༄༅།།མཚོ་སྔོན་གྱིས་དཀའ་ངལ་ཡོད་པའི་མང་ཚོགས་ཀྱི“ཐ་སྐྱོང”ཆེད་འཕྲལ་སྐྱོབ་སྲིད་ཇུས་སྔར་བས་འཐུས་སྒོ་ཚང་དུ་བཏང་བ།

    འདི་ག་ཚགས་པར་ཁང་དུ་གནས་ཚུལ་འབྱོར་གསལ། མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བ་གཞིར་བཟུང་། ཉེ་ཆར། མཚོ་སྔོན་ཞིང་ཆེན་དམངས་སྲིད་ཐིང་དང་ཞིང་ཆེན་ནོར་སྲིད་ཐིང་གིས《མཚོ་སྔོན་ཞིང་ཆེན་གྱི་འཕྲལ་སྐྱོབ་ལས་དོན་གྱི་ལག་བསྟར་བྱ་ཐབས》མཉམ་དུ་བཀྲམ་ནས་འཕྲལ་སྐྱོབ་བྱ་ཡུལ་གྱི་ཁྱབ་ཁོངས་དང་། རོགས་སྐྱོབ་ཀྱི་ཚད་གཞི། རོགས་སྐྱོབ་ཀྱི་བརྒྱུད་རིམ་སོགས་སྔར་བས་ཁ་གསལ་དང་ཚད་ལྡན་བཟོས་པ་དེའི་དམིགས་ཡུལ་ནི། སྤྱི་ཚོགས་རོགས་སྐྱོབ་ཀྱི་ཐ་སྐྱོང་ཚད་གཞི་དང་འཕྲལ་སྐྱོབ་དཀའ་བའི་ནུས་པ་རྒྱུན་མཐུད་བཏོན་ནས་གྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་མང་ཚོགས་ཀྱི་ཐོལ་བྱུང་རང་བཞིན་དང་། དགོས་གཏུག་རང་བཞིན། སྐབས་འཕྲལ་རང་བཞིན་བཅས་ཀྱི་གཞི་རྩའི་འཚོ་བའི་དཀའ་ངལ་ཐག་གཅོད་བྱ་ཆེད་རེད།

    《བྱ་ཐབས》ནང་། འཕྲལ་སྐྱོབ་ཀྱི་ཁྱབ་ཁོངས་ཁ་གསལ་བཏོན་ཡོད། མེ་སྐྱོན་ཐོན་པ་དང་ཐོལ་བྱུང་གི་ནད་གཞི་ཚབས་ཆེན་ཕོག་པ་སོགས་ཀྱིས་རྐྱེན་པས་ཁྱིམ་ཚང་གི་གཞི་རྩའི་འཚོ་བར་དཀའ་ངལ་ཆེན་པོ་འཕྲད་པས་རོགས་སྐྱོབ་བྱེད་ཐབས་འཕྲལ་མར་སྤྱོད་དགོས་པའི་ཁྱིམ་ཚང་དང་མི་སྒེར་དེ་དག་དཀའ་ཉེན་ཆེ་རིགས་ཀྱི་རོགས་སྐྱོབ་བྱ་ཡུལ་ཡིན་པ་དང་། ནད་གཞི་དང་། སློབ་སྦྱོང་། སྡོད་ཁང་སོགས་ལ་འགྲོ་གྲོན་གཏོང་དགོས་པའི་རྐྱེན་གྱིས་ཁྱིམ་ཚང་དང་མི་སྒེར་དེ་དག་འགྲོ་གྲོན་གཏོང་དགོས་པའི་འཕྲལ་སྐྱོབ་བྱ་ཡུལ་ཡིན་པ་དང་། དེའི་ནང་དམིགས་བསལ་དཀའ་ངལ་ཡོད་པའི་མི་སྣ་དང་མ་མཐའི་འཚོ་བའི་འགན་སྲུང་ཁྱིམ་ཚང་སོགས་རྒྱུན་མཐོང་གི་ཚོགས་སྤྱི་ཚུད་ཡོད། གསར་འཕར་གྱི“འགྲོ་གྲོན་གཏོང་དགོས་པའི་རོགས་སྐྱོབ་བྱ་ཡུལ་གཞན་དག”མདུན་གྱི་ཁྱབ་ཁོངས་ནང་མེད་ཀྱང་ཟླ་གཅིག་ནས་གསུམ་ནང་ཚུན་དུ་ཡོང་འབབ་དམའ་བ་དང་འཚོ་བའི་དགོས་ངེས་འགྲོ་གྲོན་དབང་གིས་དབུལ་པོར་གྱུར་པའམ། ཁྱིམ་ཚང་གི་རྒྱུ་ནོར་གནས་ཚུལ་དེ་གཏན་འབེབས་ནང་གི་ཁྱིམ་ཚང་དང་མི་སྒེར་ལ་ལམ་ལུགས་ཀྱི་ཁྱབ་ནུས་རང་བཞིན་དང་སྲིད་ཇུས་ལག་བསྟར་ཇེ་ལེགས་སུ་གཏོང་དགོས་པ་ཁ་གསལ་བཏོན་ཡོད།

