དཔྱིད་ཀྱི་རླུང་བུ་དལ་གྱིས་ལྡང་། འབྲོག་པའི་སེམས་པ་སྐྱིད་ལྷང་ལྷང་།

འདི་ནི་དཀོན་ལོ་ཚང་གོང་མ་གྲོང་ཚོའི་ཞིང་འབྲོག་ལས་དང་རིག་གནས་བསམ་བཀོད་ཀྱི་ཐོན་རྫས་ཚོང་ཁང་ཡིན་པ།

འདི་ག་ཚགས་པར་གྱི་གསར་འགོད་པ། ཆའོ་ཏུང་།

མཚོ་སྔོན་ཞིང་ཆེན་རྐང་ཚ་རྫོང་འོམ་ཆུ་གྲོང་རྡལ་དཀོན་ལོ་ཚང་གོང་མ་གྲོང་ཚོའི་རི་ལྡེབས་ནས་འོམ་ཆུ་མཚོ་སྔོན་པོར་ལྷུང་ལྷུང་དུ་འབབ་པ་དང་། མཚོ་ངོས་ཀྱི་དར་ཁ་བཞུར་བ། འགྲམ་གྱི་འབྲི་གཡག་དལ་གྱིས་རྒྱུ་བ་བཅས་མཐོང་སྐབས། གྲོང་ཚོའི་ཏང་ཀྲི་པུའི་ཧྲུའུ་ཅི་དང་གྲོང་ཚོ་ཨུ་ལྷན་གྱི་ཀྲུའུ་རེན་བསོད་ནམས་ཚེ་བརྟན་གྱི་ངོ་གདོང་ལས་དགའ་བའི་འཛུམ་མདངས་འཕྱུར།

“དཔྱིད་ཀ་ཤར་བས་དལ་བའི་ཁོམ་པ་མི་འདུག” བསོད་ནམས་ཚེ་བརྟན་རི་ནས་བབས་ཏེ་དཀོན་ལོ་ཚང་གོང་མ་གྲོང་ཚོའི་གྲོང་ཚོ་ཨུ་ལྷན་དུ་ཡོང་སྐབས་ཐོན་ལས་སྐུལ་འདེད་ལས་དོན་རུ་ཁག་གི་རུ་མི་ཚོས་ཁོང་བསྒུགས་ནས་བསྡད་ཡོད། རུ་དཔོན་སྐལ་བཟང་རྒྱལ་གྱིས“ཁ་སང་ང་ཚོའི‘དཀོན་ལོ་ཚང’གི་ཐད་གཏོང་ནས་ནོར་ལུག་གི་ཤ་ག་ཚོད་བཙོངས་པ་ཤེས་སམ”ཞེས་དགའ་ཚོར་ཆེན་པོས་བཤད་ཞོར་འགྲམ་གྱི་གཞོན་ནུ་ཚེ་རྡོར་རྒྱལ་ལ་ལག་པས་རེག་ཙམ་བྱས་ནས་དྲིས་པ་དང་། ཁོང་གིས་མཛུབ་མོ་གསུམ་བརྐྱངས་ནས“མངགས་ཐོ་300ལྷག་ཙམ་འབྱོར་ནས་སྒོར་ཁྲི་2ལྷག་ཙམ་བྱུང་འདུག”ཅེས་བཤད།

དེ་གོང་དཀོན་ལོ་ཚང་གོང་མ་གྲོང་ཚོའི་བལ་འཇམ་ལུག་དང་འབྲི་གཡག་སྔར་ནས“ཁ་ཐོར་ངང་གསོ”གི་ཡོད། 2020ལོར། ལོ་30ལ་སླེབས་པའི་བསོད་ནམས་ཚེ་བརྟན་གྲོང་ཚོའི་ཏང་ཀྲི་པུའི་ཧྲུའུ་ཅིར་བདམས་པ་དང་། ཁོང་གིས་གསོ་སྤེལ་ལ་བརྟེན་ནས་ཁྲོམ་ར་གསར་པ་གཏོད་རྩིས་བྱས།“ཤུགས་རྒྱག་ས་ནི་མཉམ་ལས་ཁང་ཡིན་པས། ང་ཚོས་འཇོན་ཐང་ཅན་གྱི་དུད་ཆེན་དཔེ་སྟོན་དུ་བྱས་ཏེ་ལུག་དང་འབྲི་གཡག་ཁྱུ་བཀར་དང་། ཕ་སྦྱོར། འོ་ཐག་གཅོད་པ། དོ་དམ། གསོ་ཚགས། བཤས་གཏོང་བཅས་ཚང་མར་ཆེད་མིས་འགན་འཁུར་དུ་བཅུག་ཡོད”ཅེས་ཁོང་གིས་བཤད།

