༄༅།།མཚོ་སྔོན་ཞིང་ཆེན་གྱི་སྔོ་ཚལ་དང་འབྲི་གཡག་སོགས་ཀྱི་ཐོན་ལས་2025ལོའི་རྒྱལ་ཁབ་ཀྱི་ཞིང་ལས་དང་
ཐོན་ལས་མཉམ་འདྲེས་འཕེལ་རྒྱས་ཀྱི་རྣམ་གྲངས་གཏན་འཁེལ་གྱི་མིང་ཐོའི་ནང་ཚུད་པ།

    འདི་ག་ཚགས་པར་ཁང་དུ་གནས་ཚུལ་འབྱོར་གསལ། མིག་སྔར་གསར་འགོད་པས་མཚོ་སྔོན་ཞིང་ཆེན་ཞིང་ལས་གྲོང་གསེབ་ཐིང་ནས་ཤེས་རྟོགས་བྱས་པར། ཉེ་ཆར། ཞིང་ལས་གྲོང་གསེབ་པུའུ་ཡིས་ཁྱབ་བསྒྲགས་བྱས་པའི་2025ལོའི་ཞིང་ལས་དང་ཐོན་ལས་མཉམ་འདྲེས་འཕེལ་རྒྱས་ཀྱི་རྣམ་གྲངས་གཏན་འཁེལ་གྱི་མིང་ཐོའི་ནང་། ཡུལ་ཤུལ་བོད་རིགས་རང་སྐྱོང་ཀྲོའུ་ཡུལ་ཤུལ་གྲོང་ཁྱེར་འབྲི་གཡག་དེང་རབས་ཞིང་ལས་ཐོན་ལས་གླིང་དང་། གྲང་བསིལ་སྔོ་ཚལ་ཐོན་ལས་ཚོ་འདུས། ཡུལ་ཤུལ་ཀྲོའུ་ཆུ་དམར་ལེབ་རྫོང་གཡུ་སྐེ་གྲོང་རྡལ་འབྲི་གཡག(ཐོན་ལས་སྟོབས་ཆེན་གྲོང་རྡལ) མཚོ་ནུབ་སོག་རིགས་བོད་རིགས་རང་སྐྱོང་ཀྲོའུ་ཐེམ་ཆེན་རྫོང་མཁར་དམར་ཤང་བོད་ལུག(ཐོན་ལས་སྟོབས་ཆེན་གྲོང་རྡལ)བཅས་ཚུད་ཡོད།

    ལོ་མང་རིང་འཕེལ་རྒྱས་དང་འཛུགས་སྐྲུན་བྱས་པ་བརྒྱུད། འབྲི་གཡག་གིས་གཙོས་པའི་སྐྱེ་ཁམས་འབྲོག་ལས་དེ་ཉིད་ཡུལ་ཤུལ་གྲོང་ཁྱེར་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་ཀ་རྟེན་ཐོན་ལས་སུ་གྱུར་ནས་སྐྱེ་ཁམས་སྲུང་སྐྱོང་དང་། མཁོ་སྤྲོད་འགན་ལེན། བདེ་འཇགས་འགན་སྲུང་བཅས་ལ་གཞན་གྱིས་ཚབ་བྱེད་ཐབས་བྲལ་བའི་ནུས་པ་གལ་ཆེན་ཐོན་ཡོད། འབྲི་གཡག་ཐོན་ལས་གཙོ་བོར་བྱས་པའི་ཡུལ་ཤུལ་གྲོང་ཁྱེར་འབྲི་གཡག་དེང་རབས་ཞིང་ལས་ཐོན་ལས་གླིང་ལ་འབྲི་གཡག་མགོ་གྲངས་ཁྲི་30.96དང་། ཐོན་ལས་གླིང་གི་རིན་ཐང་བསྡོམས་འབོར་སྒོར་དུང་ཕྱུར་30.3ལྷག་ཙམ་ཡོད་པ། རྒྱུད་བཟང་ཕྱུགས་རིགས་ཁྱབ་ཚད་89%བཅས་ཟིན་ཏེ། མིག་སྔར་གསོ་ཚགས་དང་། བཤས་གཏོང་བ། ལས་སྣོན། གསོག་འཇོག དབོར་འདྲེན་བཅས་གཞི་གཅིག་ཏུ་འདུས་པའི་ཐོན་ལས་འཁོར་འབྲེལ་ཧྲིལ་པོའི་མ་ལག་ཅིག་ཆགས་ཡོད།

