ཧོ་དབྱིན།
གསར་འགྱུར་སྤེལ་དུས། 【2025ལོའི་ཟླ་ 04ཚེས་02ཉིན། 09:54】 ཡོང་ཁུངས།:མི་དམངས་ཉིན་རེའི་ཚགས་པར། (རྩོམ་སྒྲིག་འགན་འཁུར་པ། མཁའ་འགྲོ།)
ཟླ་3ཚེས་28ཉིན། ཀྲུའུ་ཞི་ཞི་ཅིན་ཕིང་གིས་པེ་ཅིང་མི་དམངས་ཚོགས་ཁང་ཆེན་མོར་རྒྱལ་སྤྱིའི་བཟོ་ཚོང་ལས་རིགས་ཀྱི་འཐུས་མིར་མཇལ་འཕྲད་གནང་ཞིང་། ཕྱི་རྒྱལ་གྱི་མ་འཇོག་ཁེ་ལས་ཀྱི་གོ་ལ་ཧྲིལ་པོའི་ཏུང་ཧྲི་ཀྲང་དང་། དབུ་བཞུགས་ལག་བསྟར་དཔོན། ཚོང་དོན་མཐུན་ཚོགས་ཀྱི་འཐུས་མི་བཅས་མི་40ལྷག་ཙམ་མཇལ་འཕྲད་ལ་ཞུགས་ཡོད། ཀྲུའུ་ཞི་ཞི་ཅིན་ཕིང་གིས། ཕྱི་རྒྱལ་གྱི་མ་འཇོག་ཀུང་སི་ནི་ཀྲུང་གོའི་ལུགས་ཀྱི་དེང་རབས་ཅན་ནང་ཞུགས་མཁན་གལ་ཆེན་དང་། ཀྲུང་གོའི་སྒྱུར་བཅོས་སྒོ་དབྱེ་དང་གསར་གཏོད་གསར་སྐྲུན་ནང་ཞུགས་མཁན་གལ་ཆེན་ཞིག ཀྲུང་གོས་འཛམ་གླིང་ལ་འབྲེལ་མཐུད་དང་། དཔལ་འབྱོར་གོ་ལ་ཅན་མཉམ་འདྲེས་ཁྲོད་ཞུགས་མཁན་གལ་ཆེན་ཞིག་བཅས་ཡིན་ཞེས་གསུངས་པ་དང་། ཁོང་གིས། “ཀྲུང་གོ་ནི་སྔོན་་མ་ནས་ད་བར་ཕྱི་རྒྱལ་གྱི་ཚོང་པ་བློ་མགུ་བ་དང་། བདེ་འཇགས་ལྡན་པ། བྱེད་རིན་ཡོད་པ་བཅས་ཀྱི་མ་འཇོག་བྱ་ཡུལ་ཞིག་ཡིན་ལ་མ་འོངས་ཀྱང་དེ་ལྟར་རེད། ཀྲུང་གོ་དང་མཉམ་དུ་སྐྱོད་པ་ནི་གོ་སྐབས་ཐོབ་པ་རང་ཡིན་པས། ཀྲུང་གོར་ཡིད་ཆེས་བྱེད་པ་ནི་འབྱུང་འགྱུར་ལ་ཡིད་ཆེས་བྱས་པ་དང་། ཀྲུང་གོར་མ་འཇོག་བྱེད་པ་ནི་འབྱུང་འགྱུར་ལ་མ་འཇོག་བྱས་པ་ཞིག་རེད”ཅེས་ནན་བཤད་གནང་ཡོད།
“ཀྲུང་གོའི་འཕེལ་རྒྱས་ནི་འཛམ་གླིང་དཔལ་འབྱོར་གྱི་ལྟེ་བའི་སྒུལ་ཤུགས་ཤིག་ཡིན་པའི”ཐད་རྒྱལ་སྤྱིའི་བཟོ་ཚོང་ལས་རིགས་ཀྱིས་ངོས་འཛིན་གཅིག་མཐུན་བྱུང་ཡོད། ཉེ་ཆར། ཀྲུང་གོའི་འཕེལ་རྒྱས་མཐོ་རིམ་གླེང་སྟེགས་ཀྱི་2025ལོའི་ལོ་ཚོགས་དང་། པོ་ཨའོ་ཨེ་ཤེ་ཡའི་གླེང་སྟེགས་ཀྱི་2025ལོའི་ལོ་ཚོགས། 