གཞི་ཁྱོན་ཆེ་རུ་ཕྱིན་པ་དང་སྤུས་ཚད་མཐོ་རུ་སོང་བ་དང་སྦྲགས་མཉམ་ལས་ཁང་གི་ཁེ་བཟང་ཡང་རིམ་བཞིན་མང་དུ་སོང་ཡོད། ན་ནིང་དཀོན་ལོ་ཚང་གོང་མ་གྲོང་ཚོའི་མཉམ་ལས་ཁང་གསུམ་གྱིས་རྩྭ་ར་མུའུ་ཁྲི་6.43བསྡུ་སྒྲིལ་བྱས་པར་ལོར་ཡོང་འབབ་སྒོར་ཁྲི་140.5བྱུང་ཡོད།

ན་ནིང་ཟླ་8པར། མ་དངུལ་སྒོར་ཁྲི་350ཟིན་པའི་གྲོང་ཚོའི་མཉམ་སྡེབ་ཐོན་ལས་དཀོན་ལོ་ཞིང་འབྲོག་ཐོན་རྫས་གསར་སྤེལ་ཚད་ཡོད་ཀུང་སི་བཙུགས་ཏེ། “དཀོན་ལོ་ཚང”གི་སྤུས་རྟགས་དངོས་སུ་ཁྲོམ་རར་བཏོན་པ་དང་། ལོ་ཕྱེད་མ་སོང་བར་ཀུང་སིའི་ཕྱིར་ཚོང་དངུལ་འབོར་སྒོར་ཁྲི་20ཙམ་ཟིན་ཡོད།

“ད་ཆ་མི་མང་པོ་ཞིག་གིས་དཀོན་ལོ་ཚང་གོང་མ་གྲོང་ཚོའི་ནོར་ལུག་གི་ཤ་ཡག་པོ་ཡོད་པ་ཤེས་ནས་ཉོ་བར་ཡོང་གི་ཡོད” སྔོན་ཆད་མཚོ་སྔོན་པོའི་འགྲམ་དུ་སྐྱས་སྤོས་ལ་བརྟེན་ནས་འཚོ་བ་སྐྱེལ་བའི་གྲོང་སྡེ་དེས་ད་ཆ་སྐྱེ་ཁམས་ཡུལ་སྐོར་མྱོང་རོལ་རྣམ་གྲངས་གསར་སྤེལ་བྱས་ཏེ། “ཐོན་ལས་དར་རྒྱས་དང་། སྐྱེ་ཁམས་མཛེས་པ། གྲོང་མི་ཕྱུག་འགྱུར”བཅས་ཀྱི་ཕྱོགས་སུ་སྐྱོད་བཞིན་ཡོད། 2024ལོར་དཀོན་ལོ་ཚང་གོང་མ་གྲོང་ཚོའི་མཉམ་སྡེབ་དཔལ་འབྱོར་སྒོར་ཁྲི་80ལྷག་ཙམ་ཟིན་པ་དང་། དབུལ་སྒྲོལ་དུད་ཚང་གི་མི་རེའི་ཆ་སྙོམས་ཡོང་འབབ་སྒོར་19817.5ཟིན་ནས་ལོ་གོང་མ་ལས་14.04%འཕར་ཡོད།

（པ་སངས་སྒྲོན་ལགས་ཀྱིས་བསྒྱུར། པ་སངས་ཚེ་རིང་གིས་ཞུས）