    མཚོ་སྔོན་གྱི་ཁྱད་ལྡན་ལེགས་ཆའི་ཐོན་ལས་ཡིན་པའི་གྲང་བསིལ་སྔོ་ཚལ་ལ་གྲང་ཞིང་བསིལ་བའི་ས་མཐོའི་གནམ་གཤིས་ཐོན་ཁུངས་ཀྱི་ལེགས་ཆ་ལྡན་པས། ལྗང་མདོག་དང་། སྐྱེ་ལྡན། སྤུས་ཀ་དག་པ་བཅས་ཀྱི་ལེགས་ཆ་མངོན་གསལ་དོད་པོ་ཡོད། ཉེ་བའི་ལོ་ཤས་རིང་། མཚོ་སྔོན་ཞིང་ཆེན་གྱིས་གྲང་བསིལ་སྔོ་ཚལ་ཐོན་ལས་ལ་རྒྱབ་སྐྱོར་བྱེད་ཤུགས་མུ་མཐུད་ཆེ་རུ་བཏང་ནས་སྣ་ཁ་འདེམས་པ་དང་། རྟེན་གཞིར་འདེབས་པ། གྲང་ཕྲེང་ཟོག་འགྲེམས། སྤུས་རྟགས་སྐྱེད་སྲིང་སོགས་ཀྱི་ལྷུ་ཚིགས་ནས་གྲང་བསིལ་སྔོ་ཚལ་ཐོན་ལས་གཞི་ཁྱོན་ཅན་དང་། ཚད་གཞི་ཅན། སྤུས་རྟགས་ཅན་བཅས་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་བཏང་ཞིང་། 2024ལོར་ཞིང་ཆེན་ཕྱིར་སྔོ་ཚལ་ཕྱིར་གཏོང་བྱེད་ཚད་ཏུན་ཁྲི་70ལས་བརྒལ་ཡོད་པ་རེད།

    ས་གནས་ཀྱི་ཀ་རྟེན་ཐོན་ལས་ཡིན་པའི་ཆུ་དམར་ལེབ་རྫོང་གཡུ་དགེ་གྲོང་རྡལ་གྱི་འབྲི་གཡག་ཐོན་ལས་ཀྱིས་ས་བབ་མཐོ་བ་དང་། སྦགས་བཙོག་མེད་པའི་རང་བྱུང་འབྲོག་རར་བརྟེན་ནས་དེའི་ཤ་སོས་པ་ཡིན་པ་མ་ཟད། འཚོ་བཅུད་ཕུན་སུམ་ཚོགས་པོ་ཡོད། གཡུ་དགེ་གྲོང་རྡལ་གྱིས་འབྲི་གཡག་གསོ་ཚགས་དང་། ལས་སྣོན། བྲིན་ཚོང་སོགས་ཀྱི་ལྷུ་ཚིགས་ལ་དམིགས་ནས་ཐོན་ལས་འཕེལ་རྒྱས་གཏོང་སྟངས་འཚོལ་ཞིབ་ཧུར་ཐག་བྱས་ཏེ། ཚད་གཞི་ཅན་གྱི་གསོ་སྤེལ་རྟེན་གཞི་འཛུགས་སྐྲུན་ལ་ཤུགས་སྣོན་བརྒྱབ་ནས་འབྲི་གཡག་གི་ཐོན་རྫས་ལས་སྣོན་གྱི་ཆུ་ཚད་མཐོ་རུ་བཏང་བ་དང་། བྲིན་ཚོང་གི་ཐབས་ལམ་རྒྱ་སྐྱེད་བཏང་ནས་འབྲི་གཡག་ཐོན་ལས་རིམ་བཞིན་ཐོན་ལས་ཅན་དང་ཁྲོམ་ར་ཅན་དུ་འགྱུར་བར་སྐུལ་འདེད་བཏང་ཡོད།

    ཐེམ་ཆེན་རྫོང་མཁར་དམར་ཤང་གིས་ཐོན་ཁུངས་ཀྱི་ལེགས་ཆར་གཞི་ཚུགས་ནས་བོད་ལུག་ཐོན་ལས་འཕེལ་རྒྱས་ཤུགས་ཆེན་བཏང་ཡོད། རྒྱུད་པ་གསོ་སྤེལ་ཐད། ཡུལ་ལུག་རྒྱུད་བཟང་གསོ་སྤེལ་རྟེན་གཞི་བཙུགས་པར་དེའི་ཤ་སོས་པ་ཡིན་ལ་འཚོ་བཅུད་ཕུན་སུམ་ཚོགས་པ་དང་། ལུག་དེ་དག་ཀྱང་གྲང་ཟུག་ཆེ་སར་འཚོ་ཐུབ་པ་སོགས་ཀྱི་ཁྱད་ཆོས་ལྡན་པ་དང་། ཐོན་ལས་འཕེལ་རྒྱས་གཏོང་སྟངས་ཐད། “མཉམ་ལས་ཁང་དང་འབྲོག་དུད་ཟུང་དུ་འབྲེལ་བའི”བྱེད་སྟངས་ལ་བརྟེན་ནས་གཞི་ཁྱོན་ཅན་དང་ཚད་ལྡན་ཅན་གྱི་གསོ་ཚགས་བྱས་ཡོད། ཐོན་ལས་འཁོར་འབྲེལ་སྣུར་སྲིང་ཐད། ལུག་ཤ་ལས་སྣོན་ཞིབ་ཚགས་ཀྱི་ཐོན་སྐྱེད་སྒྲུབ་རིམ་བཟོས་ནས་ལུག་ཤ་ཤ་མ་རུས་དང་། ལུག་ཤ་ལྟེབ་སྒྲིལ། སྤུས་ལེགས་རྒྱུ་མ་སོགས་ཡུལ་ལུག་གི་ལས་སྣོན་ཐོན་རྫས་གསར་སྤེལ་བྱས་ནས་ཐོན་ལས་ཀྱི་ཟུར་སྣོན་རིན་ཐང་ཆེ་རུ་བཏང་ཡོད།