༄༅།།རྒྱལ་ཡོངས་ཀྱི་སྲིད་གྲོས་ཨུ་ཡོན་ཅིན་ཧྭ་ཡིས་གསུངས་དོན། “གྲོས་འགོ་ཡག་པོར་རྩམ་པའི་བྲོ་བ་ལྡན་དགོས”

འདི་ག་ཚགས་པར་གྱི་གསར་འགོད་པ། ཅ་ཧྥུང་ཧྥུང་།

མཚོ་སྔོན་ཞིང་ཆེན་གཏེར་ལེན་ཁ་གྲོང་ཁྱེར་ཧའོ་ཤིང་ཧྭ་ཡོན་ཁུལ་ཆུང་གི་བསིལ་ཁང་འོག་ཏུ་ཁྲོམ་གཞུང་དོན་གཅོད་ཁང་གི་ལས་དོན་མི་སྣ་དང་། སྡེ་ལས་ཀྱི་ལས་དོན་མི་སྣ། ཁུལ་ཆུང་གི་གྲོང་མིའི་འཐུས་མི་བཅས་མཉམ་དུ་སྒོར་སྒོར་བྱས་ནས་བསྡད་དེ་ཁུལ་ཆུང་གི་བཙོག་ཆུ་འབུད་གཏོང་སྦུག་དྲ་སྒྱུར་བཟོའི་འཆར་གཞིའི་ཐད་བསམ་འཆར་འདོན་བཞིན་ཡོད་པ་དང་། དེའི་འཁྲིས་སུ་རྒྱལ་ཡོངས་ཀྱི་སྲིད་གྲོས་ཨུ་ཡོན་དང་མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཀྲོའུ་ཡི་སྡོད་ཁང་འཛུགས་སྐྲུན་ཅུས་ཀྱི་ཅུས་ཀྲང་ཅིན་ཧྭ་ཡིས་ནན་ཏན་ངང་གསན་ཞོར་དུ་ཟིན་བྲིས་འགོད་བཞིན་ཡོད།

ཅིན་ཧྭ་ཡིས། “འདྲི་རྟོགས་བྱེད་པར་སྐྱོད་རིང་ང་ཚོས་ས་བབ་མཐོ་བའི་གྲོང་ཁྱེར་དང་གྲོང་རྡལ་ཁག་གཅིག་ལ་ས་རྒྱ་ཆེ་བ་དང་འཁྱགས་སའི་རིམ་པ་མང་བ་སོགས་ཀྱི་ཚོད་འཛིན་ཕོག་ནས་ས་འོག་སྦུག་ལམ་འཛུགས་སྐྲུན་ཅུང་རྗེས་ལུས་ཡིན་པ་དང་ས་འོག་སྦུག་ལམ་མང་ཆེ་བ་ཐད་ཀར་སྦས་པ་ཤ་སྟག་ཡིན་པས། དུས་ཚོད་རིང་པོ་ཕྱིན་ན་སྦུག་དྲ་བརྡོལ་བ་དང་ས་འོག་གི་ཆུ་བཙོག་ཆུ་འབུད་གཏོང་སྦུག་དྲར་འཛུལ་བ་སོགས་ཀྱི་གནས་ཚུལ་ཐོན་པ་ཤེས་བྱུང་། དེས་ན་ད་ལོར་ངས་ས་མཐོའི་གཙོ་གནད་གྲོང་ཁྱེར་གྱི་ཆུ་འབུད་སྦུག་དྲ་སྒྱུར་བཟོར་རྒྱབ་སྐྱོར་བྱ་རྒྱུའི་སྐོར་གྱི་གྲོས་གཞི་གྲ་སྒྲིག་བྱས་ཡོད། ཆུ་འབུད་སྦུག་དྲ་སྒྱུར་བཟོ་དང་། བཙོག་ཆུ་གཙང་གསིང་སྒྲིག་བཀོད་འཐུས་ཚང་། གད་སྙིགས་སྦས་ས་བཟོ་བ་སོགས་ལ་ཤུགས་བརྒྱབ་སྟེ། ས་བབ་མཐོ་བའི་གྲོང་ཁྱེར་དང་གྲོང་རྡལ་གྱི་རྨང་གཞིའི་སྒྲིག་བཀོད་ལེགས་སུ་བཏང་ནས་གཙང་གསུམ་ཆུ་འགོ་དེ་བས་ལེགས་པའི་སྒོ་ནས་སྲུང་སྐྱོང་ཐུབ་རྒྱུའི་རེ་བ་བྱེད་ཀྱི་ཡོད”ཅེས་གསུངས་པ་རེད།

