༄༅།།ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས།《ཡུན་གནས་ཀྱི་གཞི་རྩའི་ཞིང་ཁ་རིམ་བཞིན་ཚད་གཞི་མཐོ་བའི་ཞིང་ཁར་བསྐྲུན་རྒྱུའི་ལག་བསྟར་ཇུས་གཞི》བཀྲམ་པ།

ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་30ཉིན་གློག་འཕྲིན་འབྱོར་གསལ། ཉེ་ཆར། ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《ཡུན་གནས་ཀྱི་གཞི་རྩའི་ཞིང་ཁ་རིམ་བཞིན་ཚད་གཞི་མཐོ་བའི་ཞིང་ཁར་བསྐྲུན་རྒྱུའི་ལག་བསྟར་ཇུས་གཞི》བཀྲམ་ནས་བརྡ་ཐོ་བཏང་སྟེ་ས་ཁུལ་ཁག་དང་སྡེ་ཚན་ཁག་གིས་དོན་དངོས་དང་ཟུང་འབྲེལ་བྱས་ནས་ལག་བསྟར་དོན་འཁྱོལ་ནན་ཏན་བྱེད་དགོས་པའི་བླང་བྱ་བཏོན་ཡོད།

《ཇུས་གཞིའི》ནང་བླང་བྱ་བཏོན་དོན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་དང་། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ལག་བསྟར་གཏིང་ཟབ། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་། གནད་ལ་འཁེལ་བ།  ཕྱོགས་ཡོངས་བཅས་ཀྱི་སྒོ་ནས་ལག་བསྟར། འཕེལ་རྒྱས་ཀྱི་བཀོད་པ་གསར་པ་མགྱོགས་མྱུར་བསྐྲུན་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཤུགས་ཆེན་གཏོང་བ། ཞིང་བརྟེན་འབྲུ་གསོག་དང་རྩལ་བརྟེན་འབྲུ་གསོག་འཐབ་ཇུས་ལག་བསྟར་གཏིང་ཟབ། འབྲུ་རིགས་དང་ཞིང་ལས་ཐོན་རྫས་གལ་ཆེན་གྱི་ཐོན་སྐྱེད་ནུས་པ་ཆེ་རུ་གཏོང་རྒྱུ་ལས་འགན་ཨང་དང་པོར་བརྩི་བ། ཚད་གཞི་མཐོ་བའི་ཞིང་ཁ་འཛུགས་སྐྲུན་དང་། ཞིབ་བཤེར་རྩིས་ལེན། གཡོག་བྱེད་བཅས་ཀྱི་ལམ་སྲོལ་འཐུས་སྒོ་ཚང་དུ་གཏོང་བ། འཛུགས་སྐྲུན་བཀོད་པ་ལེགས་སུ་གཏོང་བ། འཛུགས་སྐྲུན་དུས་མཚམས་ཁ་གསལ་བཟོ་བ། མ་འཇོག་བྱེད་ཚད་མང་དུ་གཏོང་བ་བཅས་བྱས་ཏེ། གསར་སྐྲུན་དང་སྒྱུར་བཀོད་གལ་ཆེ་མཉམ་དུ་འཇོག་པ་དང་། གྲངས་འབོར་དང་སྤུས་ཚད་གལ་ཆེ་མཉམ་དུ་འཇོག་པ། འཛུགས་སྐྲུན་དང་གཡོག་བྱེད་གལ་ཆེ་མཉམ་དུ་འཇོག་པ་བཅས་བྱས་ནས། ཆ་རྐྱེན་འཛོམས་པའི་རྨོ་ཞིང་དང་ལྷག་པར་དུ་ཡུན་གནས་ཀྱི་གཞི་རྩའི་ཞིང་ཁ་དེ་རྨོ་འདེབས་ལ་འཚམ་པ་དང་། ཐན་ཞོད་བྱུང་ཡང་བསྡུ་ཐུབ་པ། ཐོན་མཐོ་ཐོན་བརྟན་བཅས་ཀྱི་དེང་རབས་ཅན་གྱི་ཞིང་ཁར་བསྐྲུན་ནས་འབྲུ་རིགས་བདེ་འཇགས་ཀྱི་རྨང་གཞི་སྔར་བས་བརྟན་དུ་གཏོང་དགོས།

དམིགས་ཚད་གཙོ་བོ་ནི། 2030ལོར་སླེབས་སྐབས་ཚད་གཞི་མཐོ་བའི་ཞིང་ཁ་མུའུ་དུང་ཕྱུར་13.5བསྐྲུན་རྒྱུ་དང་། རིམ་རྩིས་བྱས་ན་མུའུ་དུང་ཕྱུར་2.8སྒྱུར་བཀོད་རིམ་སྤོར་བྱ་རྒྱུ། གཅིག་གྱུར་འཆར་འགོད་དང་དུས་མཉམ་དུ་ཆུ་གྲོན་ཆུང་གི་ཆུ་འདྲེན་བྱེད་ཐབས་ལག་བསྟར་བྱ་རྒྱུ། ཆུ་གྲོན་ཆུང་གི་ཆུ་འདྲེན་རྒྱ་ཁྱོན་མུའུ་ཁྲི་8000མང་དུ་གཏོང་རྒྱུ་བཅས་དང་། 2035ལོར་སླེབས་སྐབས་ཆ་རྐྱེན་འཛོམས་པའི་ཡུན་གནས་ཀྱི་གཞི་རྩའི་ཞིང་ཁ་ཚང་མ་ཚད་གཞི་མཐོ་བའི་ཞིང་ཁར་བསྐྲུན་རྒྱུ་དང་། རིམ་རྩིས་བྱས་ན་མུའུ་དུང་ཕྱུར་4.55ལ་སྒྱུར་བཀོད་རིམ་སྤོར་བྱ་རྒྱུ། ཆུ་གྲོན་ཆུང་གི་ཆུ་འདྲེན་རྒྱ་ཁྱོན་མུའུ་དུང་ཕྱུར་1.3ཟིན་པ་བྱ་རྒྱུ་བཅས་རེད།