    《བྱ་ཐབས》ནང་། འཕྲལ་སྐྱོབ་ཀྱི་ཚད་གཞི་གཏན་འབེབས་བྱས་ཡོད། རོགས་སྐྱོབ་ཚད་གཞི་གཏན་འཁེལ་བྱེད་པའི་ཐད་དཀའ་ཉེན་ཆེ་བ་དང་འགྲོ་གྲོན་གཏོང་དགོས་པའི་རོགས་སྐྱོབ་བྱ་ཡུལ་གྱི་རོགས་སྐྱོབ་ཚད་གཞི་མཐོ་ཤོས་དེ་ས་གནས་དེ་གའི་གྲོང་ཁྱེར་གྱི་ལོའི་མ་མཐའི་འཚོ་བའི་འགན་སྲུང་ཚད་གཞིའི་ལྡབ་5ལས་བརྒལ་མི་ཆོག དཀའ་ཉེན་ཆེ་རིགས་ཀྱི་རོགས་སྐྱོབ་ཚད་གཞི་དེ་ས་གནས་དེ་གའི་ཟླ་རེའི་གྲོང་ཁྱེར་གྱི་མ་མཐའི་འཚོ་བའི་འགན་སྲུང་ཚད་གཞི་དང་། དཀའ་ངལ་ཡོད་པའི་ཁྱིམ་ཚང་གི་མི་གྲངས། དཀའ་ངལ་རྒྱུན་མཐུད་ཀྱི་དུས་བཀག་བཅས་རྒྱུ་རྐྱེན་གཙོ་བོ་གསུམ་ལ་གཞིགས་ནས་རོགས་སྐྱོབ་ཀྱི་དངུལ་གྲངས་རྩིས་བརྒྱབ་སྟེ་གཏན་འཁེལ་བྱེད་དགོས། འགྲོ་གྲོན་གཏོང་ཡུལ་གྱི་རོགས་སྐྱོབ་ཚད་གཞི་དེ་སྤྱི་འགྲོས་ཀྱི་རྩིས་རྒྱག་སྟངས་གཙོ་བོར་བྱེད་པ་དང་རིམ་པ་དབྱེ་ནས་རོགས་སྐྱོབ་བྱ་རྒྱུ་གཞོགས་འདེགས་སུ་བྱས་ཏེ་རོགས་སྐྱོབ་ཀྱི་ཚད་གཞི་གཏན་འཁེལ་ལུགས་མཐུན་བྱེད་དགོས། གནས་ཚུལ་དམིགས་བསལ་ཡིན་རིགས་ལ་རོགས་སྐྱོབ་བྱེད་ཤུགས་ཆེ་རུ་བཏང་ནས“དོན་གཅིག་གྲོས་གཅིག”གི་བྱེད་སྟངས་བརྒྱུད་རོགས་སྐྱོབ་ཀྱི་གྲངས་བཅད་གཏན་འཁེལ་བྱེད་དགོས། རོགས་སྐྱོབ་ཀྱི་ཚད་གཞི་མཐོ་ཤོས་དེ་ས་གནས་དེ་གའི་གྲོང་ཁྱེར་གྱི་ལོའི་མ་མཐའི་འཚོ་བའི་འགན་སྲུང་ཚད་གཞིའི་ལྡབ་10ལ་སླེབས་པར་བྱས་ནས་རོགས་སྐྱོབ་ཀྱི་ཕན་ནུས་ཐོན་པའི་འགན་ལེན་བྱེད་དགོས་ལུགས་ཁ་གསལ་བཏོན་ཡོད།

     《བྱ་ཐབས》ལས་འཕྲལ་སྐྱོབ་ཀྱི་ཕན་ནུས་ཆེ་རུ་བཏང་ཡོད། དཀའ་ཉེན་ཆེ་བ་ལ་འཕྲལ་སྐྱོབ་བྱེད་པར་དམིགས་ནས“སྔོན་ལ་རོགས་སྐྱོབ་བྱེད་དགོས་པ”དང་ཆུ་ཚོད་24ཡི་ནང་ཚུན་དུ་རོགས་སྐྱོབ་སྲིད་ཇུས་དོན་འཁྱོལ་བྱས་ནས་ཁ་གསབ་མ་དངུལ་སྤྲོད་དགོས་ལུགས་ཁ་གསལ་བཏོན་ཡོད། གསར་འཕར་གྱི“འབོར་ཆུང་རོགས་སྐྱོབ”ལས་ས་གནས་དེ་གའི་ཟླ་རེའི་གྲོང་ཁྱེར་གྱི་མ་མཐའི་འཚོ་བའི་འགན་སྲུང་ཚད་གཞི་དེ་ཚད་གཞི་མཐོ་ཤོས་སུ་བརྩིས་ནས་སྔོན་ལ་རོགས་སྐྱོབ་དང་རྗེས་ལ་ཐོ་འགོད་བྱེད་པའི་བྱེད་སྟངས་སྤྱད་དེ་བརྒྱུད་རིམ་སྟབས་བདེ་རུ་གཏོང་དགོས།