞིན་པའི་རྒྱལ་ཁབ་ཆེན་པོ། “གོ་ལ་ཧྲིལ་པོའི་ལྷོ་ཕྱོགས”ཀྱི་ཁོངས་མི་གལ་ཆེན་བཅས་ཡིན་པ་དང་། རྒྱལ་ཁབ་གཉིས་པོ་ཁག་སོ་སོས་དེང་རབས་ཅན་འཛུགས་སྐྲུན་བྱེད་པའི་འགག་རྩའི་དུས་སུ་སླེབས་ཡོད། ཀྲུང་གོ་དང་རྒྱ་གར་གྱི་འབྲེལ་བའི་འཕེལ་རྒྱས་ལོ་རྒྱུས་ལམ་བུ་ལས། ཕན་ཚུན་གྲུབ་འབྲས་ཐོབ་པར་བྱེད་པའི་རོགས་ཟླ་བྱེད་པ་དང“འབྲུག་དང་གླང་ཆེན་མཉམ་བྲོ”ཐུབ་པ་བྱེད་པ་ནི་ཕྱོགས་གཉིས་པོའི་ཡང་དག་པའི་གདམ་ག་ཞིག་ཡིན་པ་མངོན་པ་མ་ཟད། རྒྱལ་ཁབ་གཉིས་པོ་དང་རྒྱལ་ཁབ་གཉིས་པོའི་མི་དམངས་ཀྱི་རྩ་བའི་ཁེ་ཕན་དང་རྦད་དེ་མཐུན་གྱི་ཡོད། ཕྱོགས་གཉིས་པོས་འཐབ་ཇུས་ཀྱི་མཐོ་ཚད་དང་ཕུགས་རྒྱང་རིང་པོའི་ཕྱོགས་ནས་ཀྲུང་གོ་དང་རྒྱ་གར་གྱི་འབྲེལ་བར་ལྟ་སྟངས་འཛིན་པ་དང་ཐག་གཅོད་བྱེད་རྒྱུ་མཐའ་འཁྱོངས་བྱས་ཏེ། ཁྱིམ་མཚེས་རྒྱལ་ཁབ་ཆེན་པོའི་དབར་ཞི་བདེ་མཉམ་གནས་དང་། ཕན་ཚུན་ཡིད་ཆེས་དང་གཉིས་ཕན། ཐུན་མོང་འཕེལ་རྒྱས་བཅས་ཀྱི་མཉམ་གནས་བྱ་ཐབས་མཉམ་དུ་དོན་གཉེར་བྱས་ནས། འཛམ་གླིང་སྣེ་མང་ཅན་དང་རྒྱལ་སྤྱིའི་འབྲེལ་བ་དམངས་གཙོ་ཅན་ལ་ཐུན་མོང་ཐོག་སྐུལ་འདེད་གཏོང་དགོས།

ཞི་ཅིན་ཕིང་གིས་ནན་བཤད་གནང་དོན། ངས་ཙུང་ཐུང་མཁྱེན་ལྡན་མ་དང་མཉམ་དུ་འབད་བརྩོན་བྱས་ནས་རྒྱལ་ཁབ་གཉིས་པོའི་དབར་ཕྱི་འབྲེལ་བཙུགས་ནས་ལོ་75འཁོར་བ་གོ་སྐབས་སུ་བཟུང་སྟེ། ཕྱོགས་གཉིས་པོའི་འཐབ་ཇུས་ནས་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་བ་དང་། ཁྱབ་ཁོངས་ཁག་གི་སྤེལ་རེས་མཉམ་ལས་ལ་ཤུགས་སྣོན་རྒྱག་པ། རྒྱལ་སྤྱིའི་ལས་དོན་གལ་ཆེན་ཁྲོད་འབྲེལ་གཏུག་དང་མཐུན་སྦྱོར་བྱེད་ཟབ་ཏུ་གཏོང་བ། ཀྲུང་གོ་དང་རྒྱ་གར་མཐའ་མཚམས་ས་ཁུལ་གྱི་ཞི་བདེ་དང་བདེ་འཇགས་ཐུན་མོང་ཐོག་སྲུང་སྐྱོང་ཡག་པོ་བྱེད་པ། ཀྲུང་གོ་དང་རྒྱ་གར་གྱི་འབྲེལ་བ་སྐྱོན་བྲལ་དང་བརྟན་པོའི་ངང་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱས་ནས། འཛམ་གླིང་ཞི་བདེ་དར་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་འབུལ་འདོད་ཡོད།