2025ལོའི་ཀྲུང་ཀོན་ཚུན་གླེང་སྟེགས་ཀྱི་ལོ་ཚོགས་སོགས་རྒྱལ་སྤྱིའི་རང་བཞིན་གྱི་ཚོགས་འདུ་སྔ་རྗེས་སུ་འཚོགས་པ་དང་། རྒྱལ་སྒྲོལ་ཁེ་ལས་ཀྱི་མཐོ་རིམ་དོ་དམ་པ་ཚོགས་འདུར་ཞུགས་པའི་གཟུགས་བརྙན་མཐོང་རྒྱུ་ཡོད་པ་ལས། གསར་གཏོད་ཀྱི་གསོན་ཤུགས་དང་སྒོ་དབྱེའི་བསམ་བཀོད་ཀྱིས་གོ་ལ་ཧྲིལ་པོའི་དཔལ་འབྱོར་ཐད་ཐོན་པའི་ཀྲུང་གོའི་དམིགས་བསལ་རིན་ཐང་ལ་འགྲེལ་བཤད་གསོན་ཉམས་དོད་པོ་བརྒྱབ་ཡོད། འཛམ་གླིང་དཔལ་འབྱོར་གྱི་འཕར་གཞིར་ལེགས་སྐྱེས་འབུལ་མཁན་གཙོ་བོ་ཡིན་པའི་ཀྲུང་གོས་ཀྲུང་གོའི་ལུགས་ཀྱི་དེང་རབས་ཅན་གྱི་འཛུགས་སྐྲུན་ལ་བརྟེན་ནས་འཛམ་གླིང་ལ་བརྟན་ལྷིང་རང་བཞིན་བསྣན་ཡོད།
ཡངས་པའི་ཁྲོམ་རའི་བར་མཐོངས་དང་། བརྟན་པའི་སྲིད་ཇུས་ཀྱི་སྔོན་དཔག འཐུས་སྒོ་ཚང་བའི་འཕེལ་རྒྱས་ཀྱི་ཁོར་ཡུག་བཅས་ཡོད་པ་ལས་ཀྲུང་གོ་འདི་ཉིད་ཕྱི་རྒྱལ་མ་འཇོག་ཁེ་ལས་ཀྱི་མ་འཇོག་ལས་དར་བྱ་ཡུལ་ས་རྒྱུ་གཤིན་པོ་ཞིག་ཏུ་གྱུར་ཡོད། འདི་ལོ་ནས་བཟུང་། 《2025ལོའི་ཕྱི་ཕྱོགས་མ་དངུལ་བརྟན་པོ་ཡོང་བའི་བྱ་སྤྱོད་ཇུས་གཞི》ཡི་ནང་སྲིད་ཇུས་ཀྱི་བྱ་ཐབས་ཁག་20བཏོན་པ་ནས《སྲིད་གཞུང་གི་ལས་དོན་སྙན་སྒྲོན》ནང་ཕྱི་ཕྱོགས་མ་དངུལ་བརྟན་པོ་ཡོང་བའི་སྲིད་ཇུས་ལག་ལེན་བསྟར་ཤུགས་ཆེ་རུ་གཏོང་དགོས་ལུགས་བསྟན་པའི་བར་ཀྲུང་གོས“ནང་འདྲེན”གྱི་འགག་སྒོ་དམའ་རུ་གཏོང་བ་དང་། “མཐོ་བའི”ཚད་གཞི་དང་འབྲེལ་མཐུད། “སྐུལ་འདེད”ཀྱི་ཆུ་ཚད་མཐོ་རུ་གཏོང་བ། “སྤུས་ལེགས”ཀྱི་ཁོར་ཡུག་གཏོད་པ་སོགས་ཐད་མུ་མཐུད་ཤུགས་སྣོན་བརྒྱབ་སྟེ། རང་རྟོགས་ངང་འཛམ་གླིང་ལ་གཞི་ཁྱོན་ཆེན་པོས་ཁྲོམ་ར་དར་བའི་གོ་སྐབས་མཉམ་སྤྱོད་ཧུར་ཐག་བྱས་ཡོད། རྒྱལ་སྒྲོལ་ཁེ་ལས་མང་པོའི་མཐོ་རིམ་དོ་དམ་པས“ཀྲུང་གོའི་ཡངས་པའི་གོ་སྐབས་དང་འཚར་ལོངས་ཀྱི་བར་མཐོངས་ལས་མི་རྣམས་ལ་ངར་ཤུགས་སྐྱེད་ཐུབ”པ་དང་། “ཀྲུང་གོའི་ཁྲོམ་རར་མ་འཇོག་བྱེད་པ་ནི་འོས་ཤིང་ཡང་དག་པའི་གདམ་ག་ཞིག་ཡིན”“ཀྲུང་གོའི་ཁྲོམ་ར་ནི‘གདམ་བྱ་ཙམ’མིན་པར‘འདེམས་དགོས་ངེས’ཤིག་ཡིན”ཞེས་གཅིག་མཇུག་གཉིས་མཐུད་ངང་ཤོད་པའི་ཐུན་མོང་གི་ངོས་འཛིན་དེ་དག་མ་འཇོག་གི་བྱ་སྤྱོད་དངོས་ཤིག་ཏུ་འགྱུར་བཞིན་ཡོད།