ཅིན་ཧྭ་ཡི་ཕ་ཡུལ་མཚོ་ནུབ་ཀྲོའུ་མཚོ་བོད་ས་མཐོའི་བྱང་རྒྱུད་དུ་གནས་ཤིང་། བྱེ་ཐང་རྒྱ་ཆེ་ཞིང་ཆར་ཆུ་ཉུང་བའི་སྒང་ལ་རྟག་ཏུ་ཐན་པ་བསྟན་གྱི་ཡོད། “ཆུང་བྱིས་པའི་དུས་ནས་ངས་ཡངས་ཤིང་རྒྱ་ཆེ་བའི་ས་ཆ་འདིར་ཞིང་ཁ་འདེབས་ཐུབ་ན་འགྱིང་ངེར་གནས་པའི་གངས་རིའི་འོད་མདངས་གསེར་མདོག་གི་གྲོ་ཞིང་དང་པད་ཞིང་ལ་འཕྲོས་ནས་ཡིད་དུ་འོང་བའི་མཛེས་ལྗོངས་ཤིག་ཆགས་ངེས་རེད་བསམ་གྱི་ཡོད”ཅེས་ཅིན་ཧྭ་ཡིས་གསུངས་པ་རེད། དེ་ལྟར་ཁོང་གིས་ཡིད་ཀྱི་འདུན་པ་སྙིང་ཁར་བཅངས་ཏེ་རང་འགུལ་ངང་འབྲེལ་ཡོད་སྡེ་ཚན་དང་འབྲེལ་བ་བྱས་ནས་ཁེངས་སྐྱུང་གིས་ཆེད་ལས་མི་སྣར་དེ་དོན་བློ་འདྲི་བྱས། བརྟག་དཔྱད་ཞིབ་འཇུག་བྱས་པ་བརྒྱུད། ཁོང་གིས་མཚོ་ནུབ་ཀྲོའུ་ལ་ད་དུང་གསར་སྤེལ་བྱས་མེད་པའི་ས་ཞིང་བ་ཚྭ་ཅན་མུའུ་ཁྲི་4386.25ཡོད་པར་གསར་སྤེལ་བེད་སྤྱོད་ཀྱི་གཏིང་ཤུགས་ཧ་ཅང་ཆེན་པོ་ལྡན་པ་ཤེས་རྟོགས་བྱུང་ཡོད། “གལ་ཏེ་བེད་མེད་དུ་ལུས་པའི་རྨོ་ཞིང་ཐོན་ཁུངས་དེ་དག་བེད་སྤྱོད་ཡག་པོ་ཐུབ་ན། ཞིང་ཆེན་ཡོངས་ཀྱི་རྨོ་ཞིང་གི་སྤྱི་འབོར་མང་དུ་འགྲོ་རྒྱུ་དང་། རྨོ་ཞིང་ཐོན་ཁུངས་ཀྱི་ཤོང་ཚད་ཆེ་རུ་དང་། སྤུས་ཚད་ལེགས་སུ། ཕན་འབྲས་ཆེ་རུ་བཅས་གཏོང་བར་དོན་སྙིང་གལ་ཆེན་ལྡན་པ་མ་ཟད། ཚྭ་འདམ་གཞོང་སའི་སྐྱེ་ཁམས་ཁོར་ཡུག་ཀྱང་ལེགས་སུ་ཤུགས་ཆེན་འགྲོ་ངེས་ཡིན”ཞེས་ཅིན་ཧྭ་ཡིས་གསུངས་པ་རེད། དེ་རྗེས་ཁོང་གིས་དེའི་རྨང་གཞིའི་ཐོག《མཚོ་ནུབ་ཀྲོའུ་ཡི་ཚྭ་འདམ་གཞོང་སའི་ས་ཞིང་བ་ཚྭ་ཅན་ཕྱོགས་བསྡུས་གསར་སྤེལ་བེད་སྤྱོད་ལ་རྒྱབ་སྐྱོར་བྱ་རྒྱུའི་སྐོར་གྱི་གྲོས་འགོ》བྲིས་ཏེ། ཚན་རྩལ་གྱི་སྟོབས་ཤུགས་ལ་བརྟེན་ནས་ས་ཞིང་བ་ཚྭ་ཅན་དེ་དག་མཚོ་ནུབ་ཀྱི་ཞིང་ས་གཤིན་པོར་འགྱུར་རྒྱུའི་རེ་བ་གནང་གི་ཡོད།

ཅིན་ཧྭ་ཡིས། “ཨུ་ཡོན་གྱི་ཐོབ་ཐང་ལ་གཅེས་སྤྲས་བྱེད་རིན་ཡོད་ལ། ཨུ་ཡོན་གྱི་འགན་འཁྲི་དེ་བས་ལྕི་པོ་ཡོད། མི་དམངས་ཁྲོད་རྩ་བ་ཚུགས་པ་དང་སྤྱི་ཡོངས་ལ་དམིགས་ཚེ། མཚོ་བོད་ས་མཐོའི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་གཞི་ནས་སྟོབས་ཤུགས་ལེགས་སྐྱེས་སུ་འབུལ་ཐུབ”ཅེས་གསུངས་པ་རེད།

（སྐལ་མཆོག་གིས་བསྒྱུར། སྤེན་ཚེས་ཞུས）