མུར་མུ་ཡིས་གསུངས་དོན། རྒྱ་གར་དང་ཀྲུང་གོ་ནི་ཁྱིམ་མཚེས་རྒྱལ་ཁབ་ཆེན་པོ་གཉིས་ཡིན་པ་དང་། གོ་ལ་ཧྲིལ་པོའི་མི་འབོར་གྱི་གསུམ་ཆ་གཅིག་བཟུང་ཡོད། བརྟན་ལྷིང་དང་། སྔོན་དཔག་ཐུབ་པ། མཛའ་མཐུན་བཅས་ཀྱི་ཕྱོགས་གཉིས་པོའི་འབྲེལ་བས་རྒྱལ་ཁབ་གཉིས་པོ་དང་འཛམ་གླིང་ལ་བདེ་རྩ་བསྐྲུན་རྒྱུ་རེད། ང་ཚོས་རྒྱ་གར་དང་ཀྲུང་གོའི་དབར་ཕྱི་འབྲེལ་བཙུགས་ནས་ལོ་75འཁོར་བ་གོ་སྐབས་སུ་བཟུང་སྟེ། རྒྱ་གར་དང་ཀྲུང་གོའི་འབྲེལ་བ་སྐྱོན་བྲལ་དང་བརྟན་པོའི་ངང་འཕེལ་རྒྱས་འགྲོ་བར་ཐུན་མོང་ཐོག་སྐུལ་འདེད་གཏོང་དགོས།

དེ་ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་དང་རྒྱ་གར་གྱི་ཙུང་ལི་མོ་ཏི་ཡིས་རྟེན་འབྲེལ་གློག་འཕྲིན་གཏོང་རེས་གནང་ཞིང་། ལི་ཆང་གིས་གསུངས་དོན། ཀྲུང་གོ་ཕྱོགས་ཀྱིས་རྒྱ་གར་ཕྱོགས་དང་མཉམ་དུ་འབད་བརྩོན་བྱས་ནས་རྒྱལ་ཁབ་གཉིས་པོའི་དབར་ཕྱི་འབྲེལ་བཙུགས་ནས་ལོ་75འཁོར་བ་གོ་སྐབས་སུ་བཟུང་སྟེ་འཐབ་ཇུས་ཐད་ཕན་ཚུན་ཡིད་ཆེས་བྱེད་ཤུགས་རྒྱུན་ཆད་མེད་པར་ཆེ་རུ་གཏོང་བ་དང་། ཁྱབ་ཁོངས་ཁག་གི་སྤེལ་རེས་མཉམ་ལས་ལ་སྐུལ་འདེད་གཏོང་བ། མཐའ་མཚམས་ཀྱི་གནད་དོན་ཐག་གཅོད་བྱེད་མཁས་པོ་བྱེད་པ། རྒྱལ་ཁབ་གཉིས་པོའི་འབྲེལ་བ་སྐྱོན་བྲལ་དང་བརྟན་པོའི་ངང་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱས་ནས། རྒྱལ་ཁབ་གཉིས་པོའི་མི་དམངས་ལ་བདེ་རྩ་དེ་བས་མང་བ་སྐྲུན་འདོད་ཡོད་ཅེས་གསུངས་པ་རེད།

མོ་ཏི་ཡིས་གསུངས་དོན། རྒྱ་གར་དང་ཀྲུང་གོ་ནི་གནའ་བོའི་ཤེས་དཔལ་རྒྱལ་ཁབ་ཆེན་པོ་གཉིས་ཡིན་པས་མིའི་རིགས་ཀྱི་ལོ་རྒྱུས་འཕེལ་རིམ་ཁྲོད་ནུས་པ་གལ་ཆེན་བཏོན་ཡོད། མིག་སྔར་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་བའི་ལས་འགན་ལྕི་པོ་ཕྲག་ཐོག་ཏུ་ཁུར་ཡོད། རྒྱ་གར་དང་ཀྲུང་གོའི་འབྲེལ་བའི་འཕེལ་རྒྱས་ནི་འཛམ་གླིང་དར་རྒྱས་བརྟན་ལྷིང་ལ་ཕན་པ་མ་ཟད། འཛམ་གླིང་སྣེ་མང་ཅན་མངོན་འགྱུར་ལའང་ཕན་ཐོགས་ཡོད། རྒྱ་གར་དང་ཀྲུང་གོའི་དབར་ཕྱི་འབྲེལ་བཙུགས་ནས་ལོ་75འཁོར་བ་དེས་རྒྱལ་ཁབ་གཉིས་པོའི་འབྲེལ་བ་སྐྱོན་བྲལ་དང་བརྟན་པོའི་ངང་འཕེལ་རྒྱས་ཀྱི་དུས་མཚམས་ལ་སླེབས་པར་སྣེ་ཁྲིད་ཐུབ་ངེས་རེད།

（ཚེ་རིང་བུ་ཁྲིད་ཀྱིས་བསྒྱུར། པ་ཚེས་ཞུས）