༄༅།།“ཨེ་ཤེ་ཡའི་ས་ཁོངས་དཔལ་འབྱོར་འཕེལ་རྒྱས་ཆེད་གསོན་ཤུགས་གསར་པ་བསྣན་པ”

    འདི་ག་ཚགས་པར་གྱི་གསར་འགོད་པ། ལིའུ་ཀོ

    “ན་ནིང་། ཀྲུང་གོའི་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་དུས་མཚུངས་ལས་5%འཕར་ཏེ། ཀྲུང་གོའི་དཔལ་འབྱོར་བརྟན་ཐོག་ཡར་འཕེལ་བྱུང་ཞིང་། དཔལ་འབྱོར་འཕེལ་རྒྱས་ཀྱི་དམིགས་ཚད་མངོན་གྱུར་བྱུང་བས་འཕར་ཚད་འཛམ་གླིང་གི་དཔལ་འབྱོར་སྡེ་གཞིའི་མདུན་གྲལ་དུ་སླེབས་ཡོད” པོ་ཨའོ་ཨེ་ཤེ་ཡའི་གླེང་སྟེགས་2025ལོའི་ལོ་ཚོགས་ལ་ཞུགས་མཁན་ཐེ་ལན་ཀྲེང་ཏ་ཚོགས་པའི་བསླབ་རྒན་ཏུང་ཧྲི་ཀྲང་གཞོན་པ་ཤེ་དབྱི་ཡིས་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས“ཀྲུང་གོའི་དཔལ་འབྱོར་རྒྱུན་མཐུད་ལེགས་པའི་ཕྱོགས་སུ་འཕེལ་རྒྱས་ཕྱིན་ནས་ཨེ་ཤེ་ཡའི་ས་ཁོངས་དཔལ་འབྱོར་འཕེལ་རྒྱས་ཆེད་གསོན་ཤུགས་གསར་པ་བསྣན་པས། དུས་ཡུན་རིང་པོ་ཀྲུང་གོར་ཚོང་གཉེར་བྱེད་བཞིན་པའི་ཕྱི་རྒྱལ་གྱི་མ་འཇོག་ཁེ་ལས་སེམས་ཤུགས་ཀྱིས་ཁེངས་ཡོད”ཅེས་བརྗོད།

    པོ་ཨའོ་ཨེ་ཤེ་ཡའི་གླེང་སྟེགས་2025ལོའི་ལོ་ཚོགས་དེ་ཟླ་3ཚེས་25ནས་28ཉིན་བར་ཧའེ་ནན་པོ་ཨའོ་རུ་འཚོགས་པ་དང་། འདི་ལོའི་གླེང་སྟེགས་ཀྱི་ལོ་ཚོགས་ཨེ་ཤེ་ཡའི་འཕེལ་རྒྱས་ལ་དམིགས་པ་དང་དུས་མཚུངས་སུ་གོ་ལ་ཧྲིལ་པོའི་གནད་དོན་གལ་ཆེན་ལ་དོ་ཁུར་ཟབ་མོ་བྱས་ཏེ། རྒྱལ་སྤྱིའི་སྤྱི་ཚོགས་ཀྱིས་ཐུན་མོང་འཕེལ་རྒྱས་དོན་གཉེར་དང་ཐུན་མོང་འབྱུང་འགྱུར་གཏོད་པར་སྐུལ་འདེད་གཏོང་རྒྱུ་རེད། ཤེ་དབྱི་ཡིས། “གླེང་སྟེགས་ཀྱི་རྡོ་རྗེ་ཕ་ལམ་རིམ་པའི་ཁོངས་མི་ཡིན་པའི་ངོས་ནས། ཐེ་ལན་ཀྲེང་ཏ་ཚོགས་པས་ཚོགས་འདུར་ལོ་མང་བསྟུད་མར་ཞུགས་པས་གླེང་སྟེགས་ལ་ཧུར་ཐག་ཞུགས་མཁན་གྱི་གྲས་ཤིག་ཡིན། མིག་སྔར། འཛམ་གླིང་གི་དུས་བབ་ལ་འཕོ་འགྱུར་ཆེན་པོ་བྱུང་བ་དང་ལེགས་སྒྲིག་ཆེན་པོ་བྱེད་བཞིན་ཡོད་པས། ཨེ་ཤེ་ཡའི་འཕེལ་རྒྱས་དང་འཛམ་གླིང་གི་འབྱུང་འགྱུར་དབར་འབྲེལ་བ་ཟབ་མོ་ཡོད་པ་དང་། གོ་ལ་ཧྲིལ་པོའི་མཉམ་ལས་ལ་སྐུལ་འདེད་གཏོང་བར་ཀྲུང་གོའི་འཕེལ་རྒྱས་ཀྱིས་དོན་སྙིང་གལ་ཆེན་ཐོན་གྱི་ཡོད། པོ་ཨའོ་ཨེ་ཤེ་ཡའི་གླེང་སྟེགས་2025ལོའི་ལོ་ཚོགས་འཚོགས་པ་དེས་ཕྱོགས་ཁག་དབར་གྱི་སྤེལ་རེས་གླེང་མོལ་ལ་སྐུལ་འདེད་གཏོང་བ་དང་མཉམ་ལས་ལ་སྐུལ་སྤེལ་གཏོང་བར་ཕན་པ་ཡོད”ཅེས་བརྗོད།

    པོ་ཨའོ་ཨེ་ཤེ་ཡའི་གླེང་སྟེགས་ཀྱི་ལས་སྟེགས་བརྒྱུད། ཐེ་ལན་ཀྲེང་ཏ་ཚོགས་པར་མཉམ་ལས་གྲུབ་འབྲས་མི་ཉུང་བ་ཐོབ་ཡོད། ཤེ་དབྱི་ཡིས། ཀྲེང་ཏ·ཤིང་ལུང་ཀོག་ཧྥེ་རིག་གནས་གླིང་དེ་གླེང་སྟེགས་ཀྱི་ལོ་ཚོགས་སྐབས་སྒྲོམ་གཞིའི་གྲོས་མཐུན་ཡི་གེ་བཞག་པ་ཞིག་རེད། ཕྱིས་སུ་ཐེ་ལན་ཀྲེང་ཏ་ཚོགས་པས་ས་གནས་དེ་གར་མ་འཇོག་དང་མཉམ་ལས་བྱེད་ཤུགས་སྔར་བས་ཆེ་རུ་བཏང་སྟེ་ཧའེ་ནན་རང་མོས་ཚོང་དོན་གྲུ་ཁ་འཛུགས་སྐྲུན་ལ་སྐུལ་འདེད་གཏོང་ཆེད་ལེགས་སྐྱེས་འབུལ་གྱི་ཡིན་ཞེས་བརྗོད།