རྒྱལ་སྒྲོལ་ཀུང་སིའི་མཐོ་རིམ་དོ་དམ་པའི་ངོས་ནས་བལྟས་ཚེ། སྲུང་སྐྱོབ་རིང་ལུགས་ཤུགས་ཇེ་ཆེར་འགྲོ་བའི་རྒྱབ་ལྗོངས་འོག ཀྲུང་གོས་སྒོ་མོ་འབྱེད་རྒྱ་ཟམ་མི་ཆད་པར་ཆེ་རུ་བཏང་ནས་གོ་ལ་ཧྲིལ་པོའི་དཔལ་འབྱོར་ལ་བརྟན་ལྷིང་ཡོང་གཞི་བསྣན་པས། མ་འཇོག་བྱ་ཡུལ་བརྟན་པོ་དང་མ་འཇོག་ལས་དར་གྱི་ས་རྒྱུ་གཤིན་པོ་ཞིག་ཏུ་གྱུར་ཡོད། ཀྲུང་གོས་འཛམ་གླིང་ཚོང་དོན་རྩ་འཛུགས་ལྟེ་བར་བྱས་པའི་ཕྱོགས་མང་ཚོང་དོན་སྒྲིག་གཞི་སྲུང་སྐྱོང་མཐའ་འཁྱོངས་བྱས་ནས་རང་རྟོགས་ངང་རྒྱལ་སྤྱིའི་མཐོ་རིམ་ཚད་གཞིའི་དཔལ་འབྱོར་ཉོ་ཚོང་གི་སྒྲིག་སྲོལ་དང་འབྲེལ་མཐུད་བྱས་ཐོག 《ས་ཁོངས་སུ་ཕྱོགས་ཡོངས་ནས་དཔལ་འབྱོར་རོགས་ཟླའི་འབྲེལ་བའི་གྲོས་མཐུན》ལས་བྱུང་བའི་ཕན་པ་བསྐྲུན་ནས་ཚོང་དོན་རོགས་ཟླ་སྣ་མང་གོ་ལ་ཧྲིལ་པོའི་རྒྱལ་ཁབ་230ལྷག་ཙམ་དང་ས་ཁུལ་ལ་ཁྱབ་རྒྱུར་སྐུལ་འདེད་གཏོང་བ་སོགས་བྱས་ཏེ། ཀྲུང་གོས་རྒྱལ་སྤྱིའི་བཟོ་ཚོང་ལས་རིགས་དང་ལག་གདང་སྦྲེལ་ནས་མཉམ་དུ་ཕྱོགས་མང་ཚོང་དོན་སྒྲིག་གཞི་སྲུང་སྐྱོང་དང་། མཉམ་དུ་གོ་ལ་ཧྲིལ་པོའི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་བརྟན་པོ་ཡོང་བར་སྲུང་སྐྱོང་། མཉམ་དུ་སྒོ་དབྱེའི་མཉམ་ལས་ཀྱི་རྒྱལ་སྤྱིའི་ཁོར་ཡུག་སྲུང་སྐྱོང་བཅས་ཀྱི་སྒོ་ནས་དཔལ་འབྱོར་གོ་ལ་ཅན་ལེགས་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་བཏང་ཡོད།
ཀྲུང་གོས་བློ་བརྟན་འགྱུར་མེད་ངང་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་སྒོ་དབྱེ་མཐའ་འཁྱོངས་བྱས་ནས་རྒྱལ་ཁབ་ཁག་གི་ཁེ་ལས་ཀྲུང་གོར་མ་འཇོག་ལ་ཡོང་རྒྱུར་དགའ་བསུ་ཞུས་ཏེ། འབྱུང་འགྱུར་འཆར་འགོད་ཀྱིས་གོ་ལ་ཧྲིལ་པོའི་དཔལ་འབྱོར་བརྟན་པོའི་ངང་འཕེལ་རྒྱུར་མཉམ་དུ་སྐུལ་འདེད་བཏང་ནས་གཉིས་ཁེ་གཉིས་ཕན་ཁྲོད་འཕེལ་རྒྱས་སྔར་བས་ཆེ་བ་ཡོང་བར་བྱ་རྒྱུ